3 T’AQA
Hatun parapi mana wañuqkuna
Diosmi millayta kawsaq runakunata wañuchirqan, Noeta familiantawanmi ichaqa salvarqan
RUNAKUNAQ mirasqanman hinan huchapas millay kawsaypas mast’arikurqan. Ichaqa karqanmi Diosta serviq Enoc sutiyoq runa, paywanmi Dios willachirqan millay runakuna wañuchinanta. Runakunan ichaqa mana uyariqpas tukurqankuchu, chaymi millay kawsay q’oñirirqan. Chaypaq hinan wakin angelkunapas Dios contra hatarispa kay pachaman uraykamurqanku, runaman tukuspataq munasqanku warmikunawan casarakurqanku. Paykunapin churiyarqanku hatunkaray nefilim nisqa runakunata. Chay kallpasapa runakunawanmi millay kawsay q’oñirirqan. ¡Maytachá Diosqa llakikurqan chayta rikuspa!
Enocpa wañupusqan qhepamanmi kallarqantaq huk allin runa, Noé sutiyoq. Payqa familiantinmi Diospa munasqanman hina kawsarqan. Huk kutinmi Jehová Dios decidirqan sinchita parachispa millay runakuna wañuchiyta. Ichaqa manan munarqanchu Noepas animalkunapas wañunanta. Chaymi Noeta kamachirqan huk hatun arcata ruwananpaq, chayqa huk caja hinan karqan, chaymanmi haykuchinanku karqan imaymana animalkunata. Noeqa tawa chunka otaq phisqa chunka watapi hinan arca ruwayta tukurqan, ‘chanin kawsaymantapas willashallaqpunin’ (2 Pedro 2:5). Willarqanmi hatun para chayamunanmanta ichaqa manan pipas kasurqanchu. Tiempo chayamuqtinmi Noé familianwan animalkunawan ima arcaman haykurqanku, arcaq punkunta Dios wisq’aqtintaq parayta qallarirqan.
Tawa chunka p’unchayta tawa chunka tutatawan paramuqtinmi kay pachata unu millp’urqan, chaypin millay runakuna wañurqanku. Killakuna pasasqanman hinan unuqa ch’akiyta qallarirqan arcataq huk orqo patapi tiyaykurqan. Huk wata qhepamanmi Noé familiantin arcamanta lloqsirqanku. Noetaq agradecekuspa huk ofrendata Diosman haywarqan. Diosmi prometerqan manaña hayk’aqpas unuwan kay pachata millp’uchinanpaq, chay promesanta runakuna yuyarinankupaqtaq huk k’uychita (arco iris) lloqsichimurqan.
Chay qhepamanmi Jehová Dios mosoq kamachikuykunata paykunaman qorqan. Nirqanmi animalkunaq aychanta mikhuy atisqankuta, yawarnintan ichaqa mana. Kamachillarqantaqmi pachantinman ch’eqerinankupaq. Ichaqa yaqa llapa runakunan mana kasukuspa huk llaqtallapi tiyarqanku, chaypin Nemrod sutiyoq runa kamachirqan huk hatun torreta ruwanankupaq. ¿Imaynatan Dios chay ruwasqankuta qolluchirqan? Chay llaqtaq rimayninta cambiaspa. Llapa runakunan imaymana simikunapi rimayta qallarirqanku, manaña entiendenakuspataq ch’eqerirqanku. Chay llaqtaq sutinmi karqan Babel, qhepamantaq Babilonia nisqa kapurqan.