Allinta yuyaychay

UMALLI cristianokunaqa ‘cheqaq yachachikuyta yachachispan hukkunata kallpachananku’ mayninqa yaqapaschá sasachakuykuna kaqtin (Tito 1:9). Bibliaq nisqanman hina allinta yuyaychaspan iñiqmasikunata ‘kallpachashanallankupuni’ (1 Tim. 4:13). Kay yachachikuyqa iñiq t’aqapi umallikunapaq chay ruwayta aypay munaqkunapaqwanña chaypas, yanapanqan tayta-mamakunatapas wawankuta kallpachanankupaq, hinallataq Bibliamanta yachachiqkunata estudiantekunatapas.

¿Imakuna kaqtinmi yuyaychana? Bibliapiqa willanmi imaynatas ñawpa tiempopi yuyaychaqku chayta. Chaykunamanta yachayqa yanapawasunmi imapas kaqtin chhaynata yuyaychanapaq. Apóstol Pedron umallikunata kallpacharqan Diospa ovejankunata allinta michinankupaq (1 Ped. 5:1, 2). Apóstol Pablopas Titotan nirqan waynakunata “allin yuyayniyoq kanankupaq” yuyaychananta (Tito 2:6). Iñiqmasikunatapas yuyaycharqanmi ‘huk sonqolla kawsanankupaq’, t’aqanachiyta munaq runakunamanta karunchakunankupaqpas (1 Cor. 1:10; Rom. 16:17; Fili. 4:2). Tesalónica llaqtapi iñiq t’aqapi cristianokunatan allinkuna ruwasqankumanta nirqan: “Kusa”, nispa. Ichaqa kallpacharqanmi aswan-aswantaraq yuyaychay chaskisqankuman hina ruwanankupaq (1 Tes. 4:1, 10). Pedrotaq iñiqmasinkunata rogakurqan ‘aychaq millay munasqankunata amapuni ruwanankupaq’ (1 Ped. 2:11). Judastaq iñiqmasikunata kallpacharqan ‘iñiypi qaqatapuni sayanankupaq’, aychankuq munasqanta ruwaq runakuna ukhupi kawsasqankurayku (Jud. 3, 4). Llapa cristianokunatapas yuyaycharqanmi paykunapura kallpachanakunankupaq, chhaynapi ama mayqenpas huchaq q’otusqan kaspa sonqonta rumiyachinanpaq (Heb. 3:13). Pedrotaq Cristopi mana iñiq judío runakunata rogakurqan: “Waqllisqa miray runakunamanta t’aqakuychis”, nispa (Hech. 2:40).

Qhawarisqanchisman hina, ¿imaynatan yuyaychananchis Bibliaq nisqanman hina ruwanankupaq? ¿Imaynatan sumaqllata mana obligaspa chayta ruwasunman?

“Munakuywanmi” yuyaychananchis. Sichus mana ‘munakuywanchu’ yuyaychasun chayqa, sonqonkutan k’irisunman (File. 9). Discursota qoqqa imayna kunkawan rimaspan rikuchinan usqhaylla imatapas ruwananku kasqanta. Ichaqa sonqomantan sut’ita rimanan, chhaynata ruwaspaqa uyariqkunaq sonqonmanmi chayanqa. Tesalónica llaqtapi iñiqkunatan Pablo nirqan: “Yachallankichistaqmi sapankaykichista kallpachasqaykutapas sonqochasqaykutapas, imaynan taytaqa wawankunapaq ruwan hinata”, nispa (1 Tes. 2:11). Chay tiempopi umallikunaqa iñiqkunata munakuspan yuyaycharqanku, qantapas chay hina munakuymi kallpachanasuyki uyariqniykikunata yuyaychanaykipaq.

Sumaq simiwan rimay; allin yuyaywan mana phiñachiq hinalla. Ichaqa “Diospa lliw yuyaykusqantaqa mana pakaykuspan” willanayki (Hech. 20:27). Yuyaychayta chaskikuq runaqa manan phiñakunqachu nitaqmi cheqnikusunkichu (Sal. 141:5).

Manaraq iñiqmasiykikunata yuyaychashaspaqa, imachus allin ruwasqankumanta sonqomanta “kusa” ninayki. Chaypaqqa yuyaykunaykin allinkuna ruwasqankupi, allin iñiyniyoq kasqankupi, munakuq kasqankurayku kallpachakusqankupi, sasachakuykunapi tarikuspa aguantasqankupipas (1 Tes. 1:2-8; 2 Tes. 1:3-5). Chaywanmi reparanqaku paykunata ancha allinpaq qhawarisqaykita entiendesqaykitapas. Chhaynapin ima yuyaychasqaykitapas kasukunqaku.

‘Tukuy pacienciawanmi’ yuyaychana. Tukuy ‘pacienciawanmi’ yuyaychana (2 Tim. 4:2). ¿Imataq pacienciakuyri? Ima mana allinkunatapas mana pisipaspa aguantaymi. Pacienciakuqqa mana pisipaspan suyan uyariqninkuna yuyaychasqanman hina ruwanankuta. Chay yuyaywan iñiqmasikunata yuyaychakuqtinqa reparanqakun allinkunata ruwanankupaq paykunapi confiakusqanta, chaymi tukuy atisqankuta ruwanqaku Diosta servinankupaq (Heb. 6:9).

“Cheqaq yachachikuyta yachachispa” yuyaychana. ¿Imaynatan huk umalli “cheqaq yachachikuyta yachachispa” hukkunata yuyaychanman? Bibliamanta allinta yachachispa (Tito 1:9). Yuyaykusqaykiman hina anyanaykimantaqa Diospa Siminpi nisqanman hina yuyaymanachiy, chaykunan yanapasunki imachus ninaykipaq. Imachus rimasqaykiwan reparachiy Bibliapi kamachikuykunaman hina ruwayqa allinninchispaq kasqanta. Diospa kamachikusqanta mana kasukuspaqa imaymana sasachakuykunapin tarikusun kunanpas hamuq tiempopipas, chaykunamanta allinta qhawarichispa uyariqniykikunata yanapay allin kaqta ruwanankupaq.

Uyariqniykikunata allinta reparachiy imatas ruwananku, imaynatas chayta ruwanankuta. Hinaspapas sut’itan reparachinayki Bibliamantapuni chay yuyaychaykuna kasqanta. Bibliaqa manan llapa ruwananchistachu niwanchis chaymi allin yuyaywan imatapas decidinankupaq kallpachana. Discursoykita tukushaspataq yapamanta yuyaychay nisqaykiman hina ruwanankupaq.

“Mana manchakuspa” yuyaychana. Allinta yuyaychanapaqqa mana manchakuspan sut’ita rimana (1 Tim. 3:13). ¿Atikunmanchu chhayna rimayta? Arí, sichus rimasqaykita ‘qan kikiyki kawsayniykipi ruwashanki’ chayqa, atikunmi (Tito 2:6, 7; 1 Ped. 5:3). Chhaynata ruwaqtiykiqa reparanqakun mana rimayllachu rimasqaykita. Ruwasqaykita hinataq ruwanqaku imaynan qanpas Cristoq ruwasqanta hina ruwanki hinata (1 Cor. 11:1; Fili. 3:17).

Bibliaq nisqanman hina munakuywan yuyaychaspaqa, allinpipunin imapas tukunqa. Yuyaychaqkunaqa tukuy atisqankutan ruwananku chay ruwanankuta allinta hunt’anankupaq (Rom. 12:8).