Sumaq parlayta yachay

¿SASACHAKUNKICHU hukkunawan parlayta? Wakinqa p’enqali kaspankun khatatatankuraq piwanpas parlananku kaqtin, astawanqa mana reqsisqakunawan. Paykunaqa ninkupaschá: “¿Imaynatan parlayta qallariyman? ¿Imamantan rimayman? ¿Ima nispataq kutichisaq imatapas niwaqtinri?” nispa. Wakintaq ichaqa rimaysapa kaspanku mana hukkunata rimarichinkupaschu. Paykunaqa yachanankun hukkuna uyariyta. Chhaynaqa, p’enqalikunapas rimaysapakunapas yachananchismi sumaqta parla tupachiyta.

Wasiykipi qallariy

Parlariyqa anchatan yanapan tayta-mamakunata wawakunatapas kusisqa kawsanankupaq. ¿Kallpachakusunmanchu familiapi sumaqta parlarinapaq? Allinmi kanman chayqa.

Allin parlaq kanaykipaqqa hukkunapin interesakunayki (Deu. 6:6, 7; Pro. 4:1-4). Hukkunapi interesakuqqa asuykuspan parlata tupachin, ichaqa manan payllachu riman. Chaymantapas yuyaykunaykin imamantas parlarinki chayta. Sichus Bibliata leeshallankipuni estudiashallankipuni chayqa, askhan rimanaykipaq kanqa. Diospa Siminta sapa p’unchay t’aqwisun nisqa qelqata familiaykiwan kuska leeqtiykichisqa allinmi kanqa parlanaykichispaq. Parlallawaqtaqmi chay p’unchaypi imapas leesqaykimanta, asikunapaq hina kaqkunamanta, otaq predicacionpi imapas pasasqanmanta. Wasipi chaykunamanta sumaqta parlayqa yanapasunkin hukkunawanpas sumaqta parlanaykipaq.

Mana reqsisqakunawan imayna parlanamanta

Wakin runakunaqa manan rimayta munankuchu mana reqsisqakunawanqa, Jehová Diospa testigonkunan ichaqa Diosta runamasinkutapas munakusqankurayku kallpachakunku mana reqsisqankuwan Bibliamanta parlarinankupaq. ¿Iman yanapawasunman sumaqta parlananchispaq?

Filipenses 2:4 texto nisqanmi anchata yanapawasun, chaypin nin: “Ama pipas pay kikinpa allinnillantaqa maskhachunchu, aswanpas hukkunaq allinnintapas maskhallachuntaq”, nispa. Manataq predicasqanchis runa reqsiwanchischu chayqa, manchakuwashasunmanpaschá, chaymi sumaqta napaykuspa asirikuspa ima parlarinanchis. ¿Imatawanmi ruwananchis?

Interesakunanchismi imapichus yuyaykushasqanmanta. Munasqanchismanta rimanamantaqa paypa munasqanmantan rimananchis, mana chayqa manapaschá uyariyta munawasunmanchu. Jesusmi chaypaq allin ejemplota qowanchis. Huk kutinmi huk warmi p’uytuman hamurqan. Chay warmiq yuyayninqa unu aysaypin kasharqan, chaymi Jesusqa unumanta rimayta qallarirqan, chhaynapin sumaqta Diosmanta parlarirqanku (Juan 4:7-26).

Allin qhawariq kanki chayqa, reparawaqmi uyariqniyki imapi yuyaykushasqanta. ¿Kusisqachu icha llakisqachu kashan? ¿Yuyaqñachu kashan? ¿Onqosqata hinachu reparanki? ¿Wawakunayoqchu? ¿Qhapaq runachu icha wakchachu? ¿Rikukunchu wasinpi otaq imayna p’achakusqanpipas religioso runa kasqanta? Sichus napaykushaspallaykiraq chaykunata reparanki chayqa, atinkin parla tupachiyta.

Wakinqa manchakuspan kawsanku, chaymi punkuq qhepallanmanta rimapayamusunkiman. Chhayna kasqanta reparaspaqa chaypaq hinan imamantapas rimayta qallariwaq.

Uyariqniykiwan parlata tupachinaykipaqqa willawaqmi pi kasqaykita, maymanta kasqaykita, imapaq visitasqaykita, imarayku Diospi iñisqaykita, Biblia estudiasqayki yanapasqasuykimanta ima (Hech. 26:4-23). Ichaqa, allin yuyaywanmi chaykunataqa willanayki, manataq qonqanaykichu imapaq visitasqaykita. Chhayna kaqtinqa paypas willasunkimanmi ima yuyaykusqanmanta.

Wakin llaqtakunapiqa sumaqtan wasinkupi chaskinku mana reqsisqakunata. Chaypiqa haykuchiwasunmanmi wasinkuman. Sichus familianku imayna kasqanmanta tapusunchis, tukuy yuyaywantaq uyarisunchis kutichisqankuta chayqa, sumaqtan wasiyoqpas uyariwasunman. Huk llaqtakunapiqa allintan reqsiyta munanku watukuqkunata, chaymi napaykuqtinchis imaymanamanta tapuriwasunman pi kasqanchista yachayta munaspa. Chaymi napaykusqallanchispi unay tiempo kasunman, hinaspa wasiyoq imallamantapas ñoqanchiswan parlayta munaqtinqa Diosmanta sumaqta willasunman.

Predicasqanchispiqa yaqapaschá askha runakuna huk rimayniyoq kanku, ¿imatan ruwasunman paykunawan parlarinanchispaq? Napaykusunmanmi rimasqanku simipi, chhaynapin rikuchisunman paykunapi interesakusqanchista. Paykunapas munankumanmi ñoqanchiswan parlariyta.

Astawan parlariy

Piwanpas aschatawan parlarikunapaqqa, imachus yuyaykusqanmantan parlarisunman. Parlayta munaqtinqa sumaqllatan imamantapas tapurisunman. Chhaynapin yachasunman ima yuyaykusqanta. Llaqtapi ima sasachakuymantapas rimaspan tapusunman: “¿Imaraykun chaykuna suceden? ¿Imaynatan allichakunman?” nispa.

Imatapas tapuspanchisqa allintan uyarinanchis kutichisqanta. Chaytan rikuchisunman “arí” otaq “riki” nispanchis. Ch’inllan uyarinanchis, ama huchachaspallataq entiendenanchis ima nisqantapas. ‘Usqhaylla uyariqmi kananchis, ichaqa allin yuyaywanmi rimananchis’ (Sant. 1:19). Kutichispataq rikuchinanchis tukuy yuyaywan uyarisqanchista.

Manan llapa runachu tapuqtinchis kutichiwasun. Wakinqa ch’inllan kanqaku otaq asirikullanqaku, hukkunataq “arí” otaq “manan” nispalla kutichiwasun. Chaymi pacienciayoq kananchis, manan phiñakunanchischu nitaq mana munashaqta rimachinanchischu. Parlayta munanku chayqa, willasunmanmi Bibliamanta ima allin willakuytapas. Tiempoq pasasqanman hinaqa yaqapaschá amigonta hina qhawariwasunman, parlariytapas munankuman.

Runakunawan parlarispaqa ama tukuy tapukusqankutachu kutichisun, wakillanta kutichisun, wakintataq hukpiña kutichisunchis. Chaypaqmi nisunman: “Aschatawan chaykunamanta yacharqamusaq”, nispa, kutispataq chaymanta rimasunman. Uyariwaqninchis mana imatapas tapukuqtinri, ¿imatan ruwasunman? Paypaq hinan imatapas tapusunman, hinaspa nisunman: “Hukpiña chaymanta rimasunchis”, nispa. Chay tapuykuna kutichinanchispaqqa maskhasunmanmi Razonamiento a partir de las Escrituras nisqa qelqapi, Qhawaq, ¡Rikch’ariy! revistakunapipas.

Iñiqmasikunawan parlarisun

¿Imatan ruwasunman mana reqsisqanchis iñiqmasiwan tupaspa? ¿Ch’inllachu kananchis icha reqsiytachu munanchis? Kallpachakunanchismi reqsinanchispaq, chhaynapin rikuchisunchis iñiqmasinchiskuna munakusqanchista (Juan 13:35). Asuykuspan willasunman sutinchista, tapusunmantaq sutinta. Tapullasunmantaq: “¿Imaynapitaq Jehová Diosmanta yacharqanki?” nispa. Chayta ruwaspan sumaqta parlata tupachispa reqsinakusunman. Manaña kusa rimaqchu kanki chaypas, paywan rimanapaq kallpachakusqaykiwanqa interesakusqaykitan rikuchinki.

¿Imaynatan pi iñiqmasinchiswanpas sumaqta parlarisunman? Paypi familianpipas interesakuspan. Huñunakuy tukuqtinqa, rimasunmanmi sumaq yachachikuykuna uyarisqanchismanta, chhaynapin paywan kallpachanakusunman. Qhawaq, ¡Rikch’ariy!, revistakunapi ima sumaq yachachikuykuna leesqanchismantapas willasunmanmi, ichaqa manan p’enqachinapaq hinachu nitaq umata hoqarispachu chaytaqa ruwananchis. Rimallasunmantaqmi Bibliamanta Allin Yachachiq Kanapaq Escuelapi discurso imayna qonanchismanta otaq predicacionpi ima sucedesqanmantapas.

Runakunapi interesakusqanchismi tanqawanchis nisqankumanta ruwasqankumantapas rimananchispaq. Paykunawan parlarispaqa kusirikuspan asikusunman. Ichaqa hukkunata kallpachanapaq hinan rimananchis. Chaypaqmi Diospa Siminpi yuyaychaykunata kasukunanchis, munakunanchistaq runamasinchista (Pro. 16:27, 28; Efe. 4:25, 29; 5:3, 4; Sant. 1:26).

Predicanapaqqa preparakunchismi, riki. Amigonchiskunawan parlarinapaqpas, ¿manachu ima allin yachachikuymanta preparakusunman paykunawan rimananchispaq? Ima uyarisqanchismanta leesqanchismantapas allin kaqtan akllasunman. Chhaynapin tiempoq pasasqanman hina, umanchispi hap’isunchis allin willakuykunata hukkunawan parlananchispaq. Ichaqa imamantaña parlasunchis chaypas, allintan rikuchinanchis Diospa Simin Qelqata ancha chaniyoqpaq qhawarisqanchista (Sal. 139:17).