¿Imaynatan preparakusunman Escuelapi rimamunapaq?

ESCUELAPI rimamunaykipaq tupasunki chayqa, allinpunin kanqa yachachiypi ñawparinaykipaq. Sichus tukuy yuyayniykiwan chayta hunt’anki chayqa, lliwpas sut’itan rikunqaku iñiyniykipi wiñasqaykita (1 Tim. 4:15). Chaypaqmi Escuela yanapasunki.

¿Manchakunkichu huñunakuypi rimamuyta? Lliwmi manchakurqanku, wakinqa unayña escuelapi kashaspapas manchakunkuraqmi. ¿Imatan ruwawaq chay manchakuyta atipanaykipaq? Sapa kutillanmi kunkawan leenayki, astawanqa wasiykipi. Huñunakuykunapi tapuykunata kutichiy. Predicaqña kanki chayqa, sapa kutilla lloqsiy predicaq, chhaynapin yachanki runaq qayllanpi mana manchakuspa rimayta. Hinaspapas ñawpaqmantapacha preparay Escuelapi rimamunaykita, kunkawantaq ensayay. Huñunakuypi kaqkunaqa sumaqtan uyarisunkiku. Manaraq huñunakuypi rimamushaspataq Jehová Diosmanta mañakuy santo espiritunta, payqa mañakuqninkunamanqa kusisqan qon (Luc. 11:13; Fili. 4:6, 7).

Pisi-pisimantan yachanki kusa rimayta allin yachachiytapas (Miq. 6:8). Chayllaraq Escuelapi kashanki chayqa, ama allinllaña discursoyki lloqsinantaqa yuyaykuychu. Aswanpas kusa rimaq kanamanta kay libroq huknin yachachisqallanta t’aqwiy, chayman hinataq ruway. Chay yachachikuypaq churasqa tareata ruway, chhaynapin ensayayta atinki manaraq discursoykita qoshaspa. Chhaynata ruwanki chayqa allintan ñawparinki yachayniykipi.

Leenaykipaq tupasuqtiyki

Hukkunaq qayllanpi leespaqa manan simikunallatachu allinta t’oqyachina, aswanmi allinta entiendenanchis leesqanchis simikunata. Chaypaqmi hojachata chaskisqaykimantapacha ensayashanayki imatachus leenki chayta. Leespaqa reparay chay simikunaq ima nisqanta, parrafokunaq imamanta rimasqantawan, chhaynapin tukuy sonqowan allinta leemunki. Sichus mana yachankichu huk simita imayna t’oqyachikusqanta chayqa, tapuwaqmi allin yachaqkunata. Leesqayki qelqataqa allintan yachanayki. Chaykunata wawakuna ruwanankupaqqa yaqapaschá tayta-mamakuna yanapananku kanqa.

¿Bibliamantachu Qhawaq revistamantachu leeynayki kanqa? Chhayna kaqtinqa huk allin leeqta valekuwaq leenayki kaqta leepunasuykipaq, qantaq makilla uyariwaq imayna t’oqyachisqanta, maypichus sayarisqanta, mayqen simikunatachus kallpawan leesqanta, leesqanman hina imaynatas kunkanta cambiasqantawan, hinaspataq kallpachakuwaq chayman hina leenaykipaq.

Manaraq leemunaykita preparashaspaqa kay libroq mayqen yachachikuyninman hinachá leemunayki kanqa, chayta estudiay tukuy yuyaywan. Leemunaykita askha kutita ensayasqayki qhepamanpas kutipawaqmi kay libroq yachachikuyninta. Kallpachakuytaq chayman hina ruwanaykipaq.

Chhaynapin allin preparasqa kanki predicacionpi sumaqta leenaykipaq. Diospa Siminqa atiyniyoqmi runakunaq kawsayninta cambiananpaq, chaymi allinta leenayki (Heb. 4:12). Manan huk otaq iskay kutillata Escuelapi leesqaykiwanchu allin leeq kapunki. Apóstol Pablon unayña umalli cristianoman yuyaycharqan: “Diospa Simin Qelqakunata leeshallaypuni”, nispa (1 Tim. 4:13).

Escuelapi demostracionkuna

¿Imaynatan ruwawaq escuelapi demostracionta?

1) Imamanta rimanaykitan qhawarinayki, 2) maypipas kashawaq hina, piwanpas rimashawaq hina rimanaykitapas qhawarinaykin, 3) hinallataq kusa rimaq kanapaq mayqen yachachikuyman hinachus ruwanayki kanqa chaytapas.

Imamantas rimanki chaypaq hina yachachikuykunata maskhay, ichaqa manaraq nishuta t’aqwishaspaqa yuyaykuy demostracionta yanapaqniykiwan imayna ruwanaykita, chhaynapin yachanki imatas astawan t’aqwinayki, imaynatas rimanayki kanqa chaytapas. Chaypaq tapukuy: “¿Maypi kashayman hinan chay demostracionta ruwasaq? ¿Reqsisqay runamanpas predicashayman hinachu rimanay? Icha, ¿chayllaraqpas reqsishayman hinachu? ¿Kurakniytachu icha sullk’aytachu rimapayasaq? ¿Ima ninmanmi rimapayasqaymanta? ¿Askhatachu yachanman chaymanta? ¿Ima yuyaywanmi chaymanta rimapayasaq?” nispa.

¿Maypin maskhawaq demostracionniykipaq hina yachachikuykunata? Chaypaq leey “Allintapuni t’aqwiy” nisqata kay libropi (págs. 33-38), chaymantataq huk qelqakunata maskhay. T’aqwispaykiqa askha yachachikuykunatan tarinki, mayqenkunatachus demostracionniykiman churawaq chayta allinta yachanaykikama leey, hinaspa imaynatachus piwanchus demostracionta ruwanki chaypaq hina akllay.

Manaraq importante yachachikuykunata akllashaspa, chayman qatiq yachachikuykunatapas manaraq churashaspa, leey kay libropi mayqen yachachikuyman hinas ruwanayki kashan chayta. Chayman hina ruwanaykipaqmi demostracionqa.

Sichus demostracionniykita tiempollanpi ruwanki chayqa, atinkin preparasqayki simikunawan tukuyta; manataqchus tiempollanpi ruwanki chayqa, reparachimusunkikun tiempoyki tukukusqanta. Predicacionpiqa manan nisqañachu kashan hayk’a minuto rimanapaq, chayrayku demostracionniykita tiempollanpiña tukunayki chaypas, astawanmi kallpachakunayki sonqoman chayaqta yachachinaykipaq.

Maypichus piwanchus rimanaykimanta. Kay libroq 82 paginanpin tarikun huk lista, chaypin willakushan maypichus kashawaq hina otaq piwanchus rimashawaq hina demostración ruwanaykipaq. Hukta akllay predicacionpaq hina. Unayña escuelapi kashanki chayqa, demostracionniykita qhawariy predicacionpi yanapanasuykipaq hina.

Sichus Escuelapi umalli hojachaykipi qelqarqonña chay listamanta hukta chayqa, kallpachakuy chayman hina ruwanaykipaq. Yaqa llapa demostracionkunan predicacionpaq hina ruwakunqa. Sichus manaraq predicarqankichu umalliq qelqasqanman hina chayqa, pikunachus chhaynata predicarqanku paykunawan yanapachikuy, atispataq demostracionpi rimanaykiman hina predicamuwaq. Chhaynapin Escuela yanapasunki hukkunaman allinta predicanaykipaq.

Huk discursokuna

Qharikunaqa iñiq t’aqapaq discursokunatan qonku. Imaynan demostracionkunapaq allinta preparakuna, chhaynallatataqmi discurso qonapaqpas ruwana. Discursokunaqa pikunapaqchus ruwasqa kasqanpi, imaynachus ruwasqa kasqanpipas hukniraymi demostracionkunamantaqa.

Discursokunataqa huñunakuypi kaqkunapaq hinan preparanayki, paykunaqa yaqa llapankun allintaña yachanku Bibliamanta qallariy yachachikuykunata. Discursopi rimamunaykimantapas allintañachá yachanku, chaymi chaykunapi yuyaykuspa imaynapipas yanapanaykipaq hina ruwanayki. Chaypaq tapukuy: “¿Imaynatan kay discursowan kallpachakuyman Jehová Diosta astawan munakunaypaq? ¿Imaynatan uyariqniykunatapas kallpachayman? ¿Imaynatan kaywan rikuchiyman mayqenchus Diospa munaynin kasqanta? ¿Imaynatan kay discurso yanapan kay pachapi millay kawsay ukhupi allinkaqta ruwanapaq?” nispa (Efe. 2:3). Chay tapuykunata kutichinapaqqa allintan t’aqwirinayki. Chaymantapas Diospa Simin qelqawanmi allinta sut’inchanayki rimasqaykita (Hech. 17:2, 3). Ama imaymanakunamanta rimaychu, aswanpas yachachikuykunata tupachiy fácil yuyarinankupaq hina.

Chaymantapas kunkawanmi discursoykita allinta ensayanayki. Kusa rimaq kanapaq kay libroq yachachisqanta allinta t’aqwispa, chayman hina ruwaspapas allin yachachiqmanmi tukunki. Allintaña yachanki discurso qoyta chaypas, allinta preparakuy sonqomanta rimanaykipaq. Rimaytaqa Jehová Diosmantan chaskirqanki, chaymi payta hatunchanaykipaq discursokunata demostracionkunatapas qonayki (Sal. 150:6).