4 Perdonakuqmi kanaykichis

¿IMAYNAN PERDONAKUQ RUNA?

Perdonakuq runaqa manan phiñasqallachu kashan pay contra imatapas ruwaq runawan. Ichaqa manan chayraykuchu payqa ninqa: “Ruwawasqanqa manan imapaschu karan”, nispaqa.

BIBLIAPIN NISHAN: “Qankunapura paciencianakuychis, perdonanakuychis razonwanña pipaqpas phiñasqa kashankichis chaypas”, nispa (Colosenses 3:13).

Aaronmi nin: “Qosaykita otaq esposaykita munakunki chayqa, manan mana allin ruwasqanpichu sapa kutilla piensanayki, aswanpas allin ruwasqankunapin”, nispa.

¿IMARAYKUN PERDONAKUQ KANAYKI?

Qosaykiwan otaq esposaykiwan phiñasqalla kashanki chayqa, manan paywan thajpichu kausanki, chaymantapas llakikuymantan onqoytaraq tariwaq.

Julian nin: “Juj kutinmi qosaypa mana allin ruwawasqan sinchita sonqoyta k’iriwaran, paymi ichaqa ‘perdonaway’ nispa niwaran, noqan ichaqa mana usqhaychu payta perdonarani. Chaymi askha p’unchaykuna llakisqa tiyarayku”, nispa.

¿IMAKUNATAN RUWAWAQ?

KAYKUNATAN TAPUKUNAYKI

Kaykunatan tapukunayki qosayki otaq esposayki sonqoykita k’iriqtin:

• ¿Ratullachu imamantapas phiñakuni?

• ¿“Perdontaraq mañakuwachun” nispachu nini icha ratuchu qonqapuni ima niwasqantapas?

WARMI-QHARI PARLARIYCHIS

• ¿Imawanpas phiñachinakuspa usqhayllachu perdonanakunchis icha unaypiraqchu?

• ¿Imatan ruwasunman usqhaylla perdonanakunanchispaq?

KAYKUNATAN RUWAWAQ

• Qosayki otaq esposayki sonqoykita k’irirusunki chayqa manan ninaykichu: “Yuyaypin kaytaqa ruwawan”, nispaqa.

• “Llapanchispas pantanchispunin imallapipas”, chaymi qosaykita otaq esposayki entiendenayki (Santiago 3:2).

Katia nin: “Iskayninchis juchayoq kanchis chayqa facil-llatan perdonanakunchis, jujnillanchis pantaruqtinchismi ichaqa sasata payta perdonasunman. Chaypaqqa sonqomanta k’umuykukuq runapunin kananchis”, nispa.

BIBLIAPIN NIWANCHIS: “Quejakuqniykiwanqa ñanllapiraq kashaspayki usqhaylla paywan allichapuy”, nispa (Mateo 5:25).