Espiritukunaqa manan jallp’apiqa kausarqankuchu wañurqankupaschu
Espiritukunaqa kanpunin. Allin espiritukunapas mana allin espiritukunapas kanmi. Ichaqa, ¿chay espiritukuna wañupuq runakunachu kankuman?
Manan. Wañupuq runaqa manan espiritumanchu tukupun, ¿imaynapin chayta yachanchis? Biblian chayta yachachin. Bibliaqa Diospa yuyaychasqanmi, chaymi cheqaqta imatapas yachachin. Diospa sutinmi Jehová. Runakunataqa Jehová Diosmi kamarqan, chaymi payqa yachan runakuna wañupuspa imaynapichus kasqankuta (Salmos 83:18; 2 Timoteo 3:16).
Adanqa ñut’u jallp’amantan karqan, ñut’u jallp’allamantaqmi tukupurqanpas.
Bibliapin willashan Diosqa Adanta “ñut’u jallp’amanta” ruwasqanta (Génesis 2:7). Chaymantan Edén huertaman churarqan. Sichus Diospa kamachikuyninta Adán kasukunman karqan chayqa kunankamapas kausashanmanraqmi, manan wañunmanchu karqan. Ichaqa manan kasukurqanchu, chaymi Diosqa payta nirqan: “Ñut’u jallp’an kanki, ñut’u jallp’allamantaqmi tukunkipas”, nispa (Génesis 3:19).
¿Imatan chaywan nisharqan? ¿Maypin Adán kasharqan manaraq Dios ñut’u jallp’amanta ruwashaqtin? Manan maypipas karqanchu, nitaq angelchu karqan. Chaymi Jehová Diosqa “ñut’u jallp’amanmi tukunki” nisqanwanqa wañupunanta nisharqan. Adanqa wañupuspaqa manan espiritukunaq kasqanmanchu rirqan, aswanpas ñut’u jallp’amanmi tukupurqan, ch’usaqmanmi tukupurqan.
Chhaynaqa, ¿imanisunmanmi wañupuq runakunamanta? ¿Adán jinachu paykunapas ch’usaqman tukupunku? Bibliapin chaymanta willashan.
“Llapankun [runakunapas animalkunapas] kasqallanman chayanku. Llapankun jallp’amanta jamurqanku, llapankutaqmi jallp’aman tukupunku” (Eclesiastés 3:20).
“Wañusqakunan ichaqa mana imatapas yachankuchu” (Eclesiastés 9:5).
“Chinkapunñan munakuyninkupas, cheqnikuyninkupas, envidiakuyninkupas” (Eclesiastés 9:6).
“Maymanchus rishanki chay Sepulturapiqa manan kanchu ima ruwanapas, ima llank’anapas ni yachanapas ni reqsinapas” (Eclesiastés 9:10).
“Samaynin sayapuqtinmi runaqa jallp’aman tukupun, chay p’unchaypachan ima yuyaykusqanpas chinkapun” (Salmos 146:4).
Kausashaqkunallan kaykunataqa ruwayta atinku.
¿Creenkichu chay textokunaq nisqanta? Manapaschá ichaqa piensay. Yaqa llapa qosakunan llank’anku familiankuta uywanankupaq. Qosakuna wañupuqtinmi ichaqa mayninpiqa esposanpas wawankunapas mana imayoqmi tarikapunkuman. Mayninpitaq wañupuqpa enemigon familianta ñak’arichinman. Chhaynaqa tapukuy kaykunata: “Chay runa espiritukunaq kasqanpi kausashanman chayqa, ¿imanaqtinmi mana familianta uywashallanchu? ¿Imaraykun familianta mana enemigonmanta jark’anchu?”, nispa. Bibliapiqa sut’itan willashan wañupuq runaqa manaña ima ruwaytapas atisqanta (Salmos 115:17).
Wañusqa runakunaqa manan familiankuta yanapayta atinkumanchu, nitaq millay runakunamantapas pakaykuyta atinkumanchu.
Chhaynaqa, ¿manañachu jayk’aqpas wañupuqkuna kausarimpunqaku? Manan chhaynachu. Qatimuq yachachikuykunapin astawan yachasunchis kausarimpuymanta. Wañupuqkunaqa manan rikusunkichu nitaq uyarisunkipaschu. Chhaynaqa manan wañusqakunataqa manchakunaykichu. Paykunaqa manan yanapasunkimanchu nitaq ima mana allintapas ruwasunkimanchu (Eclesiastés 9:4; Isaías 26:14).