Discurso qonaykipaq preparakuy

HATUN huñunakuykuna, Bibliamanta Allin Yachachiq Kanapaq Escuela, huk huñunakuykunapas iñiqmasinchiskunaq allinninpaqmi ruwasqa kashan. Chaykunapi discurso qonaykipaq nisunkiku chayqa, ancha allin ruwanatan qoshasunkiku. Chaymi apóstol Pablo yuyaycharqan umalli Timoteota yachachikuyninta allinta cuidananpaq (1 Tim. 4:16). Huñunakuykunaman hamuqkunaqa tiempota hap’ispan hamunku, mayninpiqa imaymana ruwanankuta saqesparaq, chaytan ruwanku allin yachachisqa kanankurayku, chhaynapi Jehová Dioswan allinpi kanankupaq. Discurso qoyqa ancha sumaqtaq chayqa, ¿imaynatan allinta preparakuwaq?

Bibliamanta akllasqa yachachikuykuna

Sapa semanapaq Bibliamanta leekusqan capitulokunamantan ruwakun. Chay discursopiqa allintan entiendechina chay yachachikuykuna ancha allinninchispaq kasqanta. Nehemías 8:8 textoq nisqan hina, sacerdote Esdrasmi Leví runakunapiwan hukkunaman Diospa Siminta leespa “sut’ita entiendechirqanku”. Qanpas chay hinatan ruwawaq Bibliamanta akllasqa yachachikuykunata willaspa.

Discursoykipaq huk semana otaq aswan unayraq kashaqtinmi leewaq tupasqasuyki capitulokunata, hinaspan yuyaykuwaq iñiqmasinchiskuna imapis allinyananku kashan chaypi kallpachanaykipaq. Chaypaq Jehová Diosmanta mañakuy. Yuyaykullaytaq chay capitulokunapi mayqen yuyaychaykunawan, kamachikuykunawan, willakuykunawanpas iñiqmasikunata yanapanaykipaq.

Sichus rimasqayki simipi kan Watchtower Library nisqa disco otaq Índice de las publicaciones Watch Tower nisqa qelqapas chayqa, chaykunapi allinta t’aqwiy. Chaykunan yanapasunki akllasqayki versiculokunamanta astawan yachanaykipaq: chay tiempopi imakuna sucedesqanmanta, profeciakuna imayna hunt’akusqanmanta, Jehová Dios imayna kasqanmanta otaq Bibliaq kamachikuykuna imayna sut’inchakusqanmantapas. Ichaqa ama askha versiculokunamantaqa rimaychu, aswanpas iskay kinsa versiculokunallamanta allinta yachachiy.

Kay discursopiqa uyariqkunatan nikunman leesqankupi imapas allin kaqta tarisqankumanta rimanankupaq. Chaypin rimankuman predicanapaq, allin kaqta ruwanapaq, sapallanpi otaq familiapi estudianapaq imapas allin tarisqankumanta. ¿Imaynatan Jehová Dios runakunata llaqtakunatapas tratarqan? ¿Imatan yacharqanku iñiyninku kallpachakunanpaq, Jehová Diostapas astawan munakunankupaq? Chaykunamantapas rimankumanmi. Chay discursota ruwaspaqa uyariqkunaq allinninpaq kaqkunamanta astawan yachachiy, sasa entiendey kaqkunamanta rimamunaykimantaqa.

Predicayta Yachanapaq Huñunakuy

Diosmanta Willasunchis hojamanta horqosqa discursokunapiqa manan allinnillantachu akllanayki, aswanpas hunt’asqatan uyariqkunaman willanayki chaypi qelqasqa kaqmanta. Entiendechiy Bibliaq textonkunamanta chay yuyaychaykuna horqokusqanta (Tito 1:9). Horallanpitaq chay discursokunata ruwakunan chayqa, manapaschá huk yachachikuykunata chayman yapaykuyta atinkichu.

Wakin discursokunataqa manan Diosmanta Willasunchis nisqa hojamantachu horqokun, aswanmi Qhawaq revistamanta otaq huk qelqakunamanta; wakinta ruwanapaqtaq pisi simikunalla rikhurin chay hojapi. Discurso qoqqa allintan yuyaykunan imapis iñiq t’aqa allinyanan kashan chaypaq hina preparakunanpaq. Chaypaqqa churakunmanmi huk rikch’anachiyta otaq imapas pasasqanmanta huk allin willakuyta. Discurso qoqqa manan willaylla-willayllachu imamantapas rimamunqa, aswanpas iñiq t’aqatan kallpachanqa Bibliaq qosqan llank’anata allinta kusisqa hunt’anankupaq (Hech. 20:20, 21).

Preparakuspaqa iñiqmasinchiskuna imaynapichus tarikushanku chaytan yuyarinayki. Ima allin ruwasqankumantapas “allinpunin” niy. Chaymantapas t’aqwisqayki yachachikuykuna imaynatan yanapanman kusikuywan allinta predicanankupaq chaytawanmi yuyaymananayki preparakushaspa.

Sichus discursoykipi huk demostracionta ruwachinayki kanqa otaq huk iñiqmasinchista tapunayki kanqa imatapas willananpaq chayqa, ñawpaqmantan chaytaqa preparanayki. Chaykunata hukman saqenaykimantaqa aswan allinmi kanman qan kikiyki chaykuna qhawariyqa. Tukuy atisqaykita kallpachakuy manaraq huñunakuy p’unchay chayamushaqtin chaykunata ensayachinaykipaq, makillataq qhawariy imamantachus rimamunki chaypaq hinapuni ruwakunanpaq.

Hatun huñunakuykuna

Wakin allin yachachiq Dios sonqo umallikunataqa ninkumanmi hatun huñunakuykunapi discurso qonankupaq. Chay hatun huñunakuykunapiqa kusatapunin yachachikun. Chaykunapaqqa kanmi discurso ruwanapaq qelqa, leenapaq discurso, Bibliamanta drama presentanapaq qelqa, imatapas imayna ruwakunanta pisillapi willakuq qelqapas. Sichus chaykunamanta hukninta qosunkiku chayqa, kallpachakuy allinta estudianaykipaq, allintan entiendenayki imaraykus chay yachachikuy ancha chaniyoq kasqanta.

Leenapaq discursotaqa qelqasqa kasqanman hinallan iman kaqta leenayki. Allintan estudianayki chay discursota, chhaynapin yachanki mayqenkunachus importante yachachikuykuna kasqanta, chaykuna imayna sut’inchakusqantapas. Sapa kutinmi ensayashanayki, allin kunkawan, tukuy sonqowan, sumaq-kaywan, mana iskayaspa ruwanaykikama. Chaymantapas askha runapaq hinan kallpawan leenayki.

Discurso ruwanapaq qelqata qosunkiku chayqa, chayman hinan preparakunayki. Manan chaymanta leemunaykichu nitaq llapan rimamunaykitachu qelqanayki leenapaq discursota hinaqa, aswanpas imayna rimasqaykiman hinallan rimamunayki, tukuy sonqowantaq ruwanaykipas. Discursoykipaq hayk’a minuto kasqanman hinallan rimamunayki, chhaynapin llapan importante yachachikuykunata, chaykuna sut’inchaq textokunata, wakin yachachikuykunatapas allinta entiendechinki. Ichaqa, huk akllasqayki yachachikuykunata churanaykirayku chaskisqayki qelqamanta wakinninta manaña rimamuwaqchu chayqa, manan allinchu kanman. Chaymantapas Diospa Simin Qelqaq nisqanman hinan kanan ima rimamusqaykipas. Biblian umallikunata kamachin: “Diospa siminta willay[chis]”, nispa (2 Tim. 4:1, 2). Chaymi discurso qoqqa allinta sut’inchanan Bibliaq textonkunata, yachachinantaq imayna kasukunatapas.

Ñawpaqmanta preparakuy

¿Qollankipunichu discursokunata huñunakuykunapi? Chhayna kaqtinqa, ñawpaqmantaraqmi preparakunayki, chhaynapi allinta ruwanaykipaq.

Discursoyki iñiqmasinchiskunaq allinninpaq kananpaqqa allintan yuyaykunayki imakuna rimamunaykita. Chaymi discurso ruwanapaq qelqataqa chaskispayki hinalla leenayki, chhaynapin imatapas ruwashaspayki yuyaymanayta atinki. P’unchaykunapi otaq semanakunapi manaraq discursota qoshaspa yaqapaschá chaypaq hina imatapas uyariwaq otaq imapas kanman. Chaskispayki hinalla discurso qonapaq qelqata leenki yuyaymananki chayqa, ancha allin ruwaypaqmi tiempota hap’ishanki. Chay ruwasqaykin yanapasunki preparakunaykipaq. Chaymantapas manañan nishutachu manchakunki rimamunaykipaq, hinallataq uyariqniykikunaq allinninpaq kanqa, sonqonkumantaq chayanqa.

¡Ima munaymi Jehová Diospa llaqtanpi yachachiyqa! Chaytaqa ancha allinpaqmi qhawarinanchis, chhaynapin Jehová Diosta hatunchasun, uyariqninchiskunatapas kallpachasun (Isa. 54:13; Rom. 12:6-8).