Qori torillo

¡AMAYÁ! ¿Imatan kay runakuna ruwashan? ¡Torillomanmi mañakushanku! ¿Ima raykun chayta ruwashanku?

Orqopi unay tiempo Moisés qhepakuqtinmi, runakuna nin: ‘Manan yachanchischu Moisesta ima sucedesqanta. Huk diosta ruwakusun kay allpamanta horqowananchispaq,’ nispa.

Moisespa wayqen Aaronpas ninmi: ‘Chhaynaqa, qorimanta areteykichista horqokuspa apamuychis,’ nispa. Chaykunata apaqtinkun Aaronqa qorita unuyachispa torillota ruwan. Chaymi runakunaqa ninku: ‘¡Kaymi Diosninchis, Egipto suyumanta horqomuwaqninchis!’ nispa. Hatun fiestata ruwaspataq qori torillota yupaychanku.

Kayta rikuspan Jehová Diosqa sinchita phiñakun. Moisesta nin: ‘Usqhayta uraykuy. Llaqtan mana allinkunata ruwashan. Kamachisqay simikunata qonqaspan qori torillota yupaychashanku,’ nispa.

Moisesqa usqhayllan uraykun orqomanta. Qayllaykuqtintaq rikun ¡torilloq muyuriqninpi takispa tususqankuta! Chaywan sinchita phiñakuspan Moisesqa p’alta rumikunapi qelqasqa kamachikuykunata pampaman ch’aqen, rumikunataq p’akikun. Hinaspan torillota hap’ispa ninapi unuyachiran. Ñut’umantaq tukuchiran.

Manan allinchu llaqtaq ruwasqanqa. Chay raykun Moisesqa wakin runakunata kamachin espadankuta hap’inankupaq. ‘Torillota yupaychaq millay runakunan wañunanku,’ nispan nin. ¡Chay raykun 3.000 runakunata wañuchinku! Kaymi yachachiwanchis Jehová Diosllata yupaychananchispaq, mana huk dioskunatachu.