Discurso qonapaq qelqawan yanapachikuy

ASKHA runakunan manchakunku imachus rimanankumanta pisi simikunallawan qelqasqankuman hina rimayta, aswanpas munanku imachus rimanankumanta llapanta umankupi hap’iyta otaq chayta huk papelpi qelqayta, chhaynapi chayman hina rimanankupaq.

Ichaqa manan imachus qelqasqanchisman hinachu imatapas rimanchis. Manan qelqanchischu familianchiswan amigonchiskunawanpas rimanapaqqa. Predicananchispaqpas manan chaytaqa ruwanchischu, Jehová Diosmanta tukuy sonqo mañakunanchispaqpas manan qelqanchischu.

Wakin discursokunaqa leespa qonapaqmi, wakintaq pisi simikunallawan preparakusqanchisman hina ruwanapaq. ¿Mayqenkaqmi chaykunamanta aswan allin kanman? Huk discursota leespaqa allintachá rimasun, ichaqa sasatan uyariqkunaq sonqonman chayasun. Askhata leesqanchisqa manan imaynatachus rimasqanchisman hinachu uyarikun. Uyariqninchiskunaqa makillan uyarinqaku discursonchista paykunapaq hina rimaqtinchis, ichaqa papeltachus astawan qhawashasun paykuna qhawananchismanta chayqa, manan tukuy yuyaychu uyariwasunman. Uyariqkunaq sonqonkuman chayanapaqqa, pisi simikunallawan preparakusqanchisman hinan ruwana.

Bibliamanta Allin Yachachiq Kanapaq Escuelaqa sapa p’unchay ruwayninchiskunapi yanapawananchispaqmi kashan. Amigonchiskunawan tupaspaqa manan qelqasqa papeltaraqchu qhawanchis paykunawan allinta rimanapaqqa. Predicacionmanpas manan qelqasqa papeltachu apanchis runakunawan imamantachus rimananchista mana qonqanapaqqa. Sichus Escuelapi huk demostracionta predicaymanta ruwanki chayqa, imaynatachus runakunata rimapayasqaykiman hina ruway. Allinta preparakuspayki chayta pisi simikunallawan qelqanki otaq umallaykipi hap’inki chayqa, mana sasachakuspan yuyarinki imamantachus rimayta munarqanki chayta. Ichaqa ¿imaynatan chayta allinta ruwawaq?

Ñawpaqmanta yuyaykuy. Pisi simikunallawan preparakusqaykiman hina rimanaykipaqqa ñawpaqmantan yuyaykunayki imakunamanta rimanaykita. Chayta ruwaspaqa manan akllanaykichu ima simikunawanchus rimanaykita.

Mana allinta yuyaykuspa rimaq runaqa hawan ukhuntan imatapas rimarparin, chaymantataq pesapakushan rimasqanmanta. Wakintaq mana sut’i entiendeytachu rimanku. Qanpas mana allinta qhawarikuspaqa chhaynatapaschá rimawaq. Chayraykun ñawpaqmanta allinta yuyaykunayki imakunamantachus rimanaykita. Chaypaqqa allintan qhawarinayki imapaqchus yachachiyta munanki chayta, chhaynapi uyariqkunaq sonqonta kuyurichinaykipaq hina sumaqta rimanaykipaq.

Predicanaykipaq preparakuspaykiqa ama maletinnillaykitachu alistay, yuyaykullaytaq imakunamantachus rimawaq chaytapas. Diosmanta Willasunchis nisqa hojapi predicanapaq yanapaykuna kasqanman hina ruwayta munanki chayqa, askha kutita chayta leey chhaynapi allinta entiendenaykipaq. Hinaspa chayta practicay huk iskay kinsa simikunallawan, ichaqa imaynatachus rimasqaykiman hina, predicanayki runakunapaq hinataq. ¿Imakunamanta rimanaykipaqmi yuyaykuwaq? 1) Imachus runakunata llakichishan chaymanta. Uyariqniykitan tapuwaq chayta imaynatachus qhawarisqanmanta rimananpaq. 2) Jehová Dios chay sasachakuyta tukuchipunanta qhawarichinaykipaqmi rikuchiwaq huk otaq iskay textokunata. Hinaspapas niwaqmi Diosqa chay promesanta Gobiernonwan hunt’ananta. 3) Kallpachawaqmi rimasqaykichisman hina ruwananpaq. Saqewaqmi ima qelqanchistapas otaq niwaq Bibliamanta yachachishanallaykipaq hayk’aq kutinaykita.

Chay hinata rimanaykipaqqa yuyaynillaykipin chaykunata pisi simikunallawan hap’iwaq. Predicanaykipaq pisillapi qelqayta munanki chayqa, chaypin qelqawaq imaynatachus rimayta qallarinaykipaq, hukta otaq iskay textokunata, imaynatachus rimayta tukunaykipaqpas. Allinta preparakuspa chayman hina predicanki chayqa, sut’itan rimanki yuyarinankupaq hina.

Sichus predicasqayki runakuna imamantapas tapukullankupuni chayqa, qelqanchiskunapi maskhay chaykunata kutichinaykipaq. Hinaspa chayta pisillapi qelqay, chay temawan tupaq wakin textokunatawan. Yaqapaschá chaykunata tariwaq “Temas bíblicos para consideración” nisqapi otaq Razonamiento a partir de las Escrituras nisqa libropi. Maskhallawaqtaqmi huk qelqakunapipas. Chaykunapi yachasqaykitapas pisillapi qelqay, horqoy fotocopiatapas, hinaspa chaykunata waqaychay predicanayki bolsaykipi otaq maletinniykipi. Predicasqayki runa imatapas tapusunki chayqa, sumaqllata niy chay tapukuyninta kutichinaykipaq (1 Ped. 3:15). Hinaspa qelqa ruwasqaykiman hina kutichiy.

Sichus Diosmanta mañakunayki kanqa familiaykipaq, predicanapaq huñunakuypi otaq iñiq t’aqapipas chayqa, ñawpaqmantan yuyaykunayki imakunamanta rimanaykipaq. Chaypaq qhawawaq Lucas 11:2-4 textota qatikuqninkunaman Jesuspa yachachisqan mañakuyta. Hinallataq Jerusalenpi yupaychana wasita inaugurashaqtinku Salomonpa mañakusqantapas. Payqa ñawpaqmantachá yuyaykurqan imakunamanta rimananpaq. Qallariypin rimarqan Jehová Diosmanta, Davidman Diospa prometesqanmanta, yupaychana wasimanta, chay qhepamantaq Israel runakunarayku Jehová Dios imaymana ruwananmanta, imaymanapi tarikuq runakunamanta ima (1 Rey. 8:22-53).

Discursopaq qelqa ruwasqaykiqa entiendey atiymi kanan. ¿Imakunatan churanayki discursota qonaykipaq qelqa ruwasqaykipi?

Qelqa ruwasqaykiqa kanan imamantachus rimanaykita yuyarinallaykipaqmi. Chaypin pisi simikunallawan qelqawaq imayna rimayta qallarinaykipaq. Chaymantataq imakunatachus yachachinaykita qelqay ama simikunatachu. Chay yachachikuykunamanta qelqasqaykiqa manan askha simikunawanchu kanan aswanpas pisillan. Discursoq aswan allin yachachikuyninkunaqa sut’i reparaymi kanan, chaykunatan qelqawaq mayúscula letrakunawan, otaq imawanpas marcawaq. Chaymantapas sut’itan qelqanayki imakunamantachus yachachinaykitaqa, hinallataq leenayki textokunatapas, hinaspa chaykunata leey kikin Bibliamanta. Rikch’anachiy simikunapi rimanaykitapas qelqay. Sichus wak qelqakunamanta rimayta munawaq chayqa, chaykunatapas qelqay, ichaqa chayta ruwanayki imamantapas imaynachus kasqanman hina willanaykipaqmi. Discurso qonaykipaq qelqata sumaqta ruwanki chayqa, allintan chaywan yanapachikunki.

Wakin discursantekunaqa imamantachus yachachinankuta pisi simikunallawanmi qelqanku, otaq imatapas dibujanku chaykunawan yuyarinankupaq, chaypi textokuna qelqasqankutapas umallankumantan rimanku. Chaykunawanmi paykunaqa discursonkupi sumaqta rimamunku. Kay yachachikuyqa chhaynata ruwanapaqmi kashan.

Kay libropi 39-42 paginakunapi “Discurso qonapaq qelqa ruway” nisqa yachachikuyta qhaway, kay yachachikuypi nisqanman hina allinta ruwanaykipaq.

Qelqa ruwasqaykiwan allinta yanapachikuy. Allin discursota qonaykipaqqa manan chaymanta rimanaykipaq huk allin qelqallatachu preparanayki, aswanpas allintan yachanayki chay qelqawan imayna rimayta.

Chay qelqawan allinta rimanaykipaqqa allintan preparakunayki. Ñawpaqta qhawariy titulonta, hinaspa leey aswan allin yachachikuykunata, chaymantataq qhawariy imaynatachus chaykuna hukllachasqa kashan discursoykiq temanwan chayta, hayk’a tiempochus sapa yachachikuymanta rimawaq chaytapas. Kunanqa chay qelqapi churasqayki ñawpaqkaq yachachikuyta estudiay, allinta qhawariy imakunamanta willanaykita, ima textokuna leenaykita, ima rikch’anachiy simikuna willanaykitapas. Askha kutita chayta ruway allinta yuyarinaykikama. Kaqllatataq ruway huk allin yachachikuykunawanpas. Chaymantapas qhawarillaytaq tiempo pisisuqtiyki mayqen willakuykunatachus manaña willawaq chayta. Chaymantataq qallariyninmanta tukukuyninkama discursoykita practicay. Ima simikunawanchus rimanaykita qhawashanaykimantaqa, yuyaykuy imaynatachus yachachikuykunata allinta sut’inchanki chayta. Amataq llapan discursotaqa umaykipi grabaychu.

Discursota qoshaspaqa allintan uyariqniykikunata qhawanayki. Huk textota leespaqa qelqata mana qhawaspallan sut’inchanayki. Huk rikch’anachiy simita willanayki kaqtinqa, ama chaytaqa leeychu, aswanpas amigoykikunawanpas rimashawaq hinata willay. Ama sapa ratoqa discurso qonapaq qelqataqa qhawaychu. Kallpachakuy tukuy sonqowan rimanaykipaq, chhaynapin uyariqniykikunaq sonqonman chayanki.

Discurso qonapaq qelqawan allinta yanapachikunki chayqa, allintan yachanki askha runakunaman rimaykuyta.