Rimaq asno

¿HAYK’AQLLAPAS uyarirankichu rimaq asnomanta? ‘Manan,’ ninkichá. ‘Animalkunaqa manan rimanchu.’ Biblian ichaqa willawanchis rimaq asnomanta. ¿Imaynapin chay sucederan?

Israelitakunaqa ñan haykunqakuña Canaán suyuman. Moabpi kamachiq Balacmi israelitakunata manchakun. Chay raykun waqyachin yuyaysapa Balaam runata, israelitakunata ñakananpaq. Askha qolqetan munachin chaymi Balaamqa asnonpi sillakuspa Balaacwan tupaq rin.

Manan Jehová Diosqa munanchu Balaam llaqtanta ñakananta. Chay raykun angelta kachan hatun espadayoqta ñanpi Balaamta hark’ananpaq. Balaamqa manan rikunchu angelta, asnonmi ichaqa rikun. Asnoqa angelmantan ayqekuyta munan, mana atispataq ñanpi thallaykun. Sinchita phiñakuspan Balaamqa k’aspiwan asnonta p’anan.

Chaymi Jehová Diosqa Balaamman uyarichin asnoq rimasqanta. ‘¿Imanaykin khaynata p’anawanaykipaq?’ nispan asno Balaamta tapun.

Balaammi nin: ‘Chansakuwashankin. ¡Espaday kaqtinqa wañuchiykimanmi!,’ nispa.

‘¿Hayk’aqllapas khaynata ruwaraykichu?’ nispan asno tapun.

‘Manan,’ Ninmi Balaamqa.

Chaymi Jehová Diosqa Balaamman rikuchin espadayoq angelta ñanpi sayashaqta. Angelmi nin: ‘¿Ima raykun asnoykita p’ananki? Purinayki ñanta hark’anaypaqmi hamuni, manan rinaykichu Israel llaqta ñakaq. Manachus asnoyki ñoqamanta hark’asunkiman karan chayqa, wañuchiykimanmi karan, asnoykitan ichaqa mana imanaymanpaschu karan,’ nispa.

Balaammi nin: ‘Huchallikunin. Manan yacharanichu ñanpi kasqaykita,’ nispa. Chaymi angelqa manaña Balaamta hark’anchu, Balaamtaq Balacpata rin. Balaamqa munanraqmi Israel llaqta ñakayta, Jehová Diosmi ichaqa kinsa kutita Israelta saminchachin.