¿Diosmantapunichu hamun Bibliapi kaq allin willakuykuna?

1. ¿Pin Bibliata yuyaycharqan?

Bibliapin tarikun Hallp’api wiñaypaq kawsananchismanta allin willakuykuna (Salmo 37:29). Diosmi 40 runakunata akllarqan Bibliata qelqanankupaq. Bibliaqa 66 librochakunapin t’aqasqa kashan. Moisesmi 3.500 wata hinaña qallariyninpi kaq 5 librokunata qelqarqan; tukuyninpi kaq librotataq apóstol Juan qelqarqan 1.900 wata hinaña. ¿Piqpa yachachikuyninmi Bibliapi kashan? Diospa yachachikuyninmi. Paymi santo espiritunwan yuyaycharqan Biblia qelqaq runakunata (2 Samuel 23:2). Chay runakunaqa Diospa yuyaykusqantan qelqarqanku manan paykunaq yuyaykusqankutachu. Chaymi Bibliaqa Diospa yuyaychasqan.​—Leey 2 Timoteo 3:16; 2 Pedro 1:20, 21.

Qhaway ¿Pin Bibliata yuyaycharan? nisqa videota

2. ¿Imaynapin yachanchis Bibliapi willakuykuna cheqaq kasqanta?

Bibliata Diospuni qelqachisqanrayku. Chaytan yachanchis qhepaman imachus sucedenanta Biblia k’apakta willasqanpi (Josué 23:14). Chaytaqa tukuy atiyniyoq Diosllan yachan, manan runakunaqa yachankumanchu.​—Leey Isaías 42:9; 46:10.

Diospa qelqachisqan libroqa ima libromantapas aswan allinmi. Bibliaqa pachak-pachak simikunapin qelqasqa kashan, waranqa-waranqanpitaqmi ruwakun. Unay tiempoña pasan qelqakusqanmanta chaypas, tupanmi cientificokunaq tarisqankuwan. Hinaspapas, 40 runakunaña Bibliata qelqarqanku chaypas, qelqasqankuqa huk runallapas qelqanman hinan lliwpi tupan. Chaypi tarikuq willakuykunan rikuchiwanchis Dios munakuwasqanchista, yanapashantaqmi runakunata allinta kawsanankupaq. Chaykunata rikuspan millonninpi runakuna Bibliata Diospa Siminta hinapuni qhawarinku.​—Leey 1 Tesalonicenses 2:13.

Qhaway ¿Imaraykun Bibliapi confiananchis? nisqa videota

3. ¿Imamantan Biblia willan?

Bibliapiqa huk allin willakuymi kashan. Runakunapaq Diospa munasqanmantan willashan. Willanmi qallariypi kaq paraíso imaynapi chinkapusqanta, kay Hallp’a yapamanta paraisoman tukupunanmantawan.​—Leey Apocalipsis 21:4, 5.

Bibliapin tarikun Diospa kamachikuyninkuna, yachachikuyninkuna, yuyaychayninkunapas. Willanmi runakunata imayna qhawarisqanta, chaypitaqmi yachanchis imayna Dios kasqanta. Bibliaqa yanapawanchismi Diosta reqsinapaq, amigon kananchispaqpas.​—Leey Salmo 19:7, 11; Santiago 2:23; 4:8.

4. ¿Iman yanapawasun Bibliapi yachachikuykunata entiendenapaq?

Jesusqa huk textomanta rimaspan chayta allinta sut’inchaq, chhaynapi runakuna “Diospa Simin Qelqata entiendenankupaq”. Kay folletopas chay hinata estudianapaqmi ruwasqa kashan, chaymi yanapawasun Bibliata allinta entiendenapaq.​—Leey Lucas 24:27, 45.

Anchatachá kusikunki Diosmanta hamuq allin willakuykunata yachaspa. Wakin runakunan ichaqa mana chaykunamanta yachayta munankuchu, hukkunataq phiñakapunku imaraq pipas chaykunamanta willariqtin. Qanqa ama uyariychu chay hina yuyaykuqkunata. Biblian willan Diosmanta yachaqkunaqa wiñay kawsayman aypanankuta.​—Leey Juan 17:3.