Bibliamanta Allin Yachachiq Kanapaq Escuela
¿Imapaqmi chay escuela? Predicaqkunatan yachachin Diospa Siminmanta allin yachachiq kanankupaq.
¿Hayk’a tiempon? Tukuy tiempo.
¿Maypin aparikun? Huñunakuna Wasipi.
¿Pikunapaqmi? Huñunakuyman hamuqkunapaq. Bibliaq nisqanta kasukuspa chayman hina kawsaqkunapaq.
¿Imaynatan haykuwaq? Escuelapi umalliwan rimay.
Sharonqa onqoyninraykun mana kuyurinchu, paymi nin: “Bibliamanta Allin Yachachiq Kanapaq Escuelan yanapawarqan yachachikuykunata allinta t’aqwinaypaq, entiendenankupaq hina yachachinaypaqpas, hinallataq hukkuna Dios serviyninkupi imachus necesitasqankupi yuyaykunaypaq manataq ñoqallapichu”, nispa.
Watukuq umalli Arnie nin: “Huch’uyllaraq kaspaqa k’akukachaspan rimaq kani, manchakuqtaqmi kani hukkunaq uyan qhawayta. Diospa yanapayninwanmi chay escuelapi yacharqani mana iskayayta ñoqa kikiy munakuytapas, yacharqanin tukuy yuyaywan thak sonqolla rimayta. Anchatan agradecekuni Diosta hatunchanaypaq predicanaypaqpas chay escuela yanapawasqanmanta”, nispa.
Mosoq Betelitakunapaq Escuela
¿Imapaqmi chay escuela? Kay escuelaqa chayllaraq Betelman haykuqkunatan yanapan allinta ruwayninkuta hunt’anankupaq.
¿Hayk’a tiempon? 16 semanakuna, sapa semanapi 45 minuto aparikun.
¿Maypin aparikun? Betel Wasipi.
¿Pikunapaqmi? Betel wasipi llank’aqkunapaq, huk watapaq otaq más tiempo llank’anankupaq invitasqa kaqkunapaqpas.
¿Imaynatan haykuwaq? Betel wasin chaymantaqa encargakun.
Demetrius iñiqmi chay escuelapi karqan 1980 watakunapi, paymi nin: “Chay escuelan yanapawarqan qelqakunata astawan estudianaypaq, askha tiempo Betelpi kanaypaqpas. Chaypi yachachikuykuna chaskisqay, yachachiqkuna, yuyaychaykuna chaskisqaymi reparachiwarqan Jehová Dios munakuwasqanta, Betelpi allin kanayta munasqantapas”, nispa.
Kaitlyn cristianan nin: “Yanapawarqanmi tukuy yuyaywan Diosta servinaypaq. Chay escuelan yanapawarqan Jehová Diosta, wasinta, llaqtantapas astawan reqsinaypaq, ancha chaninpaq hap’inaypaqpas”, nispa.
Iñiq T’aqapi Umallikunapaq, Yanapakuq Qharikunapaqwan Escuela
¿Imapaqmi chay escuela? Watukuq umallikunata, iñiq t’aqapi umallikunatawanmi yachachin ruwanankuta allinta hunt’anankupaq mayninpitaq yanapakuq qharikunatawan (Hech. 20:28). Iñiq t’aqakunaq imakunachus necesitakusqanmanta sasachakuyninkunamantan yachakun. Kay escuelaqa manan sapa watanchu aparikun aswanpas Umalli T’aqaq nisqanman hinan.
¿Hayk’a tiempon? Kay qhepa watakunapin watukuq umallikunapaq karqan iskay otaq iskay p’unchay kuskanpiwan, umallikunapaqtaq huk p’unchay kuskanpiwan, yanapakuq qharikunapaqtaq huk p’unchay.
¿Maypin aparikun? Huñunakuna Wasipi otaq Hatun Huñunakuy Wasipi.
¿Pikunapaqmi? Watukuq umallikunapaq, iñiq t’aqapi umallikunapaq, yanapakuq qharikunapaqwan.
¿Imaynatan haykuwaq? Iñiq t’aqapi umallikunata, yanapakuq qharikunatapas watukuq umallin invitan, watukuq umallikunatataq Betel wasi.
“Chay escuelapiqa askhataña yachakun pisi tiempollapi chaypas, umallikunatan yanapan kusisqa mana manchakuspa Diosta servinankupaq. Chayllaraq kaq umallikunapas unayña kaqkunapas iñiq t’aqa michiytan yachanku, ‘huk yuyaynillayoq’ kaytapas.” (Quinn, uraypi.)
“Chay escuelan yanapawanchis Dios serviyninchispi kaqkunata chaninpaq qhawarinapaq, mana allinkunapi ama urmanapaq makilla kanapaq, iñiq t’aqa cuidaypi yanapakunapaqpas. Jehová Diosqa sumaq sonqon.” (Michael.)
Precursorkunapaq Escuela
¿Imapaqmi chay escuela? Precursorkuna allin predicaq kanankupaq (2 Tim. 4:5).
¿Hayk’a tiempon? 2 semana.
¿Maypin aparikun? Betel Wasin akllan, mayninqa Huñunakuna Wasipin aparikun.
¿Pikunapaqmi? Huk wataña otaq más watakuna precursor kaqkunapaq.
¿Imaynatan haykuwaq? Watukuq umallin chayta willasunki.
“Chay escuelan yachachiwarqan sasachakuykunawan ama pisipanaypaq. Kunanqa aswan allintan Bibliata t’aqwini, estudiani, yachachinipas. Aswan allintan runamasiyta yanapani, umallikunata iñiq t’aqatapas.” (Lily, pañapi.)
Brendan iskay kutita chay escuelaman rirqan, paymi nin: “Chay escuelan yanapawarqan Dios serviypi tukuy yuyay kanaypaq, allin concienciayoq kanaypaq runamasiyta yanapanaypaqpas. ¡Ancha qoykukuqmi Jehová Diosqa!”, nispa.
Iñiq T’aqa Umallikunapaq Escuela
¿Imapaqmi chay escuela? Umallikunatan yanapan iñiyninkupi qaqa kanankupaq, iñiq t’aqapi ruwanankuta allinta hunt’anankupaqpas.
¿Hayk’a tiempon? 5 p’unchay.
¿Maypin aparikun? Betel Wasin akllan, Huñunakuna Wasita otaq Hatun Huñunakuy Wasita.
¿Pikunapaqmi? Umallikunapaq.
¿Imaynatan haykuwaq? Betel Wasin invitan.
Estados Unidospi 92 clase escuelaman wakin riqkunan nirqanku:
“Chay escuelan anchatapuni yanapawarqan ñoqa kikiyta t’aqwikunaypaq, hinallataq Jehová Diospa ovejankunata imayna cuidanaypaqwan.”
“Kunanqa Bibliapi allin yachachikuykunawanmi aswan allinta hukkunata kallpachasaq.”
“Chaypi yachasqaykunaqa tukuy tiempon yanapawanqa.”
Iñiq T’aqakuna Watukuqkunapaq Esposankupaqwan Escuela
¿Imapaqmi chay escuela? Watukuq umallikunata, iñiq t’aqakunata qhawariqtawanmi yachachin iñiq t’aqakunata allinta qhawanankupaq, ‘astawanqa Diospa Siminta willanankupaq yachachinankupaqwan’ (1 Tim. 5:17; 1 Ped. 5:2, 3).
¿Hayk’a tiempon? 2 killa.
¿Maypin aparikun? Betel Wasin akllan.
¿Pikunapaqmi? Watukuq umallikunapaq.
¿Imaynatan haykuwaqchis? Betel Wasin invitan.
“Kunanqa aswan chaninpaqmi qhawariyku Diospa llaqtanpi Jesús uma kaspa ruwasqanta. Allintan entiendeyku iñiqmasikunata kallpachanayku kasqanta huk sonqolla kawsay kananpaq. Watukuq umalliq mayninpi yuyaychan, anyan chaypas astawanqa iñiqmasikunatan entiendechinan Diospaq munasqa kasqankuta, chay yachasqaykutaqa manan hayk’aqpas qonqasaqkuchu.” (Joel, primera clase, 1999.)
Soltero Qharikunapaq Escuela
¿Imapaqmi chay escuela? Umallikunata, yanapakuq qharikunatawanmi yachachin Diospa llaqtanpi ruwayninkuta allinta hunt’anankupaq. Yaqa llapankutan kachanku kasqan nacionllankupi maypichus predicaqkuna necesitakusqanman. Wakinqa yaqapas huk nacionman rinkuman. Wakintaq pisi tiempollapaq precursor especialkuna kankuman manaraq predicakusqan cheqaskunapi otaq karu llaqtakunapi predicayta mast’arinankupaq.
¿Hayk’a tiempon? 2 killa.
¿Maypin aparikun? Betel Wasin akllan, Huñunakuna Wasipi otaq Hatun Huñunakuy Wasipi aparikunanpaq.
¿Pikunapaqmi? Soltero qharikunapaqmi, 23 watayoqmanta 62 watayoqkaman kananku, qhalin kanankupas. Predicaqkuna maypi necesitakusqanpi yanapakuy munaqkunan kananku (Mar. 10:29, 30). Iskay wata precursor regular kasqankumantapas, iskay watañan umalli otaq yanapakuq qhari kananku.
¿Imaynatan haykuwaq? Iskay p’unchay huñunakuypin waqyakun huk huñunakuyman.
“Diospa santo espiritunmi anchatapuni cambiawarqan tukuy yuyaywan kay escuelapi kasqayrayku. Ima llank’aytapas Jehová Dios qosuqtiykiqa yanapasunkin hunt’anaykipaq. Sichus Paypa munayninta ruwaypi yuyaykunki manataq qan kikillaykipichu chayqa, Diosmi kallpata qosunki.” (Rick, Estados Unidospi 23 escuelamanta.)
“Entienderqanin Diospa llaqtanqa kunan tiempopi huk milagro hina kasqanta. Yachachiwarqanmi llank’aykuna ruwakunanraq kasqanpi yanapakunaypaq. Chaymantapas Bibliapi askha willakuykunan yachachiwarqan cheqaq kusikuyqa Jehová Diosta iñiqmasikunatawan serviypi tarikusqanta.” (Andreas, Alemania nacionpi serviq.)
Casarasqa Cristianokunapaq Escuela
¿Imapaqmi chay escuela? Casarasqa cristianokunatan Diospa llaqtanpi astawan yanapakunankupaq preparan. Escuelata tukuqtinkun kaq nacionllankupi maypis predicaqkuna astawan necesitakushan chayman kachanku. Yaqapaschá wakintaqa huk nacionman kachankuman. Wakintaq pisi tiempollapaq precursor especialkuna kankuman manaraq predicakusqan cheqaskunapi otaq karu llaqtakunapi predicayta mast’arinankupaq.
¿Hayk’a tiempon? 2 killa.
¿Maypin aparikun? Estados Unidos nacionpi, wakin nacionkunapitaq setiembre 2012 watamantapacha Huñunakuna Wasipi otaq Hatun Huñunakuy Wasipi kanqa.
¿Pikunapaqmi? 25 watayoqmanta 50 watayoqkaman kananku, qhalitaq kananku. Predicaqkunaq necesitakusqanman rinankupaq hinan kashananku, Isaías nisqanta hinataqmi ninanku: “Ñoqan kaypi kashani, ñoqata kachaway”, nispa (Isa. 6:8). Iskay watañan casarasqa tukuy tiemponkuwan Diospa llaqtanpi llank’ashananku. Qosaqa iskay watañan umalli otaq yanapakuq qhari kanan.
¿Imaynatan haykuwaqchis? Hatun huñunakuykunapin waqyakun chay escuelamanta astawan willakunanpaq huk huñunakuyman. Sichus llaqtaykipi mana waqyakunchu chay huñunakuypaq chayqa, Betel Wasimanmi qelqawaq.
“¡Kay pusaq semanaqa cambianmi Dios sonqo casarasqakunaq kawsayninta! Allin yuyaywan kawsanaykupaqmi yanapawarqanku tiempotapas ama usuchinaykupaq.” (Eric, Corina, uraypi; 2011 watapi ñawpaq kaq escuelamanta.)
Escuela Bíblica de Galaad de la Watchtower
¿Imapaqmi chay escuela? Askha runakunaq kasqanpi misionero, watukuq umalli otaq betelita kayninkupi llank’anankupaqmi yachachin. Astawanqa predicación mast’arikunanpaq sucursalkunapas allin takyasqa kananpaq.
¿Hayk’a tiempon? 5 killa.
¿Maypin aparikun? Watchtower Hatun Escuela, Patterson llaqtapi (Nueva York).
¿Pikunapaqmi? Tukuy tiemponkuwan Diosta serviq casarasqa cristianokunapaqmi, paykunan kanku Galaadman mana riq misionerokuna, precursor especialkuna, watukuq umallikuna, betelitakunapas. Chaypaqqa kinsa watallapas iskayninkun chay llank’aykunapi Diosta servinanku. Chaymantapas, allintan inglés simita rimananku, qelqananku leenankupas.
¿Imaynatan haykuwaqchis? Betel Wasimanta Encargakuqkunan casarasqa cristianokunaman huk solicitudta qon hunt’anankupaq.
Estados Unidosmanta Lade, Monique cristianokunan kunanqa Africapi Diosta servishanku. Lade nin: “Chay escuelan yanapawarqanku may llaqtamanpas rinaykupaq, iñiqmasikunawan kuska llank’anaykupaqpas”, nispa.
Monique nillantaq: “Bibliapi yachasqayman hina kawsaspayqa maypi kaspapas kusisqan kani, chaypin rikuni Diospa munakuyninta”, nispa.
Betel Wasimanta Encargakuqkunapaq Esposankupaqwan Escuela
¿Imapaqmi chay escuela? Betel Wasimanta Encargakuqkunatan preparanku Betel Wasita allinta aparinankupaq, iñiq t’aqakunaq predicasqanta qhawarinankupaq, watukuq umallikunatapas. Chaymantapas qelqakuna t’ikrakusqanta, ruwakusqanta apachikusqantapas qhawarinankupaq.
¿Hayk’a tiempon? 2 killa.
¿Maypin aparikun? Watchtower Hatun Escuelapi, Patterson llaqtapi (Nueva York).
¿Pikunapaqmi? Qosaqa Betel Wasimanta Encargakuqmi kanan otaq Comité de País nisqamanta.
¿Imaynatan haykuwaqchis? Umalliq T’aqan paykunata invitan esposankutawan.
Lowell, Cara cristianokunan 25 clasemanta kanku, paykunan servishanku Nigeria nacionpi. Lowell nin: “Chay escuelan yuyarichiwarqan ima ruwanayoqña, askha llank’anayoqña kayman chaypas, Diosta kusichinapaqqa pay sonqo kanayta. Chaymantapas, yuyarichiwallarqantaqmi Diospa munakusqanta hina iñiqmasikunata munakunaypaq”, nispa.
Cara nin: “Anchatan yuyaymanarqani kay niwasqankupi: entiendenapaq hina mana yachachiyta atispaqa, allintaraq estudiay”, nispa.