¿Imaynatan Biblia estudiaqta yanapasunman bautizoman chayananpaq?

1, 2. a) ¿Imaraykun wakin Biblia estudiaqkuna manchakushankuman Jehová Diospa testigon kayta? b) ¿Imakunamantan kaypi yachasunchis?

¿IMAYNAN Bibliata estudiashaspa karqanki? Yaqapaschá manchakusharqanki Diospa testigon kayta. Llank’anaykipi compañerokuna, amigokuna familiayki imapaschá contraykipi kasharqanku. Wakinqa “pantarusaqpaschá, manapaschá Diospa munasqanman jinachu kausasaq”, nispapaschá nisharqanchis. Chhaynakunapi tarikurqanki chayqa, entiendenkichá Bibliamanta yachachisqayki runataqa. Paykunapas chhaynakunapi tarikuspan manchakunku Jehová Diospa testigon kayta.

² Jesusqa yacharqanmi wakin runakuna chhaynakunapi tarikuspa Dios serviyta manchakunankuta (Mat. 13:​20-22). Chaywanpas manan paykunataqa mana atiqpaq jinachu qhawarirqan, aswanpas sumaqtan paykunataqa yanaparqan. Noqanchispas paypa ejemplontan qatikunanchis. Yanapananchismi estudiantekunata: 1) Imakunas jark’ashan chayta reparanankupaq. 2) Jehová Diosta astawan munakunankupaq. 3) Imakunas aswan allin chayta reparanankupaq. 4) Sasachakuykunata atipanankupaq. ¿Imaynatan chaykunapi Jesuspa ejemplonta qatikusunman, imaynatan Kusisqa kausay librowanpas yanapachikusunman paykunata yanapananchispaq?

IMAKUNACHUS JARK’ASHAN CHAYTA REPARAKUNANPAQ YANAPAY

3. ¿Imaraykun Nicodemo manchakushanman karqan Jesuspa discipulon kayta?

³ Nicodemo sutiyoq runamantan yachasunchis. Payqa judiokuna ukhupi allin reqsisqa runan karqan. Payqa Jesusta reqsisqan soqta killa qhepallamanmi repararqan Jesusqa Diospa kachamusqan Mesías kasqanta (Juan 3:​1, 2). Ichaqa manchakusharqanmi Jesusta qatikuyta, chaymi payqa judiokunata manchakusqanrayku pakallapi Jesuswan rimarqan (Juan 7:13; 12:42). Payqa yaqapaschá nisharqan: “Jesusta qatikusaq chayqa imaymanatachá saqepunay kanqa”, nispa.a

4. ¿Imaynatan Jesús Nicodemota yanaparqan imatas Jehová Dios munarqan chayta entiendenanpaq?

⁴ Nicodemoqa allintan reqsirqan Moisespa chaskisqan kamachikuy simitaqa. Ichaqa jujpa yanapaynintan necesitasharqan ima ruwanantas Jehová Dios munan chayta entiendenanpaq. Chhaynaqa, ¿imaynatan Jesús payta yanapanman karqan? Jesusqa tiempotan t’aqarqan paywan rimananpaq. Chaymantapas ima horatacha Nicodemo paywan rimayta munasharqan chay horatan payqa rirqan. Chaypin Jesusqa sut’ita willarqan imatas ruwanan karqan paypa discipulon kananpaq chaytapas. Arí, payqa juchankunamantan arrepientekunan karqan, bautizakunanmi karqan, iñinanmi karqan Jesuspipas (Juan 3:​5, 14-21).

5. ¿Imaynatan estudianteta yanapasunman imas bautizakunanta jark’ashan chayta reparakunanpaq?

⁵ Wakin estudiantekunaqa allintan Bibliamanta yachanku. Ichaqa manan allintachu reparanku imas jark’ashan Diosta servinankuta chayta, chaypin noqanchis yanaparinanchis. Yaqapaschá payqa nishuta llank’anaman tiempota qoshan, familianpaschá jark’ashan Testigo kananta. ¿Imatan ruwasunman chaykunapi Jesús jina payta yanapananchispaq? Tiempotan t’aqananchis paywan parlarinanchispaq. Yaqapaschá nisunman paywan kuska imallatapas mijuq rinanchispaq o mayllatapas paseaq rinanchispaq. Chay ratukunapin wakinqa facil-llata willakunku imaynas tarikushanku chayta. Chayta yachaspaqa faciltan noqanchispas yanapasunchis. Allintan reparachisunchis imakunatas cambianan kashan chayta, imaraykus chaytaqa ruwanan Diosta munakusqanrayku chaytapas.

6. Wakin estudiantekunapaqqa manataq facilchu Diospa nisqanta kasukuy chayqa, ¿imaynatan yanapasunman kallpata jap’inankupaq? (1 Corintios 16:13).

⁶ Chaymantapas estudiantetaqa yanapananchismi Jehová Diospi confiananpaq. Allintan entiendechinanchis imaynas Jehová Diosqa siminta kasukunanpaq yanapanqapuni chayta (leey 1 Corintios 16:13). ¿Imaynatan chayta ruwasunman? Chaypaq yuyariy escuelaman risqayki tiempota. ¿Imayna profesormi qanman gustaq kasunki? Yaqapaschá qanqa pacienciakuq profesorwan sumaqta yanapasuqniyki profesorwan masta kayta munaq kanki. Chay profesor jina qanpas kay. Ama yachachiyllachu yachachiy, aswanpas sut’ita willay imaynas Jehová Diosqa yanapanqapuni chayta. Arí, payqa yanapanqan ima kamachisqantapas ruwananpaq. ¿Imaynatan chayta ruwawaq? Qatiqpi chayta yachasunchis.

JEHOVÁ DIOSTA ASTAWAN MUNAKUNANPAQ YANAPAY

7. ¿Imaynatan Jesús runakunata yanaparqan Jehová Diosta astawan munakunankupaq?

⁷ Jesusqa allintan yacharqan qatikuqnin runakuna Jehová Diosta munakuqtinkuqa paypa kamachisqanman jina kausanankuta. Chaymi imatapas yachachispaqa Diosta munakunankupaq jina yachachiq. Juj kutipas juj munakuq Taytawanmi Jehová Diostaqa tupanachirqan (Mat. 7:​9-11). Juj kutitaq arrepientesqa kutimuq wawanta sumaqta chaskiq runawan tupanachirqan. Chaywanmi Jesusqa rikuchirqan imaynas Diosqa maytapuni runakunata munakun chayta (Luc. 15:​20-24). Chayta uyariq runakunaqa taytanku manaña paykunata munakurqanchu chaypas, repararqankucha imaynas Jehová Diosqa may munakuq chayta.

8. ¿Imaynatan yachachisqanchis runata yanapasunman Jehová Diosta munakunanpaq?

⁸ Noqanchispas Jesús jinan runakunata yanapananchis Jehová Diosta munakunankupaq. Chaypaqqa allintan reparachinanchis imaynapunis Jehová Dios chayta. Arí, Bibliamanta yachachishaspaqa allintan reparachinanchis imaynas Jehová Diosqa munakuwasqanchisrayku kamachikuykunata qowanchis chayta. Jesuspa wañusqanmanta yachachishaspapas reparachinanchismi imaynas Jehová Diosqa munakuwaspanchis wawanta kay pachaman kachamurqan chayta (Rom. 5:8; 1 Juan 4:10). Sichus yachachisqayki runa reparanqa Jehová Dios payta munakusqanta chayqa, paypas munakapunqan Jehová Diostaqa (Gál. 2:20).

9. ¿Iman Michaelta yanaparqan vidanta cambiaspa bautizakapunanpaq?

⁹ Yachasun Indonesia ladopi Michael sutiyoq runamanta. Payqa juch’uychanmantapachas Diospa llaqtanpiña wiñasqa, ichaqa manas bautizakusqachu. Payqa 18 watanpi kashaspas juj nacionman llank’aq ripusqa. Tiempowansi ichaqa kaqta Indonesia nacionman kutipusqa. Chaypis payqa casarakapusqa, juj wawayoq imas kapusqa. Ichaqa jujmantas llank’aq ripullasqataq. Chaykamas esposanqa ususinpiwan Biblia estudiayta qallarisqaku. Ichaqa Michaelpa mamitansi wañukapusqa, chaysi payqa familianwan kuska papanpa wasinman astakapusqa chaypi payta cuidananpaq. Chaypis payqa jujmanta Biblia estudiayta qallarisqa Kusisqa kausay librowan. Chay libropis payqa 27 yachachikuyta estudiashaspa reparasqa Jehová Dios runakunata anchata munakuwasqanchista, munakuwasqanchisrayku wawanta wañunanpaq kachamusqantapas. Jehová Dios chhayna kasqanta reparaspas payqa waqayta qallarisqa. Chaysi paytaqa yanapasqa vidanta cambiananpaq, Jehová Diospa testigon kapunanpaq ima.

ASWAN ALLIN KAQKUNATA REPARANANPAQ YANAPAY

10. ¿Imatan Jesús ruwarqan discipulonkuna Dios serviyta ñaupaqman churanankupaq? (Lucas 5:​5-11; qhaway kay parrafopaq dibujota).

¹⁰ Jesuspa discipulonkunaqa ratullan repararqanku payqa Jehová Diospa kachamusqan Mesías kasqanta. Ichaqa manan allintachu yacharqanku ima ruwanankutas Jehová Dios munasharqan chayta. Arí, manan repararqankuchu imaynas Diosmanta willay aswan jatun llank’ay karqan chayta. Chayta entiendenankupaqmi Jesusqa Pedrota Andrestawan yanaparqan. Paykunaqa chay kutipaqqa qatikurqankuñan Jesustaqa, chaymi paykunata nirqan Diosmanta willaypi tukuy tiemponkuwan yanapakunankupaq (Mat. 4:​18, 19). Ichaqa paykunaqa challwata jap’ispan llank’aqku (Mar. 1:​16-20). Chhaynataq karqan chayqa manachá facilchu karqan Jesusta qatikuyqa. Jesusta qatikunankupaqqa llank’anankutachá saqepunanku karqan. Chaymantapas imaymanatachá ruwananku karqan Jesusta qatikusqanku tiempopi familiankuman ama imankupas faltananpaq. Manaña chay ruway facilchu karqan chaypas, ¿iman paykunata yanapanman karqan tukuy imata saqespa Jesusta qatikunankupaq? Bibliapi nisqan jina, Jesusqa juj jatun milagrotan ruwarqan, chayta rikuspan paykunaqa yacharqanku Jehová Diospi confiayta. Repararqankun imaynas Jehová Dios paykunata familiankunatapas cuidanan karqan chayta (leey Lucas 5:​5-11).

11. ¿Imatan ruwasunman yachachisqanchis runa Jehová Diospi confiayta yachananpaq?

¹¹ Noqanchisqa manan atisunmanchu Jesús jina milagrokuna ruwaytaqa. Ichaqa willasunmanmi yachachisqanchis runaman imaynas Jehová Diosqa payta ñaupaqman churaqkunataqa yanapanpuni chayta. Chayta reparananpaq willay imaynatas qantapas chayllaraq juñunakuykunaman rishaqtiyki yanaparqasunki chayta. Qanpas juñunakuykunaman rinaykipaqqa llank’anaykipi jefeykiwanpaschá rimarqanki pisi tiempollataña llank’anaykipaq. Chay kutikunapi imaynatachus Jehová Dios yanaparqasunki chayta payman willay.

12. a) ¿Imaraykun yachachiq rishaspa juj hermanokunatawan pusay allin kanman? b) ¿Imatawanmi ruwawaq yachachisqayki runa Dios serviyta ñaupaqman churananpaq?

¹² Yachachisqanchis runataqa hermanonchiskunaq experiencianpas yanapanmanmi Jehová Diospi confianankupaq, payta serviyta munanankupaqpas. Chhaynaqa yachachiq rishaspaqa juj hermanokunatawan pusarikuy, jinaspa paykunata niy imaynatas Jehová Diosta reqsirqanku, imakunatas saqerqanku Jehová Diosrayku chaykunata willarinanpaq. Chaymantapas Kusisqa kausay libropi “Astawan yachasun” nisqa partepi videokunata qhawaychis. Uranpi kaq “Astawan yachanaykipaq” nisqa partepi videokunatapas qhawawaqchismi. Chaymantapas 37 yachachikuypi Imanchischus kan chayllawan contento kausasun nisqa videotapas qhawaychis, textokunatapas maskhaychis.

SASACHAKUYKUNATA ATIPANANPAQ YANAPAY

13. Qatiykachasqa kaqtinku, ¿imata ruwanankupaqmi Jesús kallpacharqan discipulonkunata?

¹³ Jesusqa yacharqanmi qatikuqninkuna qatikachasqa kanankuta, kikin familiankupas paykunata cheqnikunankuta (Mat. 5:11; 10:​22, 36). Chaymantapas nirqanmi imaynas paykunaqa wañuy patapi imaraq tarikunanku karqan chayta (Mat. 24:9; Juan 15:20; 16:2). Willarqanmi imaynas chhaynakunapi tarikuspaqa allin yuyaywan predicananku karqan chaytapas. Paykuna contra churakuq runakunawanpas manan discutinankuchu karqan.

14. ¿Imaynatan yachachisqanchis runata yanapasunman manaraq pipas paykunamanta burlakushaqtinku? (2 Timoteo 3:12).

¹⁴ Noqanchispas Jesús jinan yachachisqanchis runakunataqa allinta preparananchis. Willananchismi imaynas mayninqa llank’ananpi compañeronkuna, amigonkuna, familiankupas paykunamanta burlakunqaku chayta. Willananchismi imatas chhaynapi tarikuspa ruwankuman chaytapas (leey 2 Timoteo 3:12). Wakin llank’aqmasinkunaqa yaqapaschá Bibliapi nisqanman jina kausasqankurayku paykunamanta burlakunqaku. Wakin familiankupas yaqapaschá Bibliapi nisqanman jina imapipas creesqankumanta phiñakunqaku ima. Chaymi paykunamanqa willananchispuni imaynas chhaynakunapiqa tarikunqakupuni chayta. Chayta ruwasun chayqa, paykunaqa liston kashanqaku chhaynakunapi tarikuspa imata ruwanankupaqpas imaynata rimanankupaqpas.

15. Sichus yachachisqayki runaq mayqen familianpas jark’akushan Biblia estudiananta chayqa, ¿imaynatan payta yanapawaq?

¹⁵ Sichus yachachisqayki runata mayqen familianpas jark’ashan Biblia estudiananta chayqa tapuriy: “¿Imaraykun mana munashanmanchu Biblia estudianaykita? ¿“Engañasunkikun” nisunkichu, icha Testigokunata cheqnikusqanraykuchu mana munan estudianaykita?”, nispa. Jesustapas chaymi pasarqan. Paypa wakin familianpas pay contran churakurqanku, “locoyapunmi” nispan nirankupas (Mar. 3:21; Juan 7:5). Chhaynapi yachachisqayki runa tarikushan chayqa, yanapay pacienciawan sumaqllata familianwan rimananpaq.

16. ¿Imaynatan yachachisqanchis runakunata yanapasunman Bibliapi imachus yachasqankumanta sumaqllata familiankuman willanankupaq?

¹⁶ Sichus yachachisqayki runata mayqen familianpas tapunqa: “¿Imakunatataq Bibliapiri yachashanki?” nispa chayqa, yachachisqayki runata niy pisillapi imachus yachasqanta willananpaq. ¿Imarayku? Llapa yachasqanta jujllapi nirunqa chayqa yaqapaschá familianqa sayk’upunqa jinaspa manaña jujpiqa imatapas yachayta munanqañachu. Chhaynaqa yachachisqayki runata niy pisi-pisillamanta Bibliapi yachasqanta willarinanpaq. Pisillata willanqa chayqa jujpiqa yaqapaschá familianqa astawan yachayta munanqa (Col. 4:6). Ichaqa sichus Jehová Diospa testigonkunamanta astawan yachayta munanqa chayqa, ninkumanmi jw.org nisqa paginaman jaykunankupaq.

17. ¿Imaynatan yachachisqayki runata yanapawaq Bibliapi imapichus creesqanta familianman imaynata willananpaq? (Qhaway kay parrafopaq fotota).

¹⁷ Chaymantapas yachachisqayki runata yachachiy jw.org nisqapi “Sapa kutilla tapukusqanku” nisqa parteman jaykunanpaq. Chaypin willashan imaynatas llank’anapi compañeronchiswan o familianchiswanpas imapichus creesqanchismanta rimasunman chayta (2 Tim. 2:​24, 25). Chaymantapas Kusisqa kausay nisqa libropin juj kaq partepi nishan “Wakin runakunan ninku” nispa. Chay partepi kashaspan yachachisqayki runata niwaq imaynatas familianku imatapas tapukuqtinku ninkuman chayta. Chay qhepamanqa qanpas yachachiwaqmi imayna niyta. Chaykunata ruwankichis chayqa yachachisqayki runaqa mana manchakuspan imapichus creesqanta familianman willanqa.

18. ¿Imaynatan yachachisqayki runata kallpachawaq iñiq t’aqapi hermanokunawan kuska Diosmanta willaq lloqsinanpaq? (Mateo 10:27).

¹⁸ Jesusmi qatikuqninkunata kamachirqan allin willakuykunata llapa runakunaman willamunankupaq (leey Mateo 10:27). Sichus yachachisqanchis runa imakunapichus creesqanta jujkunaman willayta qallarinqa chayqa, reparanqan Jehová Diospa yanapayninta, yachanqataqmi Jehová Diospi confiaytapas. ¿Imata ruwananpaqmi chay qhepaman kallpachawaq? Kallpachay iñiq t’aqapi hermanokunawan kuska Diosmanta willaq lloqsinanpaq. ¿Imaynatan chayta ruwawaq? Diosmanta willanapaq campaña kasqanta iñiq t’aqapi willakamuqtin estudianteykiman willariy imatas paypas ruwanan chaypi yanapakunanpaq chayta. Chaymantapas willay imaynas chhayna campañakunapi Diosmanta willayqa munaypuni chayta. Chaymantapas chaupi semana juñunakuypi participananpaq matriculakunqa chayqa allinmi kanqa, chaymi yanapanqa imapichus creesqanta ama manchakuspa rimananpaq.

YACHACHUN PAYPI CONFIASQAYKITA

19. ¿Imatan Jesús discipulonkunapi masta qhawarqan, imatan noqanchispas paymanta yachasunman?

¹⁹ Manaraq janaq pachaman ripushaspan Jesusqa discipulonkunata nirqan: “Jujmantan tupasunchis”, nispa. Chay kutipiqa janaq pachapi tupanankumantan Jesusqa rimasharqan, paykunan ichaqa mana chayta entienderqankuchu. Manaña entienderqankuchu chaypas Jesusqa Dios sonqo kasqankutan mastaqa qhawarqan (Juan 14:​1-5, 8). Janaq pachaman rinankutaqa pisi-pisimantan discipulonkunaqa entiendenanku karqan (Juan 16:12). Noqanchispas Jesús jinan kananchis, yachachisqanchis runakunaq kallpachakusqankutan mastaqa qhawananchis.

20. ¿Imaraykun Malahui nacionmanta hermananchis yachachisqan sipasta pacienciawan yachachishallarqan?

²⁰ Confiananchismi yachachisqanchis runakunapiqa, paykunapas tiempowanqa cambiallankumanmi. Chaypaq yachasun Malahui nacionmanta Chifundo sutiyoq hermananchismanta, payqa Alinafe sutiyoq católica sipasmansi Bibliamanta yachachiyta qallarisqa. Kusisqa kausay libropi 14 yachachikuypi kashaqtinkus payqa Alinafeta tapusqa: “¿Allinchu kanman taytachakunata mamachakunata yupaychay?”, nispa. Alinafeqa sinchitas chaywan phiñakusqa jinaspa payta nisqa: “Chayqa sapankamantañachá riki, munaspayqa yupaychaymanpaschá riki”, nispa. Chayta uyarispas hermananchis Chifundoqa mancharikusqa, “manañachá Bibliamanta yachaytaqa munanqañachu” nispas piensasqa, ichaqa pacienciallawansi yachachisqa. Askha killakuna qhepamansi hermananchisqa 34 yachachikuypi kashaqtinku chay sipasta tapullasqataq: “¿Yanapashasunkichu Bibliata estudiasqayki, Jehová Diostapas reqsisqayki?”, nispa. Chay kutipiqa Alinafeqa sumaqtas Bibliapi yachasqanmanta rimasqa. Chaymantapas nisqas: “Testigokunaqa Bibliapi nisqanman jinamá kausasqaku, manan chay contraqa imatapas ruwankuchu”, nispa. Chay qhepamanqa cambiapusqas chay sipasqa, manañas idolokunatapas yupaychasqañachu, tiempowantaq bautizakapusqa.

21. ¿Imaynatan yachachisqanchis runakunata yanapasunman Jehová Diosta munakunankupaq, payta serviyta munanankupaqpas?

²¹ Yachasqanchis jina Jehová Diosmi estudiantekunataqa yanapan iñiyninkupi wiñarinankupaq. Ichaqa noqanchispas yanapasunmanmi Jehová Diosta munakunankupaq, payta servinankupaq ima (1 Cor. 3:7). Chhaynaqa yachachishaspaqa manan yachachiyllachu yachachinanchis, aswanpas yanapananchismi Jehová Diosta tukuy sonqowan munakunankupaq. Chaymantapas yanapananchismi Jehová Diosta munakusqankurayku vidankuta cambianankupaq, pay serviyta ñaupaqman churanankupaq ima. Sasachakuykunapi tarikuqtinkupas yanapananchismi Jehová Diospi confianankupaq. Chaymantapas pacienciawanmi suyananchis estudiantenchiskuna cambianankuta. Pacienciawan paykunata yanapasunchis chayqa atinqakun cambiayta.