FAMILIAKUNAPAQ YANAPAYKUNA | CASARASQAKUNAPAQ
Qolqe gastaymanta
¿IMAPIN WAKIN TARIKUNKU?
Yaqapaschá pisi tiempollaraq casarasqa kashankichis, qolqeykichistaq t’oqo bolsamanta hina pisiyapushan. ¿Pin huchayoq chhaynapi tarikusqaykichismanta? Ama niychischu “qosaymi otaq esposaymi huchayoq” nispaqa. Aswanpas iskayniykichis allinta reparaychis imaraykuchus chhaynapi tarikusqaykichista.a
¿IMAYNAPIN QALLARIN?
Casarasqa kawsayman haykusqaykichisrayku. Tayta-mamaykichiswan kawsarqankichis chayqa, manapaschá yachasqachu kashankichis facturakunata pagayman nitaq iskayniykichispi piensaspa gastanaykichispaqpas. Chaymantapas yaqapaschá hukniykichis qolqe gastayllata munan hukniykichistaq qolqe waqaychayllata. Qolqeta allinta utilizaytaqa manan usqhayllachu yachankichis.
Qolqe manu kayqa mana allin qora hinan, hinallata qhawasun chayqa astawanmi wiñanqa
Imatapas qhepapaqña saqesqaykichisrayku. Jim sutiyoq empresarion willarqan chayllaraq casarakuspa askha qolqeta gastasqanta. Paymi nirqan: “Facturaykunata qhepataña pagasqayrayku interesllantaraq waranqanpi paganay karqan. Hinan ch’usaq bolsillo qhepakapurqayku”, nispa.
Mana rikukuq qolqe. Tarjetakunawan otaq internet yanapayninwan imatapas rantinkichis chayqa, ratollan qolqeykichista gastapuwaqchis, ¿imarayku? Tarjetakunawan rantispaqa manan qolqeykita rikunkichu. Chaymantapas cuidakunaykichismi manullapi imatapas rantinaykichismanta.
Imaraykuña chaykunapi tarikunku chaypas, qolqemanta problemakunan astawanqa casarasqakunata llakichin. Huk libron nin: “Askha qolqeyoqña otaq pisi qolqeyoqña kanku chaypas, yaqa llapa casarasqakunan ninku qolqerayku astawanqa problemakunapi tarikusqankuta”, nispa.
KAYTAN RUWAWAQCHIS
Yanapanakuychis. Huchachanakushanaykichismantaqa kallpachakuychis qolqeta allinta utilizanaykichispaq. Chaymantapas kallpachakuychis qolqerayku ama t’aqanasqa hina kanaykichispaq (Bibliaq yachachikuynin: Efesios 4:32).
Gastasqaykichismanta huk listata ruwaychis. Chay listapi anotaychis huk killapi imakunapichus gastasqaykichista. Chaypin reparankichis imakunapichus astawan gastasqaykichista, chaytaq yanapasunkichis qolqeykichista allinta utilizanaykichispaq.
Huk killapi hayk’a qolqe gastanaykichismanta huk listata ruwaychis, chaypin kanman mikhunapaq, p’achapaq, alquilerpaq, hukkunapaqpas. Hinaspapas qelqallaychistaq sapankapi hayk’atachus gastanaykichista (Bibliaq yachachikuynin: Lucas 14:28).
‘Manuqqa manukuqninkunatan kamachin’ (Proverbios 22:7)
Sapa killa sapanka gastopaq qolqeykichista t’aqaychis (mikhunapaq, alquilerpaq, hukkunapaqpas). Wakinqa sobrekunapin qolqeta churanku, chaypitaq qelqanku “mikhunapaq” otaq “alquilerpaq” nispa.b Sichus mayqen sobrepas ch’usaqyarqapun chayqa, manañan gastankuñachu otaq huk sobremanta qolqeta horqonku.
Allin yuyayniyoq kaychis. Kusisqa kawsananchispaqqa manan valorniyoq kaqkunatachu rantinanchis. Jesusmi nirqan: “Runaq kawsayninqa manan askha kaqniyoq kaspallachu allin kanqa”, nispa (Lucas 12:15). Jesuspa nisqanpi confiankichis chayqa, allin yuyaywanmi qolqeykichista utilizankichis (Bibliaq yachachikuynin: 1 Timoteo 6:8).
Cambiokunata ruwaychis. Aaron runaqa iskay watañan casarasqa kashan, paymi nirqan: “Ñawpaqpiqa restaurantepin mikhuq kayku, televisionpi askha canalkunayoq kanaykupaqpas pagaqmi kayku, qhepamanmi ichaqa repararqayku sinchita gastasqaykuta. Chaymi qolqeykutaqa manaña tukuy munasqaykupichu gastanayku karqan”, nispa.
a Chayllaraq casarasqakunamantaña rimasun chaypas, kaypi yachachikusqanqa llapa casarasqakunapaqmi.
b Sichus tarjetawan otaq Internetninta pagankichis chayqa, huk hojapi imapichus gastasqaykichista qelqaychis, chaytataq sobreman churaychis.