Allintapuni t’aqwiy

REY SALOMONMI ‘askha rikch’anachiy simikunata allinta yuyaymanaspa t’aqwirqan, hinaspan t’aqa-t’aqata churarqan’. ¿Imanaqtinmi chayta ruwarqan? “Allin cheqaq simikunata qelqayta” munaspan (Ecl. 12:9, 10). Lucaspas ‘qallariyninmantan allintapuni t’aqwirqan’ Señorninchis Jesusmanta ‘allin wakichisqa willakuyta’ qelqananpaq (Luc. 1:3).

¿Imataq t’aqwiyri? T’aqwiyqa tukuy yuyaywan qelqakunapi ima yachaytapas maskhaymi. Chaypaqmi leena, imayna estudianata hinapuni estudiana, hukkunatapas tapurisunmanmi.

¿Imakuna kaqtinmi t’aqwinanchis? Biblia leesqanchispi imapas mana sut’ichu kaqtin; predicacionpi pipas mana yachasqanchista tapuwaqtinchis, otaq discurso qonanchis kaqtinpas.

Discursomanta yachasun. ¿Imatan ruwasunman uyariqninchiskunapaq hina kananpaq? T’aqwinanchismi. Rimamusqanchismanta yachankuña chaypas, chayman yapaykusunman ima allin willakuytapas otaq paykunapaq hina huk rikch’anachiytapas chayqa, mosoqpas kanman hinataraqmi uyarinkuman rimamusqanchista, allintataq kallpachakunkuman. Wakin qelqanchiskunaqa pachantinpi runapaq hinan qelqasqa kashan, chaymi chaykunamanta iñiq t’aqaman otaq huk runamanpas rimaykushaspaqa paykunapaq hina sut’inchananchis. ¿Imaynatan chayta ruwasunman?

Manaraq t’aqwiyta qallarishaspan tapukunanchis: “¿Imatan uyariqniykuna yachankuña? ¿Imatan yachananku?” nispa. Chaymantataq qhawarinanchis imapaqchus chay discurso kasqanta. Wakin discursokunaqa imatapas sut’inchanapaqmi ruwakun. Chaypin huk yachachikuyta mast’arikun, willakullanmantaqmi imapas hayk’aq imaynapi pasasqanta. Wakin discursokunataq imapipas iñichinapaq hina ruwakun. Chaypin qhawarichikun imaraykus imapipas iñina kasqanta, chayman hinataq imatapas willakun. Wakin discursokunataq huk yachachikuymanta manan chhaynachu ninapaq ruwakun. Chaypin iskay yachachikuymanta rimakun, hinaspa mayqenchus cheqaq kasqanta rikuchikun. Chaypiqa imaymanata willaspaña imatapas sut’inchakun chaypas, mana pitapas phiñachinapaq hinallan rimana. Kallantaqmi sonqota kuyurichinapaq discursokuna. Chaypin uyariqkunata kallpachakun imatapas ruwanankupaq. Chaypaqmi allin kanman huk runakunaq sasachakuypi tarikuspapas allin kaqta ruwanankupaq imayna kallpachakusqankuta rikuchiy.

Imapaqchus chay discurso kasqanta yachaspa, ¿imatawanmi ruwana t’aqwiyta qallarinapaq? Tanteanan hayk’a qelqakuna t’aqwinanchista. Chaypaqmi qhawarina hayk’a tiempo rimananchista. Huñunakuypi discursokunaqa wakinmi ruwakun phisqa minutopi wakintaq kinsa chunkapi hina. Ichaqa umallikuna pitapas waturikushaspa hayk’a minuto rimamunankuqa manan nisqañachu kashan, manallataq estudiota qoshaspa hayk’a minuto rimamunanchispas kanchu.

Chaymantataq yuyaykunanchis qelqakuna maypi maskhananchista. Wasinchispi kashanchá wakin qelqakuna, Huñunakuy Wasiq bibliotecanpipas askhachá kashan huk qelqakuna, chaymantapas askha wataña Diosta yupaychaq iñiqmasinchiskunamantan mañakusunman. Hinallataq maskhasunman tiyasqanchis cheqaspi kaq huk bibliotecakunapipas.

Bibliapin allinta t’aqwina

Huk textomanta astawan yachayta munaspaqa kikin Bibliapin ñawpaqta t’aqwisunman.

Ñawpaqpi, qatiqninpi kaqtan t’aqwisunman. Tapukusunmanmi: “¿Pipaqmi kay texto qelqakurqan? ¿Imanaqtinmi chayta nishan? Chaypi kaqkuna, ¿imayna runan karqanku?” nispa. Chay tapuykunan yanapawasun mana entiendesqanchis textota entiendenapaq, sumaq discursokunata qonapaqpas.

Hebreos 4:12 texton rikuchin Diospa Simin atiyniyoq kasqanta, chaymi runaq sonqonman chayan hinaspa allin runaman tukuchin. Chay textoq ñawpaqninpi qatiqninpi textokunan yanapawasun chay nisqanta astawan entiendenapaq. Chay textokunan rimashan Israel runakuna manaraq Jehová Diospa prometesqan hallp’aman chayashaspanku ch’inneq aqo pampapi imayna kawsasqankumanta (Heb. 3:7–4:13). Diosmi Abrahamwan rimanakuspa prometesqa chay hallp’ata mirayninkunaman qonanpaq, chay promesatan Hebreos qelqapi nikun ‘Diospa simin’, nispa. Chay Siminqa kawsashallarqanmi, chaymi hunt’akunanpaqña kasharqan. Jehová Diosqa imaymanapin Israel runakunata yanaparqan, chaywanpas Egipto llaqtamanta Sinaí orqoman pusamushaqtinqa sapa kutillanmi promesanpi mana confiarqankuchu, kaqllatataqmi ruwarqanku prometesqa hallp’aman pusashaqtinpas. Munayninman hinan Jehová Diosqa ‘siminta’ hunt’arqan, chayta imayna qhawarisqankuwanmi Israel runakunaqa rikuchikurqanku imayna sonqoyoq kasqankuta. Kay tiempopipas Diospa Siminpi promesakunata imayna qhawarisqankuwanmi runakunaqa rikuchinku imayna sonqoyoq kasqankuta.

Paginaq uranpi textokunatan maskhasunman. Diospa Simin Qelqa (Edición 2004) nisqapin kan paginaq uranpi maskhanapaq textokuna. 1 Pedro 3:6 textopin willashan Abrahampa esposan Sara, cristiana esposakunapaq allin ejemplo kasqanta, paymi qosanta “wiraqocháy” nisqa. Paginaq uranpi rikhurin Génesis 18:12 texto, chaypi nisqan hina, chaytaqa ‘sonqonpin’ nisqa, chhaynapin rikuchirqan cheqaqtapuni qosanta respetasqanta kasukusqantapas. Uranpi kaq textokunaqa sut’inchanmi wakin textokunata, chaymantapas willanmi profeciakuna otaq Ñawpa Rimanakuypi ima kaqpas imayna hunt’akusqanmanta. Wakinqa kaqllamanta rimaq textokunamantan willakun, wakintaq runakunaq kawsayninmanta otaq cheqaskuna maypi tarikusqanmantapas.

“Textokuna maskhana” nisqata qhawarisun. Bibliaq tukuyninpin textokuna maskhana (concordancia) lista kan, chaymi yanapawasun imapas t’aqwisqanchismanta astawan willaq textokunata tarinanchispaq, chaykunapin tarisunman “cheqaq yachachikuykunata” (2 Tim. 1:13). Diospa Simin Qelqa (Edición 2004) Bibliapin kan “textokuna maskhana” nisqa.

Huk qelqakunapipas maskhayta yachasun

Kay libropi 33 paginaq recuadronpin willashan ‘hunt’aq kamachiq’ ruwasqan wakin qelqakunamanta (Mat. 24:45-47). Yaqa llapanpin tarikun índice nisqa, wakinpaqa tukukuy paginankunapin tarikun simikuna maskhanapaq lista, chaykunan yanapawasun yachay munasqanchista tarinapaq. Hinaspapas sapa wata tukuypin Qhawaq, ¡Rikch’ariy! revistakunapi lloqsimun watantinpi yachachikusqanmanta lista.

Sichus yachanchisña chay qelqakuna sapankanku ima rimasqanmanta chayqa, usqhayllan tarisun maskhasqanchista. Qhawaq revistapin tarisunman profeciakunamanta, cristianokuna imayna kawsanankumanta, Diospa kamachiyninkunata imayna hunt’anamanta willaq yachachikuykunata. ¡Rikch’ariy! revistapitaq willakun kunan tiempopi sucedesqanmanta, ima sasachakuykuna kasqanmanta, religionmanta, ciencia nisqamanta, pachantinpi huk llaqtakunamanta ima. El hombre más grande de todos los tiempos, nisqa libropin llapan Evangeliokunamanta willan hayk’aqchus imapas sucedesqanman hina. Apocalipsis... ¡se acerca su magnífica culminación!, Prestemos atención a las profecías de Daniel, Las profecías de Isaías, una luz para toda la humanidad, nisqa librokunapin Bibliaq wakin libronkunamanta sapanka versiculokunata t’aqwin. Razonamiento a partir de las Escrituras, nisqa libron predicasqanchispi runakunaq tapuyninkunata sumaqta kutichin. El hombre en busca de Dios, nisqa libron willawanchis religionkunaq imayna paqarisqanmanta, yachachikuyninkunamanta ima. Los testigos de Jehová, proclamadores del Reino de Dios, nisqa libron willan Jehová Diospa testigonkunaq ruwasqanmanta. Anuario de los testigos de Jehová, nisqa libron willan watantinpi predicación aparikusqanmanta. Perspicacia para comprender las Escrituras, nisqa librokunan Bibliamanta imaymanata willan: mapakunamanta, runakunamanta, llaqtakunamanta, runaq rimayninkunamanta otaq imakuna sucedesqanmantapas.

Índice de las publicaciones Watch Tower. Chay libroqa iskay chunka más rimaypiraqmi ruwasqa kashan, chaymi yanapawasun qelqanchiskunapi imaymana tariyta. Índice nisqaqa iskayman t’aqasqan kashan: Ñawpaqkaq t’aqan simikuna maskhanapaq, qhepakaqtaq textokunata maskhanapaq. Simikuna maskhanapaqqa, imamantachus yachayta munanchis chayman hinan huk simita maskhana. Ima textomantapas astawan yachayta munaspataq textokuna maskhana listapi maskhananchis; sichus chay maskhasqanchis yachachikuy otaq textopas qelqanchiskunapi lloqsimurqan chayqa. Chay libroq qallariynin paginakunapin tarikun qelqakunaq sutinta pisiyachisqa letrapi (kay hinata tarispaqa: w09 1/6 15, maskhananchismi 2009 watamanta 1 de junio killamanta Qhawaq revistata, 15 paginata). Índice libropiqa maskhasunmanmi Jehová Diospa testigonkunaq vidanmanta, otaq predicacionmanta willakuykunata, chaykunan yanapawasun allin discursokunata preparananchispaq.

T’aqwishaspaqa imatachus necesitasqallanchistan tukuy yuyaywan maskhananchis, mana chayqa mana maskhananchistan maskhashasunman. Índice nisqapi imatapas maskhanapaq tarispaqa, mayqen paginakunatachus nishan chaykunallatan maskhana, chaymantataq subtituloq nisqanwan, parrafokunapi qallariy simikunawan yanapachikusunman maskhasqanchista tarinapaq. Huk textomanta yachayta munaspaqa maskhananchismi ima paginapi sut’inchakusqanta, hinaspataq allinta t’aqwirina ñawpaqninpi qatiqninpi nisqanta.

Watchtower Library en CD-ROM. Chay discopin askha qelqanchiskuna kan, computadoranchis kaqtinqa chaypin imatapas maskhasunman. Chaypin ratolla imatapas tarisunman iskay kinsa simikunata qelqaspa otaq textokunata churaspapas. Chay CD nisqa rimayninchispi mana kaqtinqa, huk yachasqanchis rimaypin t’aqwisunman.

Huk bibliotecakuna

Iskay kaq cartanpin Pabloqa Timoteota nirqan ‘qelqa k’uyukunata, astawanqa qarapi qelqasqakunata’ Roma llaqtaman apapunanpaq (2 Tim. 4:13). Pabloqa ancha allinpaqmi chay qelqakunata qhawariq, chaymi waqaycharqan. Ñoqanchispas chaytan ruwasunman. Allinmi kanman estudiasqanchis Qhawaq, ¡Rikch’ariy!, Diosmanta Willasunchis nisqa qelqakunata waqaychay, chaykunapi imatapas yachayta munaspa maskhananchispaq. Yaqa llapan Huñunakuy Wasikunapin kan biblioteca, huñunakuyman riq iñiqmasikunaq t’aqwinanpaq.

Qelqasqanchiskunata waqaychasun

Sichus periodicopi otaq revistapi huk noticiata, ima allin willakuytapas tarisun chayqa, k’uturachisunmanmi otaq huk cuadernopi qelqasunman. Chaypin anotasunman ima qelqapi tarisqanchista, fechanta, qelqaqpa sutintapas. Huñunakuykunapipas qelqasunmanmi rikch’anachiykunata, aswan allin yachachikuykuna uyarisqanchistapas, chaywan runamasinchista yachachinapaq. Yaqapaschá yuyaykurqanchis huk allin rikch’anachiyta, manataq chaywan yachachinchisraqchu. Chhayna kaqtinqa qelqaspan chayta waqaychasunman. Escuelapaq preparasqanchis yachachikuykunatapas waqaychasunmanmi, yaqapaschá hukpi necesitasunman.

Runakunawan rimasun

Runamasinchismantaqa askhatan yachasunman. Evangelionta Lucas qelqananpaqmi runakunawan rimarqan rikusqankumanta willanankupaq (Luc. 1:1-4). Yaqapaschá huk iñiqmasiwan rimaspa tarisunman maskhashasqanchista. Efesios 4:8, 11-16 textoq nisqan hina, Criston “atiykunata [“runakunata”, NM]” regalota hina qowarqanchis, chhaynapi ‘Diospa Churinta allinta reqsinanchispaq’. Allin yachaq iñiqmasikunamantaqa askhatan yachasunman. Hukkunawan rimaspaqa yachasunmanmi imayna yuyaykusqankuta, chhaynapin atisun paykunapaq hina discursonchis preparayta.

Allinta qhawasun akllasqanchista

Trigota cosechaspaqa qarantaraqmi horqona. Chhaynallataqmi qelqakunata t’aqwishaspapas allin kaqllata akllana.

T’aqwisqanchista discursopi rimamusun chayqa, tapukusun: “¿Discursoypaq hinachu kashan? Icha, ¿manachu chaywan tupashan?” nispa. Sichus ciencia otaq medicina nisqamanta rimamuyta yuyaykushanchis chayqa, chayllaraq yachakusqanmantan rimamuna, chay yachaykuna sapa kuti cambiasqanrayku. Hinaspapas ñawpa qelqanchiskunapi wakin yachachikuykunataqa allichakunmi chayllaraq lloqsimuq qelqakunapi, chaytapas reparananchismi chayman hina rimamunapaq.

Runakunaq qelqankunapi t’aqwiyta munanchis chayqa, tapukunanchismi: “¿Cheqaqchu kay nisqanku? Icha, ¿yapa-yapaykuspachu imatapas willashanku? ¿Sut’illantachu imatapas willashanku? Icha, ¿imatapas chaskinankuraykuchu vendenankuraykuchu chayta nishanku? ¿Tupanchu Diospa Simin yachachisqanwan?” nispa. Manan qonqananchischu Diospa Simin cheqaqpuni kasqanta (Juan 17:17). Jesuswanmi Diosqa munayninta hunt’achinqa, chaymi Colosenses 2:3 nin: “Paypin Diospa tukuy imaymana yachayninpas yuyayninpas, pakasqa illa hinaraq kashan”, nispa. Chaypi nisqanwanmi tupanan ima t’aqwisqanchispas.

Proverbios 2:1-5 texton kallpachawanchis yachayta, allin reparaq kayta, allin yuyayniyoq kayta ‘qolqeta hina maskhananchispaq, chaniyoq pakasqa illakunata hina t’aqwinanchispaqpas’. T’aqwinapaqqa anchatan kallpachakuna ichaqa allinninchispaqmi kanqa. T’aqwiymi yanapawasun Jehová Diospa imamantapas imayna yuyaykusqanta yachayta, mana allin yuyaykunata allichayta, Diosmanta yachasqanchispi allin takyasqa kaytapas. Hinaspapas ancha munaymi discursonchiskuna kanqa, uyariqninchiskunan kusisqa tukuy yuyaywan uyarinqaku, kikinchispas kusikullasuntaqmi.