Wawaykikunata yachachiy
¿Maypin mana puñunachu?
ESCUELAPI rikch’asqalla kayqa ancha allinmi, ¿riki? Wakinqa puñurqapunkun, ichaqa sichus imallatapas yachayta munanki chayqa rikch’asqallan kanayki. Chhaynallataqmi Biblia estudianapaq huñunakuykunaman riqtiykipas.
¿Iman yanapasunkiman rikch’asqalla kanaykipaq?a... Yaqapas temprano puñuwaq otaq manaraq huñunakuyman rishaspa huk rato puñuwaq. Bibliapin willan huk waynamanta, paymi apóstol Pabloq discurso qosqanpi puñurqapusqa. ¿Imatan chay willakuymanta yachasunman? Bibliapi maskhay Hechos libropi 20 capitulota 7-12 versiculokama.
Apóstol Pablon visitasharqan Troas llaqtapi iñiq t’aqata, chayqa lamar qochaq ladonpin karqan. Bibliaq nisqan hina “qhepantin p’unchay” barcopi ‘puririnan kaqtinmi kuska tutakama unayta rimarqan’. Hinan ‘ventanapi Eutico sutiyoq wayna tiyasharqan. Pablo unayta rimaqtintaq waynaqa puñuywan aysachikurqan’. Hinaspa misk’ita puñurqapurqan. ¿Yachayta munawaqchu imas chaymanta pasasqanta?...
Eutico waynaqa “kinsa pata altosmanta pampaman urmaykurqan”. Pablopas chaypi tarikuqkunapas phawayllan escaleranta uraykurqanku, chayaqtinkutaq Euticoqa wañusqa kashasqa. ¡Imaynachá sientekurqanku! ¿Imaynan sientekuwaq karqan?... Bibliaq nisqan hina, Pabloqa waynatan oqllaykurqan marq’arikuspataq nirqan: “Ama mancharikuychischu, waynaqa kawsashanmi”, nispa. Arí, Diosmi chay waynata kawsarichirqan.
¿Imatan yachanchis chay sucedesqanmanta?... Hanaq pachapi kaq Jehová Taytanchisqa atinmi wañusqakunata kawsarichiyta, manataqmi qonqanchu wañusqa wawakunatapas. Hinaspapas Payqa entiendesunkin anchatataq munakusunki tayta-mamaykimantapas aswantaraq. Kay pachapi Jesús kashaspaqa anchatan wawakunata munakurqan imaynan Taytanpas munakun hinata. Manan marq’arikullarqanchu nitaq bendecillarqanchu aswanpas askha wañusqa wayna-sipaskunatan kawsarichirqan, hukmi karqan 12 watayoq sipascha.
¿Imatan Diosmanta sientenki munakusqasuykimanta?... Arí, llapallanchismi Diostaqa munakunchis chaymi kasukuytapuni munanchis. ¿Munawaqchu yachayta imatas ruwasunman munakusqanchista rikuchinapaq?... Munakuykin nisunmanmi imaynan Jesuspas ‘Yayatan munakuni’ nisqan hinata. Ichaqa ruwayninwanmi munakusqanta rikuchirqan.
Jesusqa Jehová Diostan kasukurqan. Nirqanmi: “Ñoqaqa paypa sonqonman chayaqtapunin ruwani”, nispa. Sichus kasukuyninchiswan Diospa sonqonta Jesuspa sonqontapas kusichiyta munanchis chayqa, rikch’asqallan kashananchis escuelapi, Biblia estudianapaq huñunakuykunapipas.
Bibliata leenapaq
[Uranpi willakuy]
a Sichus huk wawapaq leeshanki chayqa, kinsa puntochakuna kasqanpi chhikanta sayaykuspa uyariy kutichisqanta.