Jobqa Diospaq hunt’aq runan

¿MANACHU llakikunki kay onqosqa runata rikuspa? Jobmi sutin, chay warmitaq paypa warmin. ¿Ima nishanmi Jobta? ‘Diosta ñakaspa wañuy,’ nishanmi. Kunanmi yachasun ima raykun chhaynata rimaran, ima rayku Job ñak’arisqantapas.

Jobqa hunt’aranmi Jehová Diospa kamachisqanta. Payqa tiyaran Uz llaqtapin Canaán suyuq qayllanpi. Jehová Diosqa anchatan munakuran Jobta, karanmi ichaqa cheqnikuqnin. ¿Pin Jobta cheqnikuran?

Saqra Satanasmi. Yuyariy, Satanasqa Jehová Diosta cheqnikuq millay angelmi. Paymi kallpacharan Adantapas Evatapas Jehová Diosta mana kasukunankupaq, chaymi payqa yuyaykuran llapa runatapas Diosmanta karunchachiyta. ¿Atiranchu? Manan. Yuyashankichu hunt’aq qharikunamanta, warmikunamanta yachasqanchista. ¿Niwaqchu sutinkuta?

Jacobpas Josepas Egipto suyupi wañupusqanku qhepamanqa, Jobmi karan allpantinpi aswan hunt’aq runa. Jehová Diosqa Satanasmanmi rikuchiyta munaran mana llapa runachu millay kasqanta, chaymi niran: ‘Qhawariy Jobta. Payqa tukuy sonqonwanmi serviwan,’ nispa.

Satanastaq kutichiran: ‘Payqa kasusunki imaymana qosqayki raykullan. Kaqninkunata qechuqtiykiqa ñakasunkin,’ nispa.

Chay raykun Jehová Diosqa niran: ‘Munaspaqa qechumuy. Ima munasqaykitapas ruwamuy. Chaypin yachasun ñakawanqachu icha manachu chayta. Aman ichaqa wañuchinkichu,’ nispa.

Ñawpaqtaqa Jobpa camellonkunata, wakankunata runakunawan suwachiran, ovejankunatataq wañuchiran. Chunkantin wawankunatapas wayrawanmi wañuchiran. Chaymantan Jobta onqochiran kay millay onqoywan. Anchatan Jobqa ñak’ariran. Chaymi warminqa niran: Diosta ñakaspa wañuy,’ nispa. Jobmi ichaqa mana munaranchu. Kinsa runakunan risqaku amigonman tukuspa, paykunapas nirankun mana allin ruwasqaykimantan ñak’arishanki, nispa. Chaywanpas Jobqa hunt’aq runan karan.

Chayqa anchatan kusichiran Jehová Diosta, chaymi Jobta samincharan, dibujopi rikusqayki hina. Onqoyninmanta qhaliyachiran. Hukmantan Jobqa chunka sumaq wawakunayoq karan, wakankunapas, ovejankunapas, camellonkunapas ñawpaqmantaqa iskay kutitaraqmi yapakuran.

¿Job hinachu qanpas Diosman hunt’aq runa kanki? Chhayna kaqtiykiqa qantapas Diosqa saminchasunkin. Wiñaypaqmi kay Allpapi kawsanki Edén hina sumaq huerta kapuqtin.