Jeftepa promesan

Israel runakunaqa Jehová Diosta qhepanchaspan waj dioskunata adorarqanku. Chay dioskunan ichaqa mana jark’aykuyta atirqanchu Anmón runakunamanta. Israel llaqtaqa askha watakunan sufrirqan. Chay qhepamanmi Jehová Diosta nirqanku: “Diosníy, qan contran juchallikuyku, enemigoykumanta salvawayku”, nispa. Jinaspa idolokunata chhalluspanku Jehová Diosta adorarqanku. Chaymi Diosqa manaña munarqanchu sufrinankuta.

Jinan Israel runakunaqa Jefteta ajllarqanku, paymi umallinan karqan Anmón runakunawan maqanakuypi. Jefteqa Diostan prometerqan: “Sichus enemigoykuta atipanaykupaq yanapawankiku chayqa, kutimuqtiy pichus ñaupaqta wasiymanta lloqsimuqtan qanman qopusayki”, nispa. Diosqa uyarirqanmi mañakusqanta, jinan atipachirqan.

Jefté wasinman kutimuqtinmi, sapallan ususin ñaupaqta lloqsimurqan. Payqa tusuykuspa panderetata tocaspan lloqsimurqan. ¿Imatan Jefté ruwarqan? Promesanta yuyarispan nirqan: “¡Ay ususilláy! Qanraqtaqmi kay llakiman churawanki. Jehová Diosmanmi juj promesata ruwarqani, chayta junt’anaypaqmi Siló llaqtaman pusasayki yupaychana karpapi Diosta servinaykipaq”, nispa. Ususintaq nirqan: “Papáy, Diosman prometesqaykitaqa junt’anaykipunin. Ichaqa iskay killata qoway amigaykunawan orqota rinaypaq. Chay qhepamanqa risaqmi yupaychana karpata”, nispa. Jeftepa ususinqa tukuy sonqonwanmi wañupunankama chaypi servirqan. Amigankunapas sapa watanmi Siló llaqtata riqku visitaq.