Yuyaymanay

¿Imatan nikun “yuyaymanay” nispa?

“Tukuy ruwasqankunapin yuyaymanasaq, ruwasqankunatan yuyarisaq” (Salmo 77:12)

¿IMA NINKUN RUNAKUNA?

Runakunaqa imaymanatan ruwanku “kaymi yuyaymanay” nispa. Wakinqa huk religionkunaq ruwasqankutan qatikunku. Huk qelqaq runa chaymanta nirqan: “Yuyayniykiqa ch’usaq kanan, manan imapipas piensanaykichu”, nispa. Chay runa hinan wakinqa ninku “sichus yuyayniyki ch’usaq kanqa wakin simikunallapitaq otaq dibujokunallapitaq piensanki chayqa thakmi sientekunki” nispa.

¿IMA NINMI BIBLIA?

Bibliaqa kallpachawanchismi yuyaymanananchispaq (Josué 1:8). Ichaqa manan niwanchischu “yuyayniykin ch’usaq kanan otaq huk simita thawtispan kanayki” (mantra) nispaqa. Aswanpas Bibliaqa yuyaymanaymanta rimaspaqa allin kaqkunapi allinta yuyaykuymantan rimashan, wakinqa kanman Diospa kamachikuyninkunapi, kamasqankunapi, imayna Dios kasqanpipas. Diospa huknin siervonmi nirqan: “Tukuy ruwasqaykikunatan yuyaymanani, makiykiq ruwasqankunatan qhawarini”, nispa (Samo 143:5). Nillarqantaqmi: “Puñuykuspaymi yuyariyki, tutakunapin yuyaymanayki”, nispa (Salmo 63:6).

¿Allinniykipaqchu kanman yuyaymanay?

“Chanin runaqa allintan yuyaykun kutichinanpaq” (Proverbios 15:28)

¿IMA NINMI BIBLIA?

Bibliaq nisqanman hina yuyaymanasun chayqa, aswan allin runamanmi tukupusun, imatapas ruwananchispaq kallpachasqa sientekusun, caracterninchispas allinmi kanqa. Chaykunataq yanapawasun allin yuyaywan imatapas rimananchispaq ruwananchispaq ima (Proverbios 16:23). Hinaspapas kusisqan kawsasunchis, Diospi yuyaymanaq runamantan Salmo 1:3 texto nin: “Payqa mayu patapi sach’a hinan, tiempollanpi ruruq sach’a hinan, raphinpas q’omerllapunin kashan. ¡Imapas ruwasqanqa allillanpunin!”, nispa.

Chaymantapas yuyaymanayqa yanapawanchismi allin entiendeq kananchispaq, yachasqanchista umallanchispi hap’inanchispaqpas. Kaywan entiendesun: Bibliata otaq Diospa kamasqankunata estudiaspaqa imaymanatan yachanchis. Ichaqa chaykunapi yuyaymanasun chayqa, reparasunmi imaynatachus chaykuna ñawpaq yachasqanchiskunawan tupasqanta. Wasita hatarichiqkunaqa ladrillokunatan cementowan k’askachinku, chay hinatan sichus sapanka estudiasqanchispi yuyaymanasun chayqa aswan yachayniyoq kapusun.

¿Imakunapin mana yuyaymanananchischu?

“Runaq sonqonqa tukuy imamantapas aswan q’otukuqmi, millay ruwaqtaq kanpas, ¿pitaq chay sonqotari reqsinman?” (Jeremías 17:9)

¿IMA NINMI BIBLIA?

“Runakunaq sonqonmantaqa lloqsimun: mana allin yuyaykuna, wasanchaykuna, qhelli huchapi puriykuna, runa wañuchiykuna, suwakuykuna, munapakuykuna, millay kaykuna, q’otuykuna, mana p’enqarikuykuna [...], mana yuyayniyoq kaykunapiwan” (Marcos 7:21, 22). Ima yuyaykusqanchispas ninamanmi rikch’akun, sichus mana controlasunchu chayqa millay kaqkunapin yuyaymanayta qallarisunman hinaspataq huchaman urmasunman (Santiago 1:14, 15).

Chayraykun Bibliaqa kallpachawanchis “tukuy cheqaqkaqpi, tukuy allinkaqpi, tukuy chaninkaqpi, tukuy ch’uyakaqpi, tukuy sumaqkaqpi, tukuy allin qhawarinapaq kaqpi” ima yuyaykunanchispaq (Filipenses 4:8, 9). Sichus allin kaqkunallapi yuyaykusun chayqa allin runamanmi tukupusun, rimayninchisqa ancha sumaqmi kanqa, hukkunawanpas allintan kawsasun (Colosenses 4:6).