Llapa runakunata munakusun

WAKIN runakunan jujkunata cheqnikunku juj llaqtamanta otaq juj rimayniyoq kasqanrayku. ¿Allinchu kanman chaykunarayku jujkunata cheqnikuy?... Manan allinchu kanman ¿riki?

¿Ima ninkin qan runamasinkuta cheqnikuq runakunamanta?... Arí, paykunaqa manan allintachu ruwashanku, manataqmi runamasinkuta munakunkuchu. Noqanchisqa manan pitapas jujniray kasqanraykuqa cheqnikunanchischu.

¿Reqsinkichu juj colorniyoq otaq juj rimayniyoq runata?... Yaqapaschá reqsillankitaq onqosqanrayku otaq accidentakusqanrayku juj jina uyayoq runakunatapas. ¿Munakunkichu chhayna runakunata?...

Sichus juj llaqtayoq otaq juj colorniyoq runakunata munakusun chayqa, Jesús jinan kasun. Ichaqa manan llapa runakunachu chayta ruwanku. Chaymi Jesús juj sumaq willakuyta willaran llapa runakunata munakunapaq. Chaymanta yachasun.

Juj llaqtayoq runakunata cheqnikuq runan Jesusman achhuykuspa tapuran: “Yachachikuq, ¿imatan ruwanay wiñay kausayta chaskinaypaq?”, nispa. Chay runaqa sonqonpin nisharan: ‘“Llaqtaykipi runakunatan munakunayki” nispachá niwanqa’, nispa. Chay piensasqanta yachaspan Jesús tapuran: “¿Iman kamachikuy simipi qelqasqa kashan?”, nispa.

Jinan chay runa kutichiran: “‘Jehová Diosniykitan munakunki tukuy sonqoykiwan, runamasiykitapas qan kikiykita jina munakunki’ ninmi”, nispa. Chaymi Jesús niran: ‘Allintan ninki; chayta ruwashallay, jinan wiñay kausayta chaskinki’, nispa.

Chay runaqa cheqnikuranmi juj llaqtayoq runakunata. Chaymi mana yachaqman tukuspa Jesusta tapuran: “¿Pipunitaq runamasiyri?”, nispa. Payqa kay ninantan munashanman karan: “Runamasiykiqa amigoykikunan, qan jina rijch’ayniyoq runakunan”, nispa. Chaymi Jesusqa juj llaqtamasinmanta, juj llaqtayoq runamantawan willaran.

Juj runas Jerusalén llaqtamanta Jericó llaqtaman rishasqa. Jinas chay runata suwakuna qolqenta p’achantawan suwasqaku. Chaymantas maqaykusqaku jinaspa sinchi k’irisqata wijch’uspa pasapusqaku.

Chay qhepallamansi juj sacerdote chay ñanninta pasashaspa k’irisqa runata rikusqa. ¿Imatan qan ruwawaq karan chaypi tarikuspa?... Chay sacerdoten ichaqa chimpallanta pasasqa. Manas yanaparisqachu.

Chayllamansi Jerusalén templopi serviq runa chay ñanninta pasaspa k’irisqa runata rikullasqataq. Payri, ¿yanapariranchu chay runata?... Manan yanapariranchu. Sacerdote jinan chay runapas pasapuran.

Chay qhepamansi Samaria llaqtayoq runa rijurimusqa. Payqa qhepata jamuq runan kashan, ¿rikushankichu?... Samaria llaqtayoq runakunaqa manan judío runakunawan sumaqtachu kausaqku (Juan 4:9). Ichaqa, ¿imatan ruwaran k’irisqa runata pampapi rikuspa? ¿Niranchu: “Kay judío runaqa mana noqataqa yanapariwanmanchu. Manan noqapas yanapaymanchu”, nispa?

Samaritano runaqa khuyapayaranmi k’irisqa runata. Manas jinataqa saqerpariyta munasqachu. Chaysi asnonmanta uraykuspa judío runaman achhuykusqa. Jinas aceiteta vinotawan orqospa k’irinkunata jampisqa.

Samaritano runaqa munayllatas runata asnonman wichachisqa. Jinas susigollawan apasqa alojakuna wasiman chayanankukama. Chaypis juj cuartota alquilaspa k’irisqa runata cuidasqa.

Chayta willayta tukuspan Jesusqa tapuqnin runata niran: ‘Chay kinsantinkumanta, ¿mayqenmi karan k’irisqa runaq runamasin?’, nispa. ¿Ima ninkin qan? ¿Sacerdotechu, religioso runachu, icha Samaria llaqtayoq runachu?...

Arí, chaytan chay runapas kutichiran, niranmi: “Payta khuyapayaykuqmi”, nispa. Jinan Jesusqa niran: “Phaway qanpas chhaynallatataq ruwamuy”, nispa (Lucas 10:25-37).

Ancha munay willakuymi chayqa ¿riki? Jesuspa yachachisqan jina, runamasinchisqa manan amigollanchischu. Manan llaqtanchismanta runallachu nitaq rimasqanchis simita rimaqllachu. Jesusmi yachachiwanchis piña kaqtinpas, maymantaña kaqtinpas, llapa runakuna munakuyta.

Jehová Diospas llapa runakunatan munakun. Chaymi Jesús niran: ‘Jehová Diosqa intintan lloqsichimun millay runakunapaq allin runakunapaqpas, parachimullantaqmi allin runakunapaq mana allin runakunapaqpas’, nispa. Chaymi noqanchispas Dios jina llapa runakunata munakunanchis (Mateo 5:44-48).

¿Imatan qan ruwanayki juj k’irisqa runata rikuspa?... Arí. Sichus juj llaqtamanta otaq juj colorniyoq runa kanman chayri, ¿yanaparinaykichu? Paykunatapas yanaparinaykin. Sapallayki mana atispaqa kuraq runata wajawaq. Yaqapaschá wajawaq policiata otaq profesorniykita. Chayta ruwaspan samaritano jina munakuq kasqaykita rikuchinki.

Jesusqa munanmi llapa runakuna munakunanchista. Munanmi piña otaq maymantaña kaqtinpas, llapa runakuna yanapananchista. Chaymi payqa chay sumaq willakuyta willaran.