Uyariqkunaq allinninta maskhasun

BIBLIAQ yachachikuyninkunamanta predicaspanchisqa runakunaq sonqonman chayaqtan rimananchis. Chaytaqa ruwasunman uyariqkunapi tukuy sonqomanta interesakuspan. Qatiqninpin yachasunchis chayta imayna ruwanamanta.

Allinta qhawariy uyariqniykikunaq imapi yuyaykusqankuta. Apóstol Pabloqa allintan repararqan uyariqninkunaq imapi yuyaykusqankuta, imayna kasqankutapas. Nirqanmi: “Judío runakunawan kashaspayqa judío runa hinan ñoqapas kani, paykunata Diospaq tarinayrayku. Ñoqaqa kamachikuy simipi kaqkunawan kashaspayqa, kamachikuy simipipas kashayman hinan kawsani paykunata Diosman pusanayrayku, manaña kamachikuy simipi ñoqa kashani chaypas. Mana kamachikuy simipi kaqkunawan kashaspayqa paykuna hinan kawsani, paykunata Diosman pusanayrayku. Chaywanpas manan Diospa kamachikuynintaqa wikch’unichu, aswanpas Cristoq kamachikuyninpin ñoqaqa kashani. Pisi kallpakunawan kashaspayqa, ñoqapas pisi kallpa hinallataqmi kani, paykunatapas Diosman pusanayrayku. Lliw runapaqmi paykuna hina kani, imaynallamantapas wakinta Cristopi iñichinaypaq. Tukuy chaykunataqa Cristomanta allin willakuykunaraykun ruwani, chay willakuypa saminchanwan saminchasqa kanaypaq”, nispa (1 Cor. 9:20-23). ¿Imaynapin ñoqanchispas ‘lliw runapaq paykuna hina kasunman’?

Manaraq rimayta qallarishaspa predicanayki runata allinta qhawarinki chayqa, reparawaqpaschá imayna runachus kasqanta, imaynapi tarikusqantapas. Reparawaqmi ima llank’anayoq ima religionniyoq kasqanta, wakchachus qhapaqchus kasqantapas. Chaykunata reparaspan kallpachakuwaq paypaq hina rimanaykipaq.

Aswan allinta uyarinasuykikupaqqa ñawpaqmantan yuyaykunayki imaynatachus rimayta qallarinki chayta. Wakin llaqtakunapiqa askhan kanku wak llaqtayoqkuna. Sichus predicasqaykipi tupallanki huk llaqtayoq runakunawan chayqa, ¿ñachu yuyaykurqankiña imaynatachus paykunata rimapayanaykipaq? Diosqa munanmi “llapan runakuna qespichisqa kanankuta, cheqaq-kayta reqsinankutapas”, chayraykun kallpachakunayki paykunapaq hina allin willakuykunata willanaykipaq (1 Tim. 2:4).

Tukuy yuyaywan uyariy. Jehová Diosqa tukuy yachayniyoqmi, chaywanpas uyarinmi hukkunaq yuyaykusqantaqa. Profeta Micaiaspa willasqan hina, huk kutinmi mosqoypi hina Jehová Diosta rikusqa huk ruwanamanta angelkunata sumaqta tapushaqta. Paykunataq Diosman kutichispanku nisqaku hukkuna hukta, wakinkunataq huk-hinata. Hinan Diosqa rimasqankuta uyarispa hukninta nisqa yuyaykusqanman hina ruwananpaq (1 Rey. 22:19-22). Huk kutinpas Jehová Diosqa allintan uyarirqan Abrahamta, maypachachus Sodoma llaqtata thunichinanmanta willaqtin (Gén. 18:23-33). ¿Imaynapin Jehová Dios hina kasunman predicacionpi?

Uyariqniyki imachus yuyaykusqanmanta rimananpaqqa tapuwaqmi imatapas, hinaspa huk chhikanta suyawaq kutichinasuykipaq. Kutichisqantaqa tukuy yuyaywan uyariy, chhaynapi mana manchakuspa rimananpaq. Sichus kutichisqanpi reparanki imachus interesasqanta chayqa, sumaqllatan chayman hina hukkunatañataq tapuwaq, chhaynapi aswan allinta reqsinaykipaq, ichaqa ama nishutaqa tapupayaychu. Tapusqaykita kutichisqanmantaqa tukuy sonqo “gracias” niy, manaña allintachu kutichirqan chaypas (Col. 4:6).

Runakunapi interesakuspaqa cuidakunanchismi ama ruwanankunaman chapukunanchispaq (1 Ped. 4:15). Sichus qhari kaspanchis huk warmiwan rimasunman otaq warmi kaspanchis huk qhariwan rimasunman chayqa, imaynatachus rimanata hinallan rimananchis, mana chayqa sonqontapas suwayta munashasunman hinatan qhawariwasunman. Runakunataqa allin yuyaywanmi sumaqllata rimapayananchis, sapanka llaqtapi otaq sapanka runakuna imayna costumbreyoqchus kasqankuman hina (Luc. 6:31).

Sichus ñawpaqmanta preparakusun runakunaman imakunamantachus rimapayananchispaq chayqa, allintan imachus nisqankuta uyarisunchis, manataq yuyaykushasunchu imaynatachus kutichisunman chayta. Chhaynapin paykunapas mana manchakuspa ñoqanchiswan rimayta munanqaku.

Hukkunata allinta uyarispaqa respetasqanchistan rikuchinchis, hinallataq imachus yuyaykusqankuta allinpaq qhawarisqanchista, llakikuyninkupi kusikuyninkupi interesakusqanchistapas (Rom. 12:10). Chhaynapin sonqonkuta kuyurichisunman imachus willasqanchista uyarinankupaq. Chaychá Bibliaqa yuyaychawanchis: “Llapaykichis usqhaylla uyariq kaychis, ichaqa allin yuyaywan rimaychis”, nispa (Sant. 1:19).

Yanapay iñiyninkupi wiñanankupaq. Runakunaq allinninta maskhasun chayqa, yuyaykushallasunmi predicasqanchis runakunapi, chhaynapi wasinkuman kutispa Bibliaq yachachikuyninkunata paykunapaq hina yachachinanchispaq. Manaraq hukmanta kutispanchisqa qhawarinanchismi imaynapichus chay runa tarikushan chayta. Hinaspa preparakunanchis imachus payta llakichishan chaymanta rimananchispaq. Allintan reparachinanchis chay rimasqanchis tema ancha allinpuni kasqanta, imaynatachus yanapanman chaytapas (Isa. 48:17).

Predicasqayki runa imachus llakichisqanmanta willasunkiman chayqa, chay ratopin allin willakuykunamanta willariwaq. Llakiq ñit’isqan kaqkunataqa Jesús hina sumaqta sonqochaykuy (Mar. 6:31-34). Ama hawan ukhunta yuyaykuspaqa niychu sasachakuyninta imaynatachus allichanman chaytaqa, mana chayqa manapas cheqaqtachu paypi interesakushawaq hinatan yuyaykunman. Aswanpas sut’ita rikuchiy llakipayasqaykita (1 Ped. 3:8). Sasachakuyninta imayna aguantananpaqqa qelqanchiskunapi yanapayta maskhay, chayman hina ruwananpaq. Paypi sonqomanta interesakunki chayqa, manan hukkunaman willakachashanaykichu sasachakuyninmanta willasqasuykitaqa, imaraykupas hukman willanaykipuni kanman chayllachá willawaqqa (Pro. 25:9).

Astawanqa interesakunanchis Bibliamanta yachachisqanchiskunapin. Jehová Diosmanta mañakuy imapichus yanapanayki kanman chayta allinta reparachinasuykipaq, hinaspa chayman hina preparakuy. Chaymantapas tapukuwaqmi: “¿Imatawanmi ruwanan iñiyninpi wiñananpaq?” nispa. Chaymantataq sumaqllata chayta reparachiy Bibliaq yanapayninwan, ‘allin yuyayniyoq hunt’aq kamachiq’ ruwamusqan qelqakunaq yanapayninwan ima (Mat. 24:45). Mayninpiqa manan chaykunata sut’inchanallaykichu kanqa, paywan kuskapaschá imatapas ruwanayki kanqa, chhaynapi Bibliaq kamachikuyninta imayna hunt’ayta rikuchinaykipaq (Juan 13:1-15).

Runakunataqa allin yuyaywanmi yanapananchis Bibliaq kamachikuyninkunaman hina kawsanankupaq. Paykunaqa manan kaqllachu kanku, manataq kaqllatachu iñiyninkupipas wiñanku, chayrayku sumaq sonqo-kaywan yanapay (Fili. 4:5). Jehová Diosqa munan paykunallamanta tukuy sonqowan servinankutan. Chhaynaqa kikillanku Bibliaq kallpachasqanman hina, Diospa espiritunpa kallpachasqanman hina allin kaqta ruwachunku. Ama qanqa chaypaq nishuta mat’ipayaychu (Sal. 110:3). Wakin ruwanakunataqa sapankan decidinanchis, chaykunamanta pipas tapusuqtiykiqa ama niychu: “Ñoqaqa kaytan, haqaytan ruwayman”, nispaqa. Pay kikinmi chaytaqa decidinan (Gál. 6:5).

Imachus necesitasqankupi yanapay. Jesusqa uyariqninkunatan astawan yanaparqan Diosman asuykunankupaq, qhawarillarqantaqmi imachus necesitasqankutapas (Mat. 15:32). Ñoqanchispas manaña qhapaqchu kanchis chaypas, imaymanapin runakunataqa yanapasunman.

Hukkunapi interesakunki chayqa, paykunaq allinnintan maskhanki. Sichus nishuta paramushaqtin otaq sinchita ruphaykamushaqtin visitasqayki runa mana thakchu kashanman chayqa, chaykunamanta pakakunapaq hina k’uchumanmi puririwaq otaq niwaq hukpiña kutinaykipaq. Imaymana ruwanayoq kashaqtin visitawaq chayqa, chaymantaña kutinaykipaqmi niwaq. Sichus huk wasimasiyki otaq pi predicasqayki runapas onqosqa kashanman otaq hospitalpi kashanman chayqa, huk tarjetachatan otaq huk cartachata apachiwaq, mana chayqa qan kikiyki watukamuwaq. Atikuqtinqa apawaqmi imachallatapas mikhunanpaq otaq imapipas yanapawaq.

Yachachisqaykikunaqa iñiyninkupi wiñasqankuman hinan sapallanku rikukapunkuman, manaña ñawpaqpi reqsisqanku runakunawan huñukapusqankurayku. Chayrayku paykunaq amigon kay. Chaypaqqa sapa estudiachisqayki qhepaman paywan parlariy, hinallataq huk kutikunapipas. Kallpachaytaq allin amigokunata maskhananpaq (Pro. 13:20). Yanapay huñunakuykunaman hamunanpaq, hamuqtintaq paywan kuska tiyay, wawankuna qhawaypipas yanapay, chhaynapi llapanku huñunakuypi yachachikusqata allinta uyarinankupaq.

Tukuy sonqo allinninkuta maskhay. Runakunapi interesakunanchispaqqa manan imatapas estudiasqanchismantachu kanqa, aswanpas imayna sonqoyoqchus kasqanchismantan. Hukkunapi interesakusqanchisqa rikukunqa imayna uyarisqanchispi, imakuna nisqanchispi, sumaq sonqo-kaywan tratasqanchispi iman. Manaña imatapas nisunchu otaq ruwasunchu chaypas, uyanchispin reparakunqa tukuy sonqochus paykunapi interesakushanchis icha manachus chayta.

Jehová Dios hina munakuq khuyapayakuq kasqanchisraykun runakunaq allinnintaqa tukuy sonqo maskhanchis. Chhaynapin uyariqninchiskunata yanapanchis Jehová Diosman asuykunankupaq, paypa encargawasqanchis allin willakuykunata uyarinankupaqpas. Chhaynaqa allin willakuykunata predicaspaqa “ama pipas pay kikinpa allinnillantaqa maskhachunchu, aswanpas hukkunaq allinnintapas maskhallachuntaq” (Fili. 2:4).