Allin michiqmanta, oveja kanchakunamantawan

Judea ladopi yachachishaspan Jesusqa rimaran ovejakunamanta oveja kanchamantawan. Chayta uyariqkunaqa yuyarirankuchá rey Davidpa nisqanta, paymi niran: “Señor Diosmi michikuwaqniyqa, manan imapas pisiwanchu. Llullu q’achu-q’achupin samachikuwan”, nispa (Salmo 23:1, 2). Davidqa nillarantaqmi: “Kamaqninchis Señor Diosman qonqorikusunchis. Paymi Diosninchis, noqanchistaq llaqtan kanchis, michinanpi ovejankunan kanchis”, nispa (Salmo 95:6, 7). Chhaynaqa Israel runakunataqa unayñan oveja t’aqawan comparakuran.

Moisespa chaskisqan kamachikuykunataq oveja kancha jina paykunapaqqa karan. Chay kamachikuykunan juj cerco jina paykunata cuidaran Diosta mana serviq runakunaq mana allin ruwayninkunamanta. Wakin runakunan ichaqa maltrataqku Diospa ovejankunata. Chaymi Jesusqa niran: “Pipas oveja kanchaman mana punkuntachu jaykunman, aswanpas kancha patanta jaykunman chayqa, suwan chay runaqa jujkunaq kaqninta qechuqtaq kanpas. Pipas punkunta jaykuqmi ichaqa oveja michiq runa”, nispa (Juan 10:1, 2).

Suwamanta Jesús rimaspaqa “Mesiasmi kani” niq runakunamantan rimashanman karan. Chay runakunaqa jujkunaq kaqninta qechuqkuna jinan karanku, chaymi runakunaqa mana paykunata qatikunankuchu karan, aswanmi ‘oveja michiqllata’ qatikunanku karan.

Chay michiqmantan Jesusqa niran: “Paytaqa punku qhawaqmi kichan, ovejakunapas uyarinkun kunkanta, paytaq ovejankunata sutinmantakama wajaspa jawaman qarqon. Llapanta qarqospañan ovejankunaq ñaupanta rin, ovejankunataq qhepanta rinku kunkanta reqsisqankurayku. Mana reqsisqankuq qhepantan ichaqa manapuni rinkumanchu, aswanmi paymantaqa ayqekunkuman kunkanta mana reqsisqankurayku”, nispa (Juan 10:3-5).

Chay punku qhawaq jinan bautizaq Juanqa unayña Jesusta presentaran runakunaq qatikunanku michiqta jina. Chaymi wakinqa Galilea ladopi, Judea ladopipas michiqninkuq kunkanta reqsiq ovejakuna jina Jesusta qatikuranku. Chaywanpas wakinqa ‘manan entienderankuchu imamantachus Jesús rimasharan chayta’ (Juan 10:6). Paykunaqa tapukusharankuchá: “¿Maymantaq pusawasunri? ¿Imataq pasawasun payta qatikushallasun chayri?”, nispa.

Chaymi Jesusqa niran: “Noqan ovejakunapaq punkuqa kani. Sutiywan sutichakuspa jamuqkunaqa suwakunan kanku, jujkunaq kaqninta qechuqkunataq kankupas, chaymi ovejakunaqa mana paykunata uyarinkuchu. Noqan punkuqa kani. Pipas noqanta jaykuqqa salvasqan kanqa, jinaspa jaykunqa, lloqsinqa, pastotapas tarinqa”, nispa (Juan 10:7-9).

Jesusqa “noqan punkuqa kani” nispaqa mosoq kanchaman jaykuymantan rimasharan. Chay kanchaqa manan Moisespa chaskisqan kamachikuykunachu karan. Chay mosoq kanchaman jaykuqkunaqa kausaytan tarinanku karan.

Chaymi Jesusqa niran: “Noqan ichaqa jamuni kausayniyoq kanankupaq, wiñay kausayniyoq kanankupaqwan. Noqan ancha allin michiqqa kani. Ancha allin michiqqa vidantan qon ovejakunarayku”, nispa (Juan 10:10, 11). Payqa ñan discipulonkunata niranña: “Ama manchakuychischu, pisi t’aqa ovejakuna, Yayaykichismi qankunamanqa gobiernonta qosunkichis”, nispa (Lucas 12:32). Chhaynaqa mosoq oveja kanchaman jaykuqkunaqa ‘pisi t’aqa ovejakunan’ kananku karan, paykunan “wiñay kausayniyoq” kananku karan.

Ichaqa manan paykunallachu Jesuspa ovejankunaqa kananku karan, chaymi payqa niran: “Kallantaqmi waj ovejaykunapas, paykunaqa manan kay t’aqamantachu kanku; paykunatapas pusamunaymi kashan, jinan kunkayta uyarinqaku, juj t’aqallataqmi kanqaku, juj michiqllayoqtaq kanqakupas”, nispa (Juan 10:16). Chay “waj ovejaykuna” nisqanqa waj oveja kanchamantan karanku, chaymi mana “pisi t’aqa ovejakuna” jinachu Diospa gobiernonpi kamachikunanku karan. Paykunaqa sapaq suyakuyniyoqmi karanku, ichaqa iskaynin t’aqan Jesuspa yanapasqan kananku karan, chaymi payqa niran: ‘Paykunaraykun vidayta qoni’, nispa (Juan 10:17).

Jinan askha runakuna niranku: “Supaypa junt’aykusqanmi kashan manataqmi yuyayninpichu kashanpas”, nispa. Jesusta qatikuyta munaqkunan ichaqa niranku: “Kaykunataqa manan supaypa junt’aykusqan runaqa rimanmanchu. Jinaspapas, ¿atinmanchu juj supay ñausakunaq ñawin kichariyta?”, nispa (Juan 10:20, 21). Paykunaqa ñausapuni naceq runata Jesús qhaliyachisqanmantan rimashankuman karan.