Imatapas qhawachispa yachachiy

IMATAPAS qhawachispa yachachinki chayqa, aswan allintan imatapas entiendechinki. Jehová Dioswan Jesucristowanqa chhaynatan yachachirqanku, paykunamantan anchata yachasunman. Imatachus yachachishasqanchista allinta sut’inchasun imatapas qhawachispa chayqa, rikuspanku uyarispanku iman aswan allinta yachachisqanchista entiendenqaku chayman hina ruwanankupaq. ¿Imaynatan chhaynata yachachisunman? ¿Imaynatan yachasunman chaykunawan allintachus yachachishanchis chayta? Chaymantan qatiqninpi yachasunchis.

Ancha Allin Yachachiqkunamanta yachasun. Jehová Diosqa imaymanata qhawachispan ancha valorniyoq yachachikuykunata yachachirqan. Tutapi Abrahamta hawaman pusaspan nirqan: “Qhawariy hanaq pachata, hinaspa ch’askakunata yupay, ¿atiwaqchu chaykunata yupayta? Chay hinan mirayniykiqa kanqa”, nispa (Gén. 15:5). Chay promesa sasa creenapaq hinaña karqan chaypas, Abrahamman Diospa qhawachisqanqa sonqonman chayaqmi karqan, chaymi payqa iñirqan chay promesapi. Huk kutitaq Jehová Diosqa Jeremiasta kacharqan manka ruwaqpa wasinta, chaypi t’uruwan imayna llank’asqanta rikumunanpaq. Chaywanmi rikuchirqan Kamaqqa runawan ima munasqantapas ruway atisqanta (Jer. 18:1-6). Jonasmanpas huk calabazawanmi yachachirqan khuyapayakuq kayta (Jon. 4:6-11). Wakin profetakunatapas kamachirqanmi hukkuna rikushaqtinku imaymanata ruwaspa imatapas willanankupaq (1 Rey. 11:29-32; Jer. 27:1-8; Eze. 4:1-17). Dios yupaychana karpapas wasipas huk rikch’anachiy hinan karqan hanaq pachapi kaqkunata entiendenanchispaq (Heb. 9:9, 23, 24). Chaymantapas Jehová Diosqa importante willakuykunataqa huk mosqoypi hina qhawachispan willarqan (Eze. 1:4-28; 8:2-18; Hech. 10:9-16; 16:9, 10; Apo. 1:1).

Jesuspas chay hinatan yachachiq. Fariseokunawan Herodespa t’aqanmanta kaqkunapiwan urmachiyta munaqtinkun, Jesusqa nirqan impuesto pagana qolqeta rikuchinankupaq, haywaqtinkutaq tapurqan: “¿Piqpa uyantaq kaypi kashan?” nispa. Kutichiqtinkutaq nirqan: “Roma rey Cesarpa kaqtaqa payman qopuychis, Diospa kaqtataq Diosman qopuychis”, nispa (Mat. 22:19-21). Jehová Diosta tukuy kaqninchiswan yupaychanapaqmi yupaychana wasipi huk wakcha viudata qhawachispa allinta rimarqan iskay qolqecha churasqanmanta, paymi churarqan tukuy kawsananpaq kaqta (Luc. 21:1-4). Huk kutitaq huk wawachata qhawachispa yachachirqan ama hatunchakuqchu kanankupaq, aswanpas k’umuykukuq kanankupaq (Mat. 18:2-6). Chaymantapas qatikuqninkunaq chakinta mayllispan yachachirqan huch’uyyaykukuq kayta (Juan 13:14).

¿Imaynatan imatapas qhawachispa yachachisunman? Ñoqanchisqa manan Jehová Dios hinaqa rikhuriykunawan imatapas willayta atisunmanchu, ichaqa qelqanchiskunapi dibujokunata qhawachispaqa allintan pitapas yuyaymanachisunman. Chaykunawanmi Bibliamanta yachay munaqkunaman qhawarichisunman Diospa prometewasqanchis Paraíso imaynachus kanqa chayta. Estudiota qoshaspaykipas estudianteman qhawachiy estudiashasqaykichis temawan tupaq dibujota, hinaspa tapuy imatachus chaypi rikusqanta. Rikhuriykunata rikuchispan Jehová Diosqa profeta Amosta tapurqan: “Amós, ¿imatan rikushanki?” nispa (Amós 7:7, 8; 8:1, 2). Chhayna tapuykunawanmi ñoqanchispas uyariqninchiskunata yuyaymanachisunman ima dibujotapas qhawachispa.

Biblian willan ‘qanchis watakunamanta’, ‘qanchis chunka semanakunamanta’ ima, ¿Imaynatan chay hina profeciakunata allinta entiendechisunman? Huk rayata dibujaspan qhawarichisunman imapas ima tiempopichus sucedesqanta (Dan. 4:16; 9:24). Chaykunaqa askha qelqanchiskunapin rikhurin.

Sichus Familiantin Diosta Yupaychanaykichispi yachanaykichis kanman Dios yupaychana karpamanta otaq wasimanta, rikhuriypi Ezequielpa rikusqan yupaychana wasimantapas chayqa, dibujokunawanmi chaykunataqa aswan allinta entiendewaqchis, chaypaqqa qhawawaqchis Perspicacia para comprender las Escrituras nisqata, Traducción del Nuevo Mundo de las Santas Escrituras (con referencias) nisqapi apéndice nisqata, Qhawaq revistakunatapas.

Familiantin Bibliata leespaykichisqa mapakunawan yanapachikuychis. Mapapi qhaway maynintas Abraham purirqan Urmanta lloqsispa Haranman chayananpaq, hinaspa Betelman chayananpaqpas chayta, maynintas Israel runakuna purirqanku Egiptomanta Prometesqa Hallp’aman chaytapas. Qhaway Israelpi sapanka ayllukunaq chaskisqanku hallp’a maypichus maykamachus kasqanta, imayna hatunchus karqan Salomonpa kamachisqan hallp’apas chayta. Qhawallaytaq Eliaspa Jezreelmanta Beersebakama ch’inneqman purisqanta, payqa chayman ayqerqan Jezabel wañuchiyta munaqtinmi (1 Rey. 18:46–19:4). Chaymantapas qhaway ima llaqtakunapichus Jesús predicarqan chayta, Hechos libropi willasqan hina apóstol Pabloq may llaqtakunaman purisqantapas.

Biblia estudiaqkunaqa aswan allintan Diospa llaqtanta reqsinqaku chaypi imapas imaynachus kasqanta rikuchiqtinchis. Hatun huñunakuypaq programapin qhawachiwaq ima temakunamantachus rimakunqa chayta. Askha runakunan allinpaq Diospa llaqtanta qhawarinku Huñunakuy Wasiman otaq Betelman rispanku, chaypin paykunaqa reparanku contranchispi ima mana allin rimasqankupas mana cheqaqchu kasqanta. Huñunakuy Wasita pimanpas reqsichispaykiqa allinta reparachiy imaynapi huk religionkunaq huñunakunanku wasikunamanta hukniray kasqanta. Qhawarichiy chay wasiqa chaypi yachachikusqata allinta hap’inapaq hina kasqanta. Rikuchiy qelqanchiskunata maypi rakikusqanta, predicananchispaq mapakunata, contribucionta churanapaq cajachakunatapas (chaykunaqa manan qolqeta mañanapaq platillokuna hinachu).

Umalli T’aqaq ruwamusqan videokuna makiykipi kashan chayqa, chaykunawan hukkunata yanapay Bibliaq yachachisqanpi confianankupaq, Biblia estudiaqkunapas ima llank’aytachus aparisqanchismanta allinta yachanankupaq, Bibliaq nisqanman hina kawsanankupaqpas.

Askha runaman rimaykuspayki. Askha runaman yachachishaspaqa qhawachisunmanmi dibujokunata otaq imatapas, chhaynapi allinta entiendenankupaq. Chay hinata yachachinanchispaqqa imaymanatan qomuwanchis allin yuyayniyoq hunt’aq kamachi.

Qhawaq revistata estudiachiqqa chaypi dibujokunaq kasqanwanmi allin yachachikuykunata sut’inchanman, chhaynallatataqmi ruwanman Biblia Estudianapaq Huñunakuypi estudiachiqpas.

Mayninpiqa Llapa Runapaq Huñunakuypi discursota qoshaspaykiqa atiwaqmi imatapas qhawachispa yachachiyta. Chaywanpas astawanqa Bibliawanmi yachachinayki, chayta yaqa llapan uyariqniykikuna hap’isqankurayku. Huk dibujota otaq imatapas rikuchispa huk allin yachachikuyta sut’inchanayki kanman chayqa, qhepapi tiyaqkunapas sut’ita rikumunankupaq hinan chayta ruwanayki. Ichaqa necesitakusqanman hinallan imatapas qhawachinayki, manan nishutaqa.

¿Imapaqmi yachachinanchis imatapas qhawachispa? Manan uyariqninchiskunata asichinapaqchu, aswanpas ima yachachikuytapas allinta reparachinapaq, allinta entiendechinapaq, imaraykus imapas allin kasqanta sut’inchanapaqwanmi. Imamantachus rimashasqanchisman hina imatapas qhawachispa sumaqta yachachisun chayqa, allintan sonqonkupi chayta hap’inqaku, unay watakunataqmi yuyarinqakupas.

Runakunaqa aswan allintan yachanchis rikuspa uyarispa ima. Chaychá allin yachachiqkunaqa imatapas qhawachispa yachachirqanku. Chhaynaqa qanpas kallpachakuy paykuna hina yachachinaykipaq.