Qhopo wasa ballenaq raphran

QHOPO wasa ballenaqa hatunña kaspaqa aswan hatun carroq sayaynin hinan chay carro hinataqmi llasanpas, chhaynaña kaqtinpas kay hatunkaray animalqa ratullan unu ukhuman chinkaykun ratullataq unupipas muyurin. ¿Imaynatan chay ruwayta atin? Chaypaqqa raphrankunawanmi yanapachikun.

Kaypi yuyaykuy: Yaqa llapa ballenakunaq raphranpa patanqa llusp’an qhopo wasa ballenaqmi ichaqa moqo-moqo. Chay moqokunan unuta wachu-wachuta t’aqaspa muyuchin. Chay unuq muyusqanwanmi ballenaqa aswan kallpawan phawan, chhaynapitaqmi raphrankunatapas astawanraq kuyuykachachiyta atin mana unuwan hark’achikuspalla. Raphrankuna hatunña chaypas chay moqo-moqonkunan yanapan unuwan mana hark’achikuspalla kuyuykachachinanpaq.

Chay ballenamanta estudiaq runakunan chayta yachaspanku ruwayta munanku aswan allin timonkunata, barcota purichiq aswan allin mariposakunata, wayraq kallpanwan kutaq molinokunata, helicopterokunapaq aswan allin mariposakunatapas.

¿Ima ninkin chaymanta? ¿Kikillanmantachu qhopo wasa ballenaq raphran rikhurimurqan icha kamasqachu karqan?