Yachayniyoq gabaonitakuna

CANAÁN suyupi askha llaqtakunan allichakushanku Israelwan maqanakunankupaq. Paykunaqa atipanankupaqmi yuyaykunku. Gabaón llaqtapi runakunan ichaqa mana chhaynatachu yuyaykunku. Paykunapaqqa Diosmi yanapashan israelitakunata, chay raykun mana munankuchu Dioswan maqanakuyta. ¿Imatan ruwanku gabaonitakuna?

Karu llaqtamantapas kankuman hinan reqsichikuyta munanku. Chaypaqmi churakunku thanta p’achata, mawk’a usutakunatapas. Asnonkupi thanta costalkunapi q’epinku, t’antatapas ch’akillataña unay waqaychasqata apanku. Chaymi Josueman rispa ninku: ‘Sinchi karu suyumantan hamuyku, uyariykun Jehová Diosniykichismanta. Qankuna rayku Egipto suyupi imaymana ruwasqantapas. Chaymi llaqtaykupi umalliqkuna kamachimuwanku mikhunata aparikuspa llaqtaykichisman hamuspa kayta ninaykupaq: “Kamachiykikunan kayku. Prometewayku ñoqaykuwan mana maqanakunaykichispaq.” Qhawariychis p’achaykuta, unay tiempo purimusqaykupin thantakun, t’antaykupas ch’akipun,’ nispa.

Josuepas wakin umalliqkunapas creenkun gabaonitakunaq nisqanta. Chay raykun prometeranku paykunawan mana maqanakunankupaq. Kinsa p’unchay qhepatan ichaqa yachanku qayllallankupi tiyasqankuta.

Chaymi Josué tapun: ‘¿Ima raykun niwarankiku karu llaqtamantan hamuyku nispa?’

Gabaonitakunan kutichinku: ‘Willawankun Canaán allpata Jehová Diosniykichis qonasuykichispaq prometesqanta. Chay raykun wañuchiwanaykikuta manchakurayku,’ nispa. Israelitakunaqa manan wañuchinkuchu gabaonitakunata, hunt’ankun rimasqankuta. Aswanmi israelitakunaq kamachin kapuranku.

Jerusalenpi kamachiqmi sinchita phiñakun gabaonitakuna Israelwan hukllachakusqankuta yachaspa. Chaymi tawa kamachiqkunata nin: ‘Hamuychis, yanapawaychis Gabaonwan maqanakunanchispaq,’ nispa. Chaytan ruwanku pisqantin kamachiqkuna. ¿Allin yuyayniyoqchu karanku gabaonitakuna Israelwan hukllachakuspa, pisqantin kamachiqkuna paykuna contra hamushaqtinkupas? Chaymanta yachasun.