Manan junt’arqankuchu rimasqankuwan

Jehová Diosmi Moisesta nirqan: “Orqoman wichamuy, kamachikuyniykunatan iskay p’alta rumipi qelqaspa qosayki”, nispa. Moisesqa orqoman wichaspan 40 p’unchayta qhepakamurqan. Chaypin Diosqa chunka kamachikuykunata iskay p’alta rumipi qelqaspa Moisesman qorqan.

Israel runakunaqa Moisés saqerparinanpaqmi piensarqanku. Chaymi Aaronta nirqanku: “¡Juj umalliqtan necesitashayku. Juj diosta ruwapuwayku!”, nispa. Aarontaq nirqan: “Qorita apamuwaychis”, nispa. Jinan qorita unuyachispa juj torillota ruwarqan. Runakunataq nirqanku: “¡Kaymi Diosninchisqa, Egiptomanta pusamuwaqninchisqa!”, nispa. Fiestata ruwaspankun qori torillota adorayta qallarirqanku. ¿Chay ruwasqanku juchachu karqan? Arí, llapankupas Jehová Diosllata adoranankupaqmi prometekurqanku. Ichaqa manan rimasqankuwan junt’arqankuchu.

Jehová Diosqa rikumusharqanmi ruwasqankuta, chaymi Moisesta nirqan: “Llaqtaman uraykuy, mana kasuwaspankun juj idolota adorashanku”, nispa. Jinan Moisesqa orqomanta uraykamurqan iskaynin p’alta rumita aparikamuspa.

Chayamushaspan uyarirqan runakunaq takisqanta. Jinaspa rikurqan tusushasqankuta torillota adorasqankutawan. Chaymi Moisesqa sinchita phiñakuspa iskaynin p’alta rumikunata chanqarqan, jinan p’akikurqan. Kaq ratun chay idolota thunirqan, Aarontataq tapurqan: “¿Imaraykun convencechikurqanki kay idolota ruwanaykipaq?”, nispa. Aarontaq nirqan: “Ama phiñakuychu, yachanki llaqtanchis imayna kasqanta, juj diostan munarqanku, jinan qorita ninaman wijch’uykuqtiy kay torillo lloqsimurqan”, nispa. Aaronqa manan chayta ruwananchu karqan. Moisesqa jujmanta orqoman wichaspan Jehová Diosta valekurqan llaqtanta perdonananpaq.

Diosqa perdonarqanmi kasukuyta munaq Israel runakunata. Paykunaqa Moisestan kasukunanku karqan, chay ruwayqa ancha importanten karqan ¿riki?