¿Juj runa wañupuqtin imanpas kausashanmanraqchu?

¿Imaninmi Biblia?

Biblian nin: “Kausashaqkunaqa yachankun wañupunankuta, wañusqakunan ichaqa mana imatapas yachankuchu”, nispa (Eclesiastés 9:5; Salmos 146:4). Chhaynaqa pipas wañupun chayqa manañan maypipas ni imanpas kausanñachu. Wañupuqkunaqa manañan piensankuñachu, manañan imatapas ruwankuñachu ni sientenkupasñachu.

“Ñut’u jallp’allamantaqmi tukunkipas”

Diosqa willarqanmi Adanman wañupuqtin imachus pasananta. Payta mana kasukuqtinmi Diosqa nirqan: “Ñut’u jallp’an kanki, ñut’u jallp’allamantaqmi tukunkipas”, nispa (Génesis 3:19). Adanqa manan karqanraqchu manaraq Dios “ñut’u jallp’amanta” payta ruwashaqtinqa (Génesis 2:7). Wañupuspaqa jallp’allamantaqmi tukupurqan, manañan maypipas ni imanpas kausarqanñachu.

Kay tiempopipas kaqllataqmi. Runakunamantapas animalkunamantapas rimaspan Biblia nin: “Llapankun jallp’amanta jamurqanku, llapankutaqmi jallp’aman tukupunku”, nispa (Eclesiastés 3:19, 20).

Manan wañuywanchu tukuy imapas tukupun

Biblian wañuyta tupanachin secota puñuywan (Salmos 13:3, willakuy; Juan 11:11-14; Hechos 7:60, willakuy). Secota puñuqqa manan yachanchu imachus muyuriqninpi pasashan chaytaqa. Chhaynallataqmi wañusqakunapas mana imatapas yachankuchu. Biblian ichaqa willawanchis wañupuqkunata Dios rijch’arichinanta, chhaynapi jujmanta kausanankupaq (Job 14:13-15). Diospa kausarichisqan runakunapaqqa manan wañuywanchu tukuy imapas tukupun, jujmantan kausanqaku.