¿Pin yanapawasun llakisqa kaqtinchis?

¿YAQACHU mayninpi llakisqa kanki otaq sapayki sientekunki?... ¿Yaqachu niranki: “Manan pipas munakuwanchu”, nispa?... Wakin wawakunaqa chhaynatan sientekunku. Ichaqa Jehová Diosmi prometewanchis: ‘Manan noqaqa qonqasaykichu’, nispa (Isaías 49:15). Anchatan kusikunchis chay promesata yachaspaqa ¿riki?...

Bibliata qelqaq runan niran: ‘Taytayña mamayña wijch’upuwanqa chaypas, qan Jehová Diosmi uywakapuwanki’, nispa (Salmo 27:10). Chay nisqanqa anchatan kallpachawanchis ¿riki?... Diospunin niwanchis: ‘Ama manchakuychu, qanwanmi noqaqa kashani, noqan yanapasayki’, nispa (Isaías 41:10).

Mayninpin ichaqa Jehová Dios jinallata qhawan Satanás pruebaman churawananchista. Juj kutinmi Satanás Jesusta sinchita ñak’arichiran, Chaymi Jesusqa Diosta niran: “Diosníy, Diosníy, ¿imaraykun saqerpariwanki?”, nispa (Mateo 27:46). Ñak’arisharanña chaypas, Jesusqa yacharanmi papan munakusqanta (Juan 10:17). Jinaspapas yacharanmi Dios serviqkunata Satanás pruebaman churasqanta ñak’arichisqantapas. Chaymantañan chaytaqa yachasun.

Wawa kaspaqa imaymanamantan manchakunchis ¿riki? ¿Jayk’aqllapas chinkarurankichu?... ¿Manchakurankichu sapayki kaspa?... Llapa wawakunapas manchakunkun sapanku kaspaqa. Juj kutinmi Jesús chinkasqa ovejachamanta willaran. Chayta kunan yachasun.

Ovejakunaqa juch’uyllan kanku manataqmi nishu kallpayoqchu kanku. Chaymi necesitanku jujkunaq cuidananta. Chaymi juj michiq paykunata cuidan. Qanpas juj ovejacha jinan kanki.

Jesusmi willaran pachaj ovejayoq runamanta. Campopi michishaqtinsi juj oveja chinkarusqa. Chay ovejaqa paseaq jinachá juj ladota pasaran. Ichaqa pisi-pisimantas astawan karunchakusqa. Chaymantataq sapallan rikukapusqa. ¿Imaynan chay ovejacha sientekuran sapallan rikukuspa?...

¿Imatan oveja michiq ruwaran? ¿Niranchu: “Paytaq t’aqakun chayqa, jinayá chinkachun”, nispa? Icha, ¿99 ovejakunata saqespachu chay ovejata maskhaq riran? ¿Allinchu kanman juj ovejaraykulla campoman kutiriy?... Sichus qan chay chinkasqa ovejacha kawaq karan chayri, ¿munawaqchu qanta maskhaq kutimunankuta?...

Oveja michiqqa llapa ovejankunatas munakusqa. Chaysi chinkasqa ovejanta maskhaq kutisqa. Maytachá chinkasqa ovejachaqa kusikuran dueñonta rikuruspa. Oveja michiqpas anchatas kusikusqa ovejanta tariruspa. 99 ovejankuna saqemusqanmantaqa chay ovejachamantas astawanqa kusikusqa. Jesuspa willasqanpi jina, ¿pin chay oveja michiq jina? ¿Pin noqanchistapas cuidawanchis?... Arí, Jehová Diosmi.

Jehová Diosqa llaqtantan ovejakunata jina cuidan. Llapa serviqninkunatan munakun, qan jina wawakunatapas munakunmi. Payqa manan munanchu mayqenninchispas ñak’arinanchista wañunanchistapas. ¡Maytan kusikunchis cuidawasqanchismanta! (Mateo 18:12-14.)

¿Creenkichu Dios kasqanpi?... ¿Papaykita otaq cuidaqniykita jinachu payta rikunki?... Jehová Diosqa espíritu cuerpoyoqmi, chaymi mana rikusunmanchu. Chaywanpas payqa llapanchistan rikuwashanchis, yachanmi imakuna necesitasqanchistapas. Jinaspapas juj runawan jinan paywanqa parlasunman. Jehová Diospunin munan paywan parlananchista.

Chhaynaqa, ¿imatan ruwanayki llakisqa otaq sapayki sientekuspa?... Arí, Jehová Dioswanmi rimanayki. Payman achhuykunki chayqa paymi yanapasunki kallpachasunki ima. Maskhasun Biblianchispi Salmo librota, 23 capitulota, 1, 2 versiculokunata. Chaypin nin: ‘Jehová Diosmi michiwaqniyqa, manan imapas pisiwanchu. Llullu q’achu-q’achupin samachiwan, suchuq unu qayllamanmi pusakuwan’, nispa.

4 versiculopin kayta nillantaq: ‘Manchakunapaq wayq’onta purispapas, manan ima mana allintapas manchakunichu noqawan qan kashasqaykirayku, taunaykin jark’aykuwan, varaykin waqaychawan’, nispa. Chhaynan sientekunku Jehová Diosta adoraq runakunaqa. Ima llakipiña kaqtinkupas, Diosmi paykunataqa yanapaykun. Qanri, ¿chhaynatachu sientekunki?...

Munakuywan ovejata michiq jinan Jehová Diosqa noqanchistapas cuidawanchis. Payqa allin ñannintan pusawanchis, chaynintan purinanchis. Ima sasachakuykunaña kaqtinpas, mana manchakuspan payta qatikunanchis. Michiqqa juj k’aspita jap’iykuspan ovejakunata michin. Chay k’aspiqa millay animalkunata manchachinanpaqmi. Rey Davidpas waynallaraq kashaspaqa ovejatan michiran. Chaypin payqa leontapas osotapas wañuchiran ovejanta mijuyta munaqtinku (1 Samuel 17:34-36). Kay tiempopi Diospa llaqtanqa yachanmi chhaynata Jehová Dios cuidasqanta. Chaymi mana imamantapas manchakunchu.

Jehová Diosqa munakunmi ovejankunata chaymi llapankutapas sumaqta cuidan. Biblian nin: ‘Uywa michiq jinan llaqtanta michin, uñakunatan marq’ayninpi apan’, nispa (Isaías 40:11).

¿Imaynan sientekunki chayta yachaspa?... ¿Munawaqchu Diospa ovejachan kayta?... Ovejankunaqa michiqninkutan kasukunku paypa ladollanpin kashankupas. Qanri, ¿kasukushankichu Diosta?... ¿Paypa ladonpichu kashanki?... Chaykunata ruwanki chayqa Jehová Diosmi ladollaykipi kanqa, manataqmi imamantapas manchakunkichu.