Acuerdoman chayanapaq

¿IMAPIN WAKIN TARIKUNKU?

Yaqapaschá imatapas ruwayta munashankichis, chaytan esposayki huknirayta ruwayta munan qantaq huknirayta. Chhaynapi tarikuspa, ¿imatan ruwawaqchis?

1. ¿Niwaqchu “manan, nisqayman hinapunin ruwakunqa”, nispa?

2. ¿Niwaqchu “nisqaykiman hinachá kanqa riki”, nispa?

3. ¿Icha huk acuerdomanchu chayawaqchis?

Nishankipaschá: “Acuerdoman chayayqa yanqan, manachá pipas gustonwan qhepakunmanchu”, nispa.

Ichaqa manan chhaynachu. Acuerdoman chayanaykipaqqa yachanaykin imachus chaypaq necesario kasqanta.

KAYTAN YACHANAYKI

Yanapanakunaykichismi. Manaraq casarakuspaqa qankunallamantachá imatapas decidirqankichis. Casarakusqaykichis qhepamanmi ichaqa iskayniykichispi yuyaykuspaña decidinaykichis. Chayta ruwayqa yanapasunkichismi. Alexandra nin: “Problemakunataqa iskay runakunan aswan allintaqa allichankuman yanapanakusqankurayku, hukllan ichaqa mana chhaynatachu allichanman”, nispa.

Manan qanllapichu yuyaykunayki. Casarasqakunata yanapaq John M. Gottman nin: “Manan lliwpipunichu kaqllata ruwayta munankichis, ichaqa hukpa nisqantaqa manan hayk’aqpas mana valeqpaq hinaqa qhawarinaykichu”, nispa. Nillantaqmi: “Sichus esposayki otaq qosayki imatapas nisuqtiyki mana uyariqpas tukuwaqchu, uyaykipitaq chay reparakushanman chayqa manan hayk’aqpas acuerdomanqa chayawaqchischu”, nispa.a

Mayninpiqa manan gustoykichu ruwakunqa. Manan pipas munanmanchu “munasqallaytan ruwakunqa” niq runawan casarasqa kaytaqa. Chaymi maskhanayki hukpa allinnintaraq. June nin: “Mayninpiqa dejallanin qosay munasqanman hina ruwananta mayninpitaqmi payñataq dejawan munasqayman hina ruwanayta. Casado kawsaypiqa manan chaskiyllachu aswanpas qonallanchistaqmi”, nispa.

KAYTAN RUWAWAQ

Llamp’u simiwan rimayta qallariy. Imaynatachus parlayta qallarinkichis chhaynallatataqmi tukunkichispas. K’arak simikunawan rimayta qallarinkichis chayqa manan acuerdomanqa chayawaqchischu. Aswanpas Bibliaq nisqanta ruwaychis, ninmi: “P’achawan hina p’achakuychis khuyapayakuq-kaywan, sumaq sonqo-kaywan, huch’uyyaykukuywan, llamp’u sonqo-kaywan, pacienciawan ima”, nispa (Colosenses 3:12). Chhayna kaspaqa mana discutispallan problemaykichista allichankichis (Bibliaq yachachikuynin: Colosenses 4:6).

Yuyaykuy imapichus igual-lla kasqaykichispi. ¿Acuerdoman chayashaspachu discutipunkichis? Yaqapaschá chayqa pasashasunkichis imapichus mana igualchu kasqaykichispi yuyaykusqaykichisrayku. Imakunapichus igual-lla kasqaykichista yachanaykichispaq kaykunata ruwaychis:

Huk hojapi qelqaychis mayqenkunatan munawaqchis munasqaykichisman hina ruwakunanta, mayqenkunatataqmi dejallawaqchis huk hinamantapas ruwakunanta chaykunatawan. Yaqapaschá chaypi reparankichis askha ruwaykunapi igual-lla kasqaykichista. Chhayna kaqtinqa manan sasachu kasunkichis acuerdoman chayay. Pisi ruwaykunallapiña igual kawaqchis chaypas chayta ruwayqa yanapasunkichismi imaynata acuerdoman chayanaykichispaq.

Iskayniykichis rimaychis imayna allichanaykichista. Wakin problemakunaqa sasa allichanan, chhayna kaqtinqa rimaychis, chayqa astawanmi hukllachasunkichis. Chay qhepamanqa yaqapaschá ninkichisraq, “khaynataqa manan sapallayqa allichaymanchu karqan”, nispa (Bibliaq yachachikuynin: Eclesiastés 4:9).

Ama phiñakuspalla piensasqaykita cambiay. Biblian nin: “Qosakuna, sapankaykichis qankuna kikiykichista hinapuni esposaykichista munakuychis, hinallataq qankunapas esposakuna qosaykichista respetaychis”, nispa (Efesios 5:33). Munanakusqaykichis respetanakusqaykichismi yanapasunkichis uyarinakunaykichispaq. ¡Yaqapaschá pay hinaraq piensapunkipas! Cameron nin: “Ñawpaqpiqa manan esposaypa gustonkuna gustawaqchu, qhepamanmi ichaqa gustapuwarqan”, nispa (Bibliaq yachachikuynin: Génesis 2:18).