Disculpakuy sasa kaqtin

¿IMAPIN WAKIN TARIKUNKU?

Wakinqa qosankuwan otaq esposankuwan discutisqanku qhepamanmi ninku: “Manan imamantapas disculpakunay kanchu, acaso ñoqachu qallarirqani”, nispa.

Wakinqa hukpa sonqonta k’irispan mana imatapas ninkuchu, disculpakuytan piensanku ichaqa manan “disculpaway” nispa niyta atinkuchu.

¿IMAYNAPIN QALLARIN?

Hatunchakuy kaqtin. Carlosmia nin: “Mayninpiqa manan esposaymanta disculpakuyta atinichu hatunchakusqayrayku”, nispa. Hatunchakuqkunapaqqa pantasqankuta reconoceyqa pisichakuymi.

Imaynata piensasqanku. Yaqapaschá ninki: “Manan ñoqachu pantarqani, chaychu disculpakuyman”, nispa. Sara nin: “Imamantapas ñoqa huchayoq kaspaqa ratollan qosaymanta disculpakuni. Iskayniyku huchayoq kaqtiykun ichaqa sasa chayta ruway. Iskayniykumá rimaspaqa pantarqayku riki, imaraykutaq disculpakuymanri”, nispa.

Yaqapaschá seguro kashanki tukuy imapas pasasqanmanta esposayki otaq qosayki huchayoq kasqanmanta, chayraykutaq mana disculpakuyta munankichu. José nin: “Manataq ñoqachu huchayoq kani chayqa, disculpakuqtiyqa ñoqapas huchayoq kayman hinachá kanman”, nispa.

Imayna uywasqa kasqanku. Yaqapaschá familiaykipiqa mana disculpakuyta yachankuchu, chayraykutaq sasa huchaykita reconocey. Sichus pipas huch’uy kashaspa mana yacharqanchu disculpakuyta chayqa, hatunña kaqtinqa sasan kanqa chayta ruway.

KAYTAN RUWAWAQ

Parejaykipi piensay. ¿Yaqachu pipas disculpata mañakurqasunki? Chaywanqa allinchá sientekurqanki. Parejaykimanta disculpakuqtiykiqa paypas allinmi sientekunqa. Yaqapaschá ninki: “Manan ima mana allintapas ruwanichu, manan yuyaypichu chhaynataqa sientechini”, nispa, ichaqa imachus ruwasqaykiwanmi parejaykiqa k’irisqa kashan, chaymi disculpata mañakuqtiykiqa k’irinta hampinki (Bibliaq yachachikuynin: Lucas 6:31).

Casado vidaykipi piensay. Disculpakuspaqa manan qanchu atipasqa kanki, aswanpas casado vidaykipi problematan atipashanki. Biblia nin: “Phiñachisqa wawqeman asuykuyqa aswan sasan perqawan muyuchisqa llaqtaman haykuymantaqa”, nispa (Proverbios 18:19). Iskayninkuchus mana reconocenqaku huchankuta chayqa, sasapunin allipunayqa kanqa. Ichaqa disculpakuspaqa problemakunatan ratolla allichakun. Chhaynapin rikuchinki casado kawsayniyki aswan importante kasqanta, manataq hatunchakuychu (Bibliaq yachachikuynin: Filipenses 2:3).

Ama tiempota pasachiychu. Sichus piensanki mana llapanpichu huchayoq kasqaykita chayqa sasan disculpata mañakuyqa. Parejaykiña mana allinta ruwan chaypas, manan chayraykuchu kaqllatataq ruwanayki. Ama niychu “tiempowanqa qonqapullanqan” nispaqa. Kaq rato disculpakunki chayqa parejaykipas kaqllatataqmi ruwanqa (Bibliaq yachachikuynin: Mateo 5:25).

Sonqomanta disculpakuy. Imatapas imarayku ruwasqaykita willayqa manan disculpakuychu. “Ay, mana ima niynamá kashasqanki” niypas manan disculpakuychu. Yaqapaschá ninki “manamá malta sientekunanpaq hinachu nini” nispa; ichaqa parejayki k’irisqa kashan chayqa, reconocey mana allinta sientechisqaykita.

Llapanchismi pantanchis. Humildekunaqa chhayna kasqankutan reconocenku. Sichus ninki “manan huchaychu kayqa karqan” nispa chayqa, qanllapi piensaspan chay problemata qhawarishanki. Biblian nin: “Chaninmanmi rikch’akun ñawpaqta quejakuqpa rimasqanqa, awqan chayamuspataq mana hina kasqanta sut’inchan”, nispa (Proverbios 18:17). Sichus reconocenki qanpas pantaq kasqaykita chayqa faciltan disculpata mañakunki.