¿Pin Job karqan?

Uz llaqtapin Diosta adoraq runa tiyarqan, sutinmi karqan Job. Payqa askha familiayoq qhapaq runan karqan. Jinaspapas sumaq runan karqan, wajchakunata, viudakunata, mana tayta-mamayoq wawakunata iman yanaparqan. Ichaqa, ¿chayraykuchu mana sufrirqan?

Jobqa manan yacharqanchu Satanás payta qhawamushasqanta. Jehová Diosmi Satanasta nirqan: “¿Rikushankichu kamachiy Jobta? Manan pipas pay jinaqa kanchu. Payqa kasukuwanmi, allintan portakunpas”, nispa. Satanastaq nirqan: “Yanapasqaykiraykullan kasukusunki, jallp’anpas animalninkunapas askhan. Llapanta qechuruwaq chayqa manañan adorasunkimanchu”, nispa. Jehová Diostaq nirqan: “Pruebay imawanpas, ichaqa ama wañuchinkichu”, nispa. ¿Imaraykun Jehová Dios dejallarqan Job probasqa kananta? Payqa yacharqanmi Jobqa probasqaña kaspapas kasukushanallanta.

Satanasqa Jobtan imaymana pruebaman churarqan. Ñaupaqtaqa Seba runakunan uywankunata asnonkunatawan suwarqanku. Ovejankunatataq ninawan ruphachirqan. Caldea runakunataq camellonkunata suwarqanku. Uywankunata michiq runakunapas wañuchisqan karqanku. Jinaspapas Jobpa wawankunan wañupurqanku wasiq ñit’isqan. Chaykunawanmi Jobqa sinchita llakikurqan, chaywanpas servishallarqanmi Diosta.

Satanasqa astawanmi Jobta llakichiyta munarqan, chaymi llapa cuerponta sarna jina onqoywan jap’ichirqan. Chaywanqa nishutan ñak’arirqan, manan yacharqanchu imarayku chaykuna payta pasashasqanta, chaywanpas adorashallarqanmi Jehová Diosta. Chayta rikuspan Diosqa anchata kusikurqan.

Chay qhepamanmi Satanasqa kinsa runakunata kacharqan Jobta pruebaman churanankupaq. Paykunan Jobta nirqanku: “Juchallikurqankichá, jinaspa juchaykita pakayta munashanki. Chaymi Diosqa castigashasunki”, nispa. Jobtaq nirqan: “Manan ima mana allintapas ruwanichu”, nispa. Chay qhepamanmi Jobqa nirqan: “Diosmi kay llakiman churawan, mana chanintan kaytaqa ruwawan”, nispa.

Elihú waynataq ch’inlla uyarisharqan rimasqankuta. Chaymantan ichaqa nirqan: “Llapaykichismi mana allintachu rimashankichis. Jehová Diosqa ancha sumaq Diosmi, payqa manan jayk’aqpas mana allintaqa ruwanmanchu. Tukuytan payqa rikumushan, yanapantaqmi llakikuypi tarikuq runakunatapas”, nispa.

Chay qhepamanmi Jehová Diospas Jobta nirqan: “¿Maypin kasharqanki jallp’atapas cielotapas ruwashaqtiy? ¿Imaraykun ninki: Diosmi mana allinta ruwawashan, nispa? Mana allinta yachaspan rimashanki”, nispa. Jobqa reqsikurqanmi pantasqanta, jinaspa nirqan: “Pantasqatan rimarqani, perdonaykuway rimasqaymanta. Uyarirqanin qanmanta, kunanmi ichaqa allinta reqsiyki, qanpaqqa manan imapas mana atikuqqa kanchu”, nispa.

Chay qhepamanmi Diosqa Jobta qhaliyachirqan, ñaupaqpi qhapaq kasqanmantapas aswantaraqmi qhapaqyachirqan. Askha watakunataqmi kusisqa kausarqan. Jehová Diosmi bendecirqan kasukuq kasqanmanta. ¿Qanri? ¿Job jinachu Diosta adorashallanki ima llakipiña tarikuspapas?