Millp’uq paramanta Egipto suyumanta kacharichisqa kasqankukama

Pusaq runallan millp’uq para unumanta qespichisqa karanku, tiempoq pasasqanmantaq waranqa waranqanpi miraranku. Millp’uq para unumanta 352 wata qhepata Abrahán naceran. Yachasunmi imaynatan Dios hunt’aran Abrahanman prometesqanta, churin Isaacta qospa. Isaacpa iskaynin churinkunamantataq Diosqa Jacobta akllaran.

Jacobpa churinkunaqa chunka iskayniyoqmi karan, ususinkunapas karanmi. Jacobpa chunka churinkunan cheqniranku sullk’a wayqenku Joseta, chaymi venderanku Egipto suyupi kamachi kananpaq. Tiempoq pasasqanmanmi Joseqa Egipto suyupi hatun kamachikuq karan. Hatun yarqay kaqtinmi Joseqa wayqenkunata wateqaran, millay kayninkuta saqerankuñachu icha manachu chayta yachananpaq. Chay qhepamanmi Jacobpa familian Egipto suyuman astakuranku. Chayqa sucederan Abrahanpa nacesqanmanta 290 wata qhepatan.

Israelitakunaqa 215 watan Egipto suyupi tiyaranku. Josepa wañusqan qhepamanmi paykunaqa kamachi kapuranku. Unay tiempo qhepamantaq Moisés naceran, paywanmi Diosqa israelitakunata Egipto suyumanta horqochiran. Kay ISKAY Kaq T’aqapin yachasun 857 watakunapi sucedesqanta.