Yuyaymanaymi yanapawasun Diosta servishanallapaq
1. ¿Iman Jesusta yanaparqan kay pachaman imapaq hamusqanta mana qonqananpaq?
1 Jesusqa tardenmanta ch’isinkaman onqosqakunata hampisharqan, supaykunatapas runakunamanta qarqosharqan. Paqaristinmi qatikuqninkuna maskharqanku, tarispataq nirqanku: “Lliw runan maskhashasunki”, nispa, chaytaqa nisharqanku milagrokunata ruwashanallanta munaspan. Jesusmi ichaqa imapaq hamusqanpi yuyaykuspa, nirqan: “Hakuchis qaylla llaqtakunata, chaypipas Diospa siminta willamunaypaq, chaypaqmi kay pachamanqa hamurqani”, nispa. ¿Iman payta yanaparqan kay pachaman imapaq hamusqanta mana qonqananpaq? Tutallamanta hatarispa yuyaymanasqanmi Diosmanta mañakusqanpiwan (Mar. 1:32-39). ¿Ñoqanchistari, imakunapi yuyaymanaymi yanapawasun?
2. ¿Imakunapin yuyaymanasunman Diosta tukuy sonqowan servishanallanchispaq?
2 ¿Imakunapin yuyaymanananchis? Jesusmi runakunata rikusqa “mana michiqniyoq ovejakunata hina wikch’usqata, ch’eqechisqata” (Mat. 9:36). Ñoqanchispas yuyaymanasunmanmi p’uchukay tiempokuna kasqanpi, runakuna allin willakuykunata uyariy necesitasqankupipas (1 Cor. 7:29). Yuyaymanasunmanmi Diospa ruwasqankunapi, Jehová Dios imayna kasqanpi, paypa Testigonkuna kasqanchispi, Bibliapi ancha sumaq yachaykuna yachasqanchispipas (Sal. 77:11-13; Isa. 43:10-12; Mat. 13:52).
3. ¿Ima horaskunapin yuyaymanasunman?
3 ¿Ima horaskunapin yuyaymanasunman? Wakinqa Jesús hinan tutallamanta hatarinku ch’inpi yuyaymananankupaq. Hukkunataq ch’isinta yuyaymananku manaraq puñushaspa (Sal. 63:6). Imaymana ruwanayoqña kasunman chaypas kanpunin tiempo yuyaymananapaq. Wakinqa viajashaspan yuyaymananku, hukkunataq sapallanku mikhushaspa. Wakin cristianokunan ninku predicaq lloqsinankupaq huk ratollapas yuyaymanasqanku tukuy sonqowan predicanankupaq yanapasqanta.
4. ¿Imaraykun yuyaymanananchis?
4 Yuyaymanay Diosmanta mañakuypiwanmi yanapawasun Jehová Dios yupaychayta ñawpaqman churananchispaq, tukuy sonqowan servishanallanchispaq ima. Yuyaymanayqa anchatan Jesusta yanaparqan, chhaynaqa ¿manachu ñoqanchistapas yanapawasunman?