Discurso qonapaq qelqa ruway

ASKHA runakunan hukkunapaq discurso qoyta munaspaqa tukuy ima rimamunankuta qelqarqanku qallariymanta tukukuyninkama. Chhaynata ruwaspaqa askha tiempopichá ruwarqanku, qelqasqankuta sapa kuti allichaspapas askhatachá papeltapas usuchirqanku.

¿Chhaynatachu qanpas ruwanki? ¿Munawaqchu mana sasachakuspalla ruwayta? Sichus discurso qonapaq qelqa ruwayta yachanki chayqa, manañan llapa rimamunaykitachu qelqanki. Chhaynapin discursoyki ensayanaykipaq tiempoyki aypasunki manataqmi sasachakunkichu, hinaspapas sumaqmi discursoyki kanqa uyariqniykikunaq sonqonman chayananpaq hina.

Hatun discursokunaqa pisillapi qelqasqañan hamun, huk discursokunan ichaqa mana. Chaykunata ruwanapaqqa yaqapaschá imamantas rimakunqa, ima qelqakunamantas horqosqa kanqa chaykunallata churakamun. Chhayna kaqtinqa sapankan ruwanan discurso qonapaq qelqata.

Kay libropin 41 paginapi discurso qonapaq qelqa ruwasqa kashan. Ñawpaqta qhawariy hatun letrakunawan qelqasqa simikunata, chaykunaqa aswan importante yachachikuykunan. Chayman qatiq yachachikuykunataq huch’uy letrapi qelqasqa kashan, chaymanqa qatillantaqmi paña ladoman huk chhikan haykusqa simikunapas. Importante yachachikuykunaqa tituloq nisqanman hinan kashan, huch’uy letrapi kaq simikunataq hatun letrapi kaqkunaman hina kashan.

Manapaschá kay libropi discurso qonapaq qelqata hinachu ruwanki, ichaqa imayna ruwasqachus kashan chayta allinta qhawarinki chayqa, yanapasunkin pisi tiempollapi discursoykita allinta ruwanaykipaq. ¿Imaynatan qallariwaq?

Qhawariy, akllay chayman hinataq qelqay

Ñawpaqtaqa titulotan churanayki, chay titulon qhawarichinan imamantas rimanki, imaynaman hinachus ruwanki chayta. Chaymi mana churanachu huk simillata, mana chayqa manan yachakunqachu imamantapunichus rimanaykita. Sichus título churasqaña chayqa, allinta entiendey imamantas rimasqanta, ichaqa huk qelqamanta chay discursota ruwanayki kanqa chayqa, discursoq titulonta yuya-yuyarispa estudiay. Imamanta rimamunaykita nisunkikuman manataq huk titulota qosunkikumanchu chayqa, huk titulotan churanayki kanqa. Chaypaqmi allin kanman ñawpaqta t’aqwiriy. Imaymanata allinta qhawarispaqa atillankin allin título churayta.

Chaykunata ruwashaspan tapukunayki: “¿Uyariqniykunapaq hinachu kaykuna kashan? ¿Ima ruwanankuta munaspan chay discursota preparashani?” nispa. Discursoqa manan imamantapas rimanallapaqchu, nitaq kusa rimaq kasqanchista rikuchinapaqchu, aswanpas uyariqninchiskunata yanapanapaqmi. Imaynatachus discursoykiwan yanapawaq chayta allinta yuyaykuspa qelqay, hinaspa preparakushaspayki chaypi yuyaymanay.

Imaynatachus chay discursowan kallpachanaykita allinta yuyaykuspa, chayman hina titulota churarqankiña otaq título qosqasuykikuta allintaña t’aqwirqanki chayqa, atinkichá chayman hina imakuna t’aqwiyta. Tukuy imaymanamanta rimanaykimantaqa uyariqkunapaq hina allin kaqkunallatan maskhanayki. Manan llapa yachachikuy tarisqaykitaqa rimamuwaqchu, chayraykun allinta akllanayki kanqa.

Mayqen yachachikuykunachus discursoykipaq hina kashan chaykunata akllay. Chaykunan discursoykipi aswan importante kanqa, imaynan tullunchiskunapas allinta sayachiwanchis chay hina. ¿Hayk’an kanan? Yaqapas iskaylla allin kanman pisillapi rimamunaykipaqqa, phisqataq huk hora hina discursopaq. Iskay kinsa importante yachachikuykunallaman discursoykita t’aqanki chayqa, aswan allinmi kanqa uyariqniykikuna yuyarinankupaq.

Allintañachus yuyaykurqanki discursoykiq titulonpi, importante yachachikuykunapipas chayqa, t’aqwisqayki yachachikuykunatan chaykunawan tupachinayki. Chaypaq akllay mayqenkunachus importante kaqkunawan allin tupasqanta, imapas allin willanapaq hina kaqtawan. Textokunata akllashaspaykiqa qhawariy importante yachachikuykunawan imayna tupasqanta. Sapanka yachachikuykunata churay aswan importante kaqkunaq uranpi, mana chaypaq hina kaqtinqa amaña churaychu otaq hukpi rimanaykipaq waqaychay. Discursoykipaq hina kaqkunallata churay. Sichus nishu askha yachachikuykunata akllanki chayqa, usqhayllatan rimamunayki kanqa hinaspapas yanqa-yanqallatan yachachinki. Mana chhayna kananpaqqa iskay kinsa importante yachachikuykunallamanta rimamuy, tiempollanpitaq discursoykita tukuy.

Chaymantataq Evangelio qelqaq Lucas hina “allin wakichisqa[ta]” churanayki llapan akllasqayki yachachikuykunata (Luc. 1:3). Chaytan ruwawaq imapas imayna sucedesqanman hina, imayna t’aqasqa kasqanman hina, ima ruwaypas allinpichus mana allinpichus tukusqanman hina, otaq ima sasachakuytapas imaynata allichakunman chayman hina. Imaynanmanta ruwanaykipaqqa yuyarinaykin imapaqchus discursoyki kasqanta. Ama huk yachachiymanta qonqaylla hukman pasarqoychu, mana chayqa uyariqniykikunan mana allintachu entiendenkuman. Imapas sut’inchasqaykiqa allin entiendenankupaq hinan kanan. Chaymantapas tapukuy: “¿Mana sasachakuspallachu entiendenqaku imapas yachachisqayta? ¿Chayman hina ruwanankupaqchu kallpachakunqaku?” nispa.

Chaymantataq tukuy yuyaywan uyarinankupaq hina, imapas allin willanayki kasqanta yachanankupaq hina imayna qallarinaykita yuyaykuy. Chaypaqmi qelqawaq qallariy simikunata. Chaymantataq uyariqniykikunaq sonqonta kuyurichinapaq hina, discursoykiq imapaq kasqanman hina tukupay simikunata ruwawaq.

Discurso qonaykipaq qelqata tiempowan ruwanki chayqa, kanqan tiempoyki imatapas allichanaykipaq. Wakin yachachikuykunamanqa yapanaykipaschá kanqa huk rikch’anachiy simita otaq ima allin willakuytapas. Chayllaraq ima sucedesqanmantapas otaq paykunapaq hina noticiata willaymi yanapanqa discurso qosqayki importante kasqanta qhawarinankupaq. Discursoykita kutipasqaykiman hina, yaqapaschá allichankiraq wakin partenkunata uyariqniykikunapaq hina kananpaq. Chaykunata ruwaspan allin discursota qonki.

Wakinqa askhatan qelqanku discurso qonanku qelqapi. Chaywanpas, sichus iskay kinsa importante yachachikuykunallata churanki, mana chaypaq hina kaqkunata horqopunki, ‘allin wakichisqatataq’ llapanta churanki chayqa, manañan llapa rimamunaykitañachu qelqanayki kanqa. Chhaynata ruwaspaqa manañan tiempoykita usuchinkichu, hinaspapas allin yachachiqmi kapunki, chhaynapitaq Bibliamanta Allin Yachachiq Kanapaq Escuela allinniykipaq kasqanta rikuchinki.