5 T’AQA
Diosmi Abrahamta familiantawan allinpaq qhawarirqan
Abrahampa familianmi sumaqta kawsarqan. Diosmi Joseta Egipto llaqtapi yanaparqan
JEHOVÁ DIOSMI ancha munakusqan Churinta sacrificiopi qonan karqan. Chaytan Génesis 3:15 textopi willarqan. Churinpa wañusqan may llakikuy paypaq kananta runakuna entiendenanpaqmi, Bibliapi qelqachirqan churin Isaacta sacrificananpaq kashaqtin Abraham imayna sientekusqanmanta.
Jehová Diosmi Abrahamman prometesqaña churin Isaacpa mirayninmanta Salvador hamunanta. Abrahamqa confiarqanmi chay promesapi, chayraykun Diosta kasukuspa churinta aparqan sacrificananpaq, ichaqa sacrificananña kashaqtinmi Dios huk angelninwan hark’achirqan. Diosqa ancha allinpaqmi Abrahamta qhawarirqan allin iñiyniyoq kasqanmanta, wakmantataq promesanta willarqan.
Qhepamanmi Isaac iskay churiyoq kapurqan, hukninmi karqan Esaú, huknintaq Jacob. Jacobllan Dios sonqo karqan, chaymi allinpaq qhawarisqa karqan. Sutinmi Israelman cambiasqa karqan, wawankunamantataqmi Israelpa 12 ayllunkuna paqarirqan. ¿Imaynapin hatun llaqtaman tukupurqanku?
Chayqa qallarirqan Josepa wawqenkuna payta envidiakuspa kamachi kananpaq vendeqtinkun. Rantiqkunan Egipto llaqtaman aparqanku, chaypin imaymana sasachakuykunapi tarikurqan. Diosmi ichaqa hunt’aq sonqo kasqanrayku yanaparqan. Huk kutinmi Faraón Joseta akllarqan huk importante llank’aypaq, chhaynapin Joseqa familianta yanaparqan. Mikhuy pisiyaqtinmi Jacob churinkunata kamachirqan Egipto llaqtamanta mikhuykunata rantimunankupaq. Chay llaqtaman chayaqtinkun José wawqenku mikhuykuna vendeypi umallishasqa. Joseqa repararqanmi wawqenkuna mana allin ruwasqankumanta pesapakusqankuta, chaymi paykunata pampachaspa sumaqta chaskiykurqan. Chay qhepamanmi llapa familianta waqyachirqan. Faraonqa allin hallp’akunatan paykunaman qorqan, chhaynapin askhayarqanku qhapaqyarqankupas. Joseqa repararqanmi chaykunawan Jehová Diospa munaynin hunt’akusqanta.
Jacobqa wañupunankaman familiantin Egiptopi tiyarqan. Manaraq wañupushaspan willarqan Judá churinpa mirayninmanta Salvador hamunanta, payqa atiyniyoq reymi kanan karqan. Qhepa watakunamanmi José willarqanña Egipto llaqtamanta Jacobpa familian horqosqa kananta.