China asno riman

Israel runakunaqa 40 watañan ch’inneqpi purisharqanku. Askha llaqtakunatañan atiparqanku. Kunantaq Moab llaqtaq qayllanpi kasharqanku, pisillaña faltasharqan Diospa prometesqan jallp’aman jaykunankupaq. Moab llaqtaq reynin Balacmi manchakurqan jallp’anta Israel runakuna qechunanmanta. Jinan Balaamta valekurqan Moabman jamuspa Israel runakunata ñakananpaq.

Jehová Diosmi ichaqa Balaamta nirqan: “Aman Israel runakunataqa ñakankichu”, nispa. Chaymi Balaamqa Moabman mana riyta munarqanchu. Jinan rey Balacqa jujmanta valekurqan, nirqantaq: “Ima munasqaykita qosayki”, nispa. Balaammi ichaqa mana kasurqanchu. Jinan Diosqa Balaamta nirqan: “Riwaqmi, ichaqa imachus nisqallaytan rimanki”, nispa.

Chaymi Balaamqa china asnonpi Moabman rirqan. Payqa munarqanpunin Israel runakunata ñakayta, Diosña mana munarqanchu chay ruwananta chaypas. Chaymi Diospa angelninqa kinsa kutita purisqan ñanpi rijurirqan. Balaamqa manan rikurqanchu angelta, asnonmi ichaqa rikurqan. Chaymi asnoqa angelmanta ayqekunanpaq ñanmanta lloqsirqan. Chaymantataq Balaampa chakinta rumi perqaman ñit’irqan. Ultimotataq asnoqa ñanpi thallarparirqan. Chaykaman Balaamqa asnonta k’aspiwan waqtarqan.

Chayllamanmi Jehová Diosqa asnota rimachirqan. Jinan asnoqa Balaamta nirqan: “¿Imanarqaykin waqtawanaykipaq?”, nispa. Balaamtaq nirqan: “Noqamantan burlakuwashanki. Espaday kashanman chayqa, sipiruykimanñan”, nispa. Asnotaq nirqan: “Unayñan sillakuwanki, ¿jayk’aqllapas kayta ruwarqaykichu?”, nispa.

Chay qhepamanmi Balaamqa angelta rikurqan. Angelmi nirqan: “Jehová Diosmi nirqasunki Israelta ama ñakanaykipaq”, nispa. Balaamtaq nirqan: “Pantanin kayta ruwaspay, wasiyman kutipusaq”, nispa. Angelmi ichaqa nirqan: “Rillay Moabta, ichaqa Diospa nisqallantan rimanki”, nispa.

¿Kasukurqanchu Diosta? Manan, aswanpas kinsa kutipin Israel llaqtata ñakayta munarqan. Diosmi ichaqa ñakasqanta bendicionman tukuchirqan. Chay qhepamanmi Israel llaqtaqa Moab runakunata wañuchispa Balaamtapas wañuchirqanku. Sichus qallariymantapacha Diosta kasukunman karqan chayqa manan wañunmanchu karqan ¿riki?