Waynacha puñurusqa

¡QHAWARIY! ¿Iman kaypi sucedeshan? ¿Nishutachu k’irikunman karan pampapi kaq waynacha? ¡Qhawariy wasimanta lloqsimuq runakunata, hukninqa Pablon! Chaypin kashan Timoteopas, ¿rikushankichu? ¿Ventanamantachu urmaykamuran kay waynacha?

Arí, chaymi suceden. Pablon discursota qosharan Troas llaqtapi qatikuqkunaman. Payqa yacharanmi unay tiempo paykunata mana rikunanta, paqaristinmi huk llaqtaman barcopi ripunan karan. Chaymi kuska tutakama rimaran.

Eutico sutiyoq waynachaqa, ventanapin tiyakusharan, chaymi uyarisqanpi hina puñurapusqa. ¡Kinsa pisopi ventanamantan pampaman urmaykamuran! Chaymi rikusqayki runakunaqa llakisqa kashanku. Waynachata hoqarispankun reparanku ima sucedesqanta. ¡Wañusqan kashan!

Waynachaq wañusqanta rikuspan, Pabloqa wañusqa pataman thallaykuspa marq’arikun. Chaymantan nin: ‘Ama llakikuychischu. ¡Waynachaqa allinmi kashan!,’ nispa. ¡Cheqaqmi! ¡Milagron kayqa! ¡Pablon kawsarichin! Anchatan runakunaqa kusikunku.

Llapankun pataman seqaspanku mikhunku. Pabloqa illarinankaman riman. ¡Manañachá Euticoqa hukmanta puñunchu! Chaymanta Pablopas, Timoteopas, paykunawan riqkunapas barcoman seqanku. ¿Yachankichu may rinankuta?

Predicananpaq kinsa kaq viajentan Pabloqa tukushan. Kay viajenpin Éfeso llaqtapi kinsa wata qhepakusqa. Chay raykun kay viajeqa iskay kaqmanta aswan unayraq.

Troas llaqtamanta lloqsispan barcoqa huk tiempota Mileto llaqtapi sayan. Chay llaqtamanta Éfeso llaqta sispallanpiña kaqtinmi, Pabloqa Éfeso congregacionpi kuraq runakunata waqyachin, Mileto llaqtaman hamunankupaq, manaraq ripushaspa rimapayananpaq. Barco puririqtinmi, ¡anchata llakikunku Pabloq ripusqanta rikuspa!

Cesarea llaqtamanmi Barco kutin. Felipe sutiyoq discipuloq wasinpi Pablo kashaqtinmi profeta Agaboqa nin, Jerusalenman chayaqtinmi Pablotaqa carcelpi wisq’anqaku, nispa. Agaboq nisqan hinan suceden. Cesarea llaqtapi iskay wata carcelpi kaqtinmi, Pablotaqa Romaman apanku chay llaqtayoq Cesarpa juzgananpaq. Yachasun Roma llaqtaman viajashaqtin ima sucedesqanta.