Jefté promesata ruwan

¿HAYK’AQLLAPAS ruwarankichu promesata, hunt’anaykipaqtaq sasa karan? Chaytan ruwaran kay dibujopi rikusqanchis runa, chay raykun sinchi llakisqa kashan. Paymi Jefté, Israelpi mana manchakuq allin Juez.

Jeftepa kawsasqan tiempopiqa manañan Jehová Diostachu israelitakunaqa yupaychanku. Yapamantan mana allinkunata ruwashanku. Chaymi Jehová Diosqa mana yanapanchu Amón runakuna ñak’arichiqtin. Ichaqa Jehová Diostan israelitakuna waqyakunku: ‘Qanpa kamachisqaykita mana kasuspan huchallikuyku. ¡Qespichiwayku!’ nispa.

Israelitakunaqa pesapakunkun mana allinkuna ruwasqankumanta. Chaytan rikuchinku Jehová Diosta yapamanta yupaychaspa. Chay raykun Jehová Diosqa paykunata hukmanta yanapan.

Israelpi runakunan Jefteta akllanku Amón llaqtamanta millay runakunawan maqanakunanpaq. Jefteqa anchatan munan chay maqanakuypi Jehová Diospa yanapananta. Chaymi Jehová Diosman prometen: ‘Atipachiwanki chayqa, maqanakuymanta kutimuqtiy wasiymanta ñawpaq lloqsimuq runatan qanman qosayki,’ nispa.

Jehová Diosqa uyarinmi Jeftepa prometesqanta chaymi yanapan maqanakuypi atipananpaq. Wasinman chayaqtin, ¿pin ñawpaqta lloqsimun Jefteta chaskinanpaq? Sapallan ususinmi. ‘¡Ay, ususilláy! ¡Amayá llakichiwaychu! Ñoqaqa Diosmanmi prometerani, rimasqaytaqa hunt’anaymi,’ nispan Jefteqa waqayta qallarin.

Jeftepa promesanmanta yachaspan, ususinpas llakikullantaq, taytantapas amigonkunatapas saqenanta yachaspa. Payqa wañunankaman Jehová Diosta servinqa Siló llaqtapi. Chaymi taytanta nin: ‘Jehová Diosman prometesqaykitaqa hunt’anaykin,’ nispa.

Chaymi Jeftepa ususinqa ripun Silota, chaypin yupaychana karpapi Jehová Diosta servin wañunankama. Israelpi warmikunan sapa watan tawa p’unchayta visitanku, chaypin llapallanku kallpachanakunku. Lliwmi Jeftepa ususinta munakunku Jehová Diosta serviq allin warmi kasqan rayku.