Inti sayan

QHAWARIY Josueta. Intitan nishan: ‘¡Inti, ama kuyuriychu!,’ nispa. Intitaq mana kuyurinchu. Huk p’unchaymi Intiqa kaqllapi sayan. ¡Jehová Diosmi chaytaqa ruwan! ¿Ima raykun Josué mana munanchu Intiq haykupunanta?

Canaanpi pisqantin kamachiqkuna Gabaonwan maqanakuyta qallariqtinmi, gabaonitakunaqa Josueman willachinku yanapananpaq. ‘¡Usqhayta hamuy! ¡Yanapawayku! Pisqantin kamachiqkunan contraykupi sayarinku,’ nispa.

Chaymi usqhaylla Josueqa soldadokunantin yanapaq rinku. Tutantinmi purinku. Gabaonman chayaqtinkutaq pisqantin kamachiqkunaq soldadonkunaqa mancharikuspa ayqekunku. Chaymantan Jehová Diosqa hanaq pachamanta hatuchaq chikchita chikchichimuran, chaywanmi aswan askha soldadokunaqa wañunku, Josuepa soldadonkunaq wañuchisqanmantaqa.

Intita qhawarispan Josueqa reparan Intiq haykunanpaq pisillaña kasqanta. Tutayaqtinmi, pisqantin millay kamachiqkunaq soldadonkunaqa ayqekunkuman. Chay raykun Josueqa Jehová Diosmanta mañakuspa nin: ‘¡Inti, ama kuyuriychu!’ Intiqa manan kuyurinchu chaymi israelitakunaqa maqanakuypi atipanku.

Kanraqmi Canaán allpapiqa Diospa llaqtan cheqnikuq millay kamachiqkuna. Soqta watapin Josué soldadokunantin atipan Canaán suyupi 31 kamachikuqkunata. Chay qhepamanmi Josueqa Canaanpi allpata rakin, necesitaq ayllukunaman.

Askha watakuna qhepatañan, Josueqa wañupun 110 watanpi. Paypas amigonkunapas kawsanankukamaqa, llapa israelitakunan Jehová Diosta kasukunku. Paykuna wañuqtinmi ichaqa, israelitakuna mana allinkunata ruwaspa sasachakuykunapi tarikunku. Chaymi israelitakunaqa necesitanku Diospa yanapayninta.