¿Reqsisqayki runallachu?

SASACHAKUYKUNA

¿Kanchu imayna sientekusqaykita entiendeq amigoyki? ¿Tukuytachu mana manchakuspa payman willakunki? Yaqapaschá ninki: “Payqa reqsisqallaymi”, nispa. Ichaqa qosaykiqa manan chaytachu ninman sapa kutilla chay runawan rimasqaykita yacharuspaqa.

Yaqapaschá nishuta chay runawan rimashanki, chayrayku imatapas ruwanayki kanqa. Ichaqa, ¿imaraykun casarasqakuna chhaynapi tarikunku? Chaymantan kunan yachasun.

Kay yachachikuypi warmimantaña rimakushan chaypas, qosakunamantapas kaqllatataqmi nikunman.

¿IMARAYKUN CHAY SUCEDEN?

Munasqa kayta maskhasqankurayku. Huk warmiqa kusikunmi huk qhari sumaqta rimapayaqtinqa, qharipas kaqllataqmi sientekun. Yaqapaschá askha wataña casarasqa warmi huk qhariwan chhayna sientekuyta munanman. Ichaqa chay ruwayqa sasachakuykunatan paqarichin. Sichus casarasqa warmi huk runata munapayashanman chayqa, qosallanpaq munakuynintan chiriyachishan. Manan rikuchishanmanchu qosan munakusqanta.

• Kaytan tapukunayki: “¿Imata munaspan huk qhariq amistadninta maskhani? ¿Manachu chaytaqa casado kawsaynillaypi astawan maskhanay?”, nispa.

Imayna sientekusqankurayku. Bibliaqa willanmi casarasqakuna ‘sasakunapi’ rikukunankumanta (1 Corintios 7:28). Yaqapaschá mayninpi sientekunki manapas qosayki munakusunkimanchu hina otaq phiñasqa sientekunki ima sasachakuytapas mana allichasqaykichismanta. Manapaschá qosaykipas chaykunamanta rimayta munanchu chaywantaq mana allintachu sientekunki, hinaspa huk runa uyarinasuykita munanki. Wakin yachaqkunaq nisqankuman hinaqa, sasachakuyninkuta allichanankupaq casarasqakuna mana rimaqtinkuqa manas allintachu kawsankuman otaq divorciakunkumansi.

• Kaytan tapukunayki: “¿Imatan casado kawsayniypi mana tarinichu huk runapi chaykuna tariyta munashanaypaq?”, nispa.

KAYTAN RUWAWAQ

Reparay ima sasachakuykunapi tarikunaykita. Bibliaqa kaytan nin: “Ninata oqllaykukuqqa, ¿manachu p’achanta ruphachikunman?”, nispa (Proverbios 6:27). Sichus huk casarasqa warmi huk runawan munanakuypi kashanman chayqa, mana allinpin tarikunman (Santiago 1:14, 15). Manan ninanchu “manan imapas sucedewanqachu” nispaqa, huk runata munakuspaqa ñan mana allintaña ruwashan, chay munakuyninqa qosallanpaqmi kanan.

Ama q’otukuychu. Huk qhariwan nishuta rimaspaqa sonqoykipipaschá yuyaykuwaq: “¿Imaynan kayman karqan paywan casarakuspay?”, nispa. Chayta yuyaykuyqa kanman chay runaq allinkuna ruwasqanta qosaykiq pantasqankunawan tupanachiy hinan, chayqa manan allinchu kanman. Manan chay runallachu sumaqtaqa rimapayarqasunki, qosaykipas reqsinakushaqtiykichisqa chhayna sumaqtamá rimapayarqasunki, riki. Chayrayku ama yuyaykusqaykikunawan q’otuchikuychu (Bibliaq yachachikuynin: Jeremías 17:9).

Rikuchiy qosallayki munakusqaykita. Runakunaqa allintan wasinkuta wisq’anku mana suwachikunankupaq. Kaqllatataqmi ruwawaq casado kawsayniykiwanpas. Biblian nin: ‘Sonqoykita allintapuni waqaychay’, nispa (Proverbios 4:23). ¿Imaynatan chayta ruwawaq?

• Sut’ita rikuchiy casarasqa kasqaykita. Chaypaqqa llank’anaykipipaschá qosaykiq fotonta hap’iwaq (Bibliaq yachachikuynin: Génesis 2:24).

• Decidikuy imakunapi ama nishuta huk qhariwan hukllachakunaykipaq. Ejemplopaq, manan allinchu kanman qosaykiwan ima sasachakuykunapi kasqaykichismanta amigoykiwan rimay otaq iskaynillaykichis mikhuq riypas.

• Sichus nishuta huk qhariwan rimashanki chayqa amaña chayta ruwayñachu. Sichus chay ruwayta mana atinkichu chayqa yuyaykuy imarayku mana atisqaykipi. Manan chay runawan allinpi kaytaraqchu maskhanayki, aswanpas kallpachakuy qosaykita astawan munakunaykipaq paywan kusisqa kawsanaykichispaqpas (Bibliaq yachachikuynin: Proverbios 5:18, 19).