¿Ima escuelakunan kan tukuy tiemponkuwan predicaqkunapaq?

Jehová Diospa testigonkunaqa ñawpaqmantaraqmi allin yachachikuykunata chaskirqanku. Chaytaqa tukuy tiemponkuwan predicaqkunan astawanqa chaskinku. Chaymi paykunata yanapan ‘Diospa qosqan llank’ayta allinta hunt’anankupaq’ (2 Timoteo 4:5).

Precursorkunapaq escuela. Chaymanqa huk wata llank’asqanku qhepamanmi invitasqa kanku. Chay escuelaqa soqta p’unchaymi aparikun Huñunakunayku Wasipi. Chaymi precursorkunata yanapan allinta predicanankupaq, tukuy sonqowan Diosta servinankupaq, Diosman astawan asuykunankupaq ima.

Diospa Gobiernonmanta willaqkunapaq escuela. Chaymanqa unayña precursor kaqkunan invitasqa kanku. Rinkumanmi 23 watayoq 65 watayoqkama solterokuna, solterakuna, casadokunapas. Chay escuelaqa iskay killan aparikun. Chayman riqkunaqa liston kashananku tukuy imata saqespa maymanpas rinankupaq. Yaqapaschá pisillawan kawsananku kanqa, yachakunankun kanqa huk costumbrekunaman, sinchi chiriman otaq sinchi ruphayman, hukniray mikhunakunamanpas. Paykunaqa Isaías hinan ninku: “Ñoqan kaypi kashani, ñoqata kachaway”, nispa. Chaytan Jesuspas ruwarqan kay pachapi kashaspa (Isaías 6:8; Juan 7:29). Chaymi chay escuela paykunata yanapan iñiyninkupi allin takyasqa kanankupaq, Diospa llaqtanpi allinta yanapakunankupaq ima.

Galaad escuela. Hebreo simipi Galaad nisqa simiqa “willakuq tawqasqa rumi” ninanmi. 1943 watamantapachan chay escuelapi 8.000 más Testigokunaña allin preparasqa kashanku misionero kanankupaq, chaymi “kay pachantin runakunaman” allin willakuykunata aparishanku (Hechos 13:47). Qhawarisun iskaymanta. Perú nacionman misionerokuna chayamuqtinmi mana huk iñiq t’aqapas karqanchu, kunantaqmi 1.000 iñiq t’aqakunaña kashan. Japón nacionman chayllaraq chayaqtinkuqa, manan 10 Testigollapas karqanchu, kunantaq 200.000 más Testigokunaña kashanku. Galaad escuelaqa phisqa killan aparikun. Chaypiqa Bibliatan allin-allinta estudianku. Chaymanmi invitasqa kanku precursor especialkuna, campopi llank’aq misionerokuna, betelitakuna, iñiq t’aqakunata watukuq umallikunapas. Paykunan preparasqa kanku hallp’antinpi llank’ay aparikusqanpi yanapakunankupaq.

• ¿Imapaqmi escuelakuna kan?

• ¿Pikunan rinkuman Diospa Gobiernonmanta willaqkunapaq escuelaman?