Yachanankupaq hina rimay

DISCURSOYKI allinña kanman chaypas, yachanaykin imaynata chaywan uyariqniykikunata allinta yachachiyta. Chayraykun tapukunayki: “¿Imaraykun uyariqniykuna necesitanku kay yachachikuymanta uyariyta? ¿Imaynatan reparachiyman allinninkupaq kasqanta?” nispa.

Sichus escuelapi huk demostracionta ruwawaq predicacionpipas kashawaq hina chayqa, yanapaqnillaykimanmi rimaykunayki kanqa. Discurso qoqkunan ichaqa llapa iñiqmasikunaman rimaykunanku kanqa.

¿Imakunatan uyariqniykikuna yachankuña? Tapukuy uyariqniykikuna imakunatachus discursoykimanta yachankuña chayta, chhaynapi chayman hina preparakunaykipaq. Sichus uyariqniykikuna ukhupi unayña Diosta serviq cristianokuna askha tarikunkuman chayqa, ama Bibliaq qallariy yachachikuyninkunamantaqa yuyarichiq hinallachu rimay, aswanpas aswan allinta chaykunata sut’inchay. Chayllaraq huñunakuyman hamuqkunapas askha kashankuman chayqa, iskaynin t’aqapin yuyaykunayki llapankupaq hina yachachinaykipaq.

Ratollachus icha allillamantachus rimanaykipaqqa qhawarinaykin hayk’atachus uyariqniykikuna imamantapas yachankuña chayta. Sichus wakin willasqaykikunamanta yachankuña chayqa, ratolla chaykunamanta willay. Manataqchus yachanku chayqa, allillamanta willay chhaynapi sut’ita entiendenankupaq.

Allinta yachanankupaq hina willay. Discursoykiwan allinta yachachinaykipaqqa manan mosoq yachachikuykunallamantachu rimanayki. Wakin discursantekunaqa astawan entiendekunanpaq hinan sut’inchanku reqsisqa yachachikuykunatapas, chhaynapin askha uyariqkuna chayraq chaykunata allinta entiendenku.

Predicacionpi kashaspaqa huk noticiatan willawaq tukukuy tiempopi kawsashasqanchista qhawarichinaykipaq, ichaqa Bibliawanmi sut’inchanayki imarayku chay sucedesqanta. Chhaynapin runaqa allinta entiendenqa yachachisqaykita. Plantakunamanta, animalkunamanta, imarayku imapas kasqanmanta rimanki chayqa, ama cientificokunaq chayllaraq yachasqallankumanta rimaychu. Aswanpas Bibliawan qhawarichiy tukuy imapas Diospa kamasqan kasqanta. Chhaynapin uyariqniykita reparachinki imapas mana yanqallamantachu rikhurisqanta.

Sichus uyariqniykikuna askha kutitaña uyarirqanku rimasqayki temamanta chayqa, sasan kanman chay temamanta wakmanta rimay. Ichaqa allin yachachiq kayta munaspaqa yachanaykin chay ruwayta.

Chaypaqqa qelqakunatan allinta t’aqwinayki. Discursoykipiqa ama umaykiman hamusqan yachachikuykunallatachu willay, aswanpas qelqanchiskunawan yanapachikuspa allinta temaykita t’aqwiy 33-38 paginakunapi yachasqanchisman hina. Yaqapaschá t’aqwispayki tariwaq rimanayki temapaq hina ñawpa tiempopi imapas sucedesqanmanta huk allin willakuyta otaq noticiakunapi yachawaq chayllaraq imapas sucedesqanmanta.

Discursoykita preparakushaspaqa tapukuy imachus, imaraykuchus, hayk’aqchus, imaynapichus, maypichus imapas kasqanta. Tapukuwaqmi: “¿Imaraykun kay yachasqay cheqaqpuni? ¿Imaynatan chayta rikuchiyman? ¿Ima creenciakunan wakin runakunata hark’an Bibliaq yachachikuyninpi iñinankupaq? ¿Imaraykun kay yachachikuy importante? ¿Imaynatan runakunata yanapanman? ¿Imaynatan rikuchiyman chayman hina ruwayqa allinpuni kasqanta? ¿Imatan chaywan yachanchis Jehová Diosmanta? ¿Hayk’aqmi kaykuna sucederqan? ¿Imapaqmi kay yachachikuy allin kanman?” nispa. Chaykunamanta wakin tapuykunataqa discursoykita qoshaspapas tapuwaqmi hinaspa kutichiwaq, chhaynapi discursoyki sumaq uyarinapaq hina kananpaq.

Uyariqniykikuna reqsinkuña leesqayki textokunata chayqa, kallpachakuy chaykunata astawan sut’inchanaykipaq.

Huk textota allinta entiendechinaykipaqqa sapaqchawaqmi chaypi kaq simikunata, hinaspa discursoykiq temanman hina chaykunata sut’inchawaq. Miqueas 6:8 textota t’aqwishaspaqa tapukuwaqmi: “¿Iman kay textoq willasqanpi ‘chanin-kay’? ¿Piqpa chanin kamachikuyninkunamantan rimashan? ¿Imataq ‘khuyapayakuq huch’uyyaykukuq’ kayri? ¿Imaynan chhayna kasunman kurakña kashaqkunapas?” nispa. Huk textota imayna sut’inchanaykipaqqa allintan qhawarinayki discursoykiq temanta, pikunapaqchus imapaqchus kasqanta, hayk’a tiempopichus ruwanki chaytapas.

Mana sut’i entiendey simikunataqa sut’inchanaykipunin. Wakin runakunaqa manan entiendenkuchu imachus ‘qhapaq suyu’ kasqanta, chaymi sut’inchana chay simita (Mat. 6:10). Unayña cristiano kaqkunapas aswan allintan huk textota entiendenkuman chaypi kaq simikunata sut’inchaqtiyki. 2 Pedro 1:5-8 texton rimashan ‘iñiymanta, allin kawsaymanta, yachaymanta, cuerpowan kasuchikuymanta, pacienciakuymanta, Dios sonqo kaymanta, wawqe-pana munakuymanta, llapa runa munakuymanta’ ima. Textota leesqayki qhepamanmi chaykunata astawan sut’inchawaq. Proverbios 2:1-6 textopin willakushan reqsiymanta, yachaymanta, allin yuyaymanta, allin reparaymantawan. Chay simikunaqa kaqllamantapas rimashanman hinatan mayninpi entiendekunman, chaymi chaykunatapas allinta sut’inchana kanman.

Huk textota sut’inchaspaykiqa allintan uyariqniykikunata yachachinki. Askha runakunan Jueces 14:6 textota leespa reparanku santo espirituqa mana huk dioschu kasqanta, aswanpas Diospa kallpan kasqanta. Huk kutinmi Jesús saduceokunaman rikuchirqan kawsarimpuymanta yachachikuy cheqaq kasqanta Éxodo 3:6 textomanta willaspa, paykunaqa allintan chay textota reqsirqanku (Luc. 20:37, 38).

Mayninpiqa huk textota leespaqa sut’inchanan imakuna sucedeshaqtinchus chay qelqakusqanta, pimantachus chaypi rimashasqantapas. Fariseokunaqa allintan yacharqanku Salmo 110 capitulopi nisqanta. Chaywanpas paykunaqa manan allintachu entienderqanku huk versiculoq nisqanta. Chayta sut’inchananpaqmi “Jesusqa paykunata tapurqan: –¿Ima ninkichistaq Cristomanta? ¿Piqpa Churintaq? nispa. Paykunataq nirqanku: –Davidpa Churinmi nispa. Chaymi Jesusqa paykunata nirqan: –¿Imaynataq Davidqa Santo Espirituq yuyaychasqan kaspa Cristota: “Señor”, nispa suticharqan? Davidmi nirqan: Señor Diosmi Señorniyta nirqan: “Paña ladoyman tiyaykuy, Awqaykikunata chaki sarunaykiman churanaykama”, nispa. Kikin Davidtaq Cristota “Señor”, nispa nin chayqa, ¿imaynapitaq Davidpa Churinqa kanman?” nispa (Mat. 22:41-45). Jesús hina textokunata allinta entiendechisun chayqa, uyariqninchiskunatan yanapasun tukuy yuyaywan Bibliata leenankupaq.

Sichus willanki Bibliapi huk libro ima watapi maypi qelqakusqanta chayqa, willanallaykitaqmi chay tiempopi kawsay imaynachus kasqantapas. Chhaynapin uyariqniykikuna aswan allinpaq qhawarinqaku chay libropi willakusqanta.

Chaymantapas allinta entiendechinaykipaqqa tupanachiwaqmi wakin yachachikuykunata. Tupanachiwaqmi imamantapas ima ninkun runakuna imatataqchus Biblia nin chayta, otaq tupanachiwaq imaynatachus huk qelqaq Bibliapi huk willakuyta qelqarqan imaynatataqchus hukkaq qelqaq qelqarqan chayta, hinaspa qhawarichiwaq imata chaymanta yachasqanchista. Chhaynapin uyariqkuna aswan allinta entiendenkuman.

Dios serviyninchispi huk ruwananchismanta rimanayki kanman chayqa, qallarishaspan pisillapi willariwaq chayta imayna ruwanamanta. Allinta rikuchiy imarayku Jehová Diospa testigonkuna chay llank’ayta aparinanchis kasqanta. Hinaspa sut’ita willay maypichus, hayk’aqchus, imaynatachus chayta ruwananchista.

¿Imatan ruwawaq ‘Diospa ukhu sonqonmanta’ otaq t’aqwina yachachikuyninkunamanta rimanayki kaqtin? (1 Cor. 2:10). Ñawpaqtaqa wakin allin yachachikuykunamantaraqmi rimawaq, chhaynapin chayman qatiq yachachikuykunata allinta entiendenqaku. Chaymantapas tukushaspayki pisillapi yuyarichinki imakunamanta rimasqaykita chayqa, uyariqniykikunan kusikunqaku allinta entiendesqankurayku.

Allinta yuyaychay cristianokuna imayna kawsanankumanta. Uyariqkuna yachachisqaykita allinta hap’ikunankupaqqa, allintan rikuchinayki imarayku allinninkupaq kasqanta. Discursoykipi kaq textokunata t’aqwishaspan khaynata tapukuwaq: “¿Imaraykun kay simikuna kunankamapas Bibliapi qelqasqa kashan?” nispa (Rom. 15:4; 1 Cor. 10:11). Qhawariy imakunapichus uyariqniykikunata yanapawaq chayta, hinaspa Bibliapi maskhay chayman hina yuyaychanaykipaq. Discursota qoshaspaykiqa allinta rikuchiy imaynatachus Biblia paykunata yanapanman chayta. Sut’ita yuyaychay imakunapichus allinyanankuta.

Huk discursota qonayki kanqa chayqa, kallpachakuy kaypi yachasqanchis huk otaq iskay yachachikuyman hina ruwanaykipaq. Chaymantañan atisqaykiman hina wakin yachachikuykunaman hinaqa ruwawaq. Chhaynapin uyariqniykikunaq allinninpaq yachachinki, paykunataq kusikuywan suyakunqaku discursoykikunata uyarinankupaq.