¿Imaraykun Dios huk llaqtata akllakurqan?

1. ¿Imaraykun Dios ñawpa israelitakunata akllarqan llaqtan kananpaq?

Diosmi ñawpa tiempopi Abrahampa mirayninmanta huk llaqtata hatarichirqan, hinaspa kamachikuyninkunata qorqan. Chay llaqtatan Israel sutiwan suticharqan, paykunan cheqaq Diosta yupaychaspa kamachikusqanta kasukunanku karqan (Salmo 147:19, 20). Chhaynapin llapa nacionpi runakuna allinkunata chaskinanku karqan.​—Leey Hechos 3:25.

Diosmi israelitakunata akllakurqan testigonkuna kanankupaq. Chay llaqtamanta Bibliaq willasqanpin yachanchis Diospa kamachikuyninkunata kasukuy allinpuni kasqanta (Deuteronomio 4:6). Paykunaq kawsasqanta qhawarispan huk runakunapas cheqaq Diosta reqsinanku karqan.​—Leey Isaías 43:10, 12.

2. ¿Imaraykun Dios munan llaqtan hukllachasqa kananta?

Qhepamanmi Dios Israel llaqtata saqepurqan mana kasukusqankurayku, rantinpitaq huk mosoq iñiq t’aqata akllakurqan (Mateo 21:43; 23:37, 38). Chaymi kunanqa cheqaq cristianokuna testigonkuna hina Diosta servishanku, manañan Israel llaqtachu.​—Leey Hechos 15:14, 17.

Jesusmi qatikuqninkunata huñuspa kamachirqan pachantinpi runakunaman predicanankupaq yachachinankupaqwan (Mateo 10:7, 11; 24:14; 28:19, 20). Chaymi kay tukukuy tiempokunapipas chay llank’ay aparikushan. Kunanmi Jehová Dios waranqa-waranqanpi runakunata cheqaq religionman huñushan (Apocalipsis 7:9, 10). Hukllachasqa kaspan cheqaq cristianokunaqa yanapanakunku kallpachanakunku ima. Hinaspapas llapallankun Bibliamanta huk yachayllata chaskinku.​—Leey Hebreos 10:24, 25.

3. ¿Imaynatan kay tiempopi Jehová Diospa testigonkuna qallarirqan?

1870 watakunapin qallarirqan. Huk pisi t’aqa runakunan Biblia estudiasqankupi cheqaq yachachikuykunata tarirqanku. Jesusmi ñawpa cristianokunata yachachirqan predicacionta aparinankupaq. Chayta yachaspan paykunapas Diospa Gobiernonmanta askha nacionkunapi willayta qallarirqanku. 1931 watapin Jehová Diospa testigon nisqa sutiwan sutichakurqanku.​—Leey Hechos 1:8; 2:1, 4, 11; 5:42.

4. ¿Imaynatan Jehová Diospa testigonkuna llank’ayninkuta aparinku?

Apostolkunaq tiemponpin karqan huk umalliq t’aqa, cristiana iñiq t’aqakunata qhawarinanpaq. Paykunaqa Jesustan Umalliqninkuta hina rikurqanku (Hechos 16:4, 5). Kunanpas kallantaqmi Jehová Diospa testigonkunata qhawariq Umalliq T’aqa. Paykunaqa allin experienciayoq cristianokunan kanku, Hallp’antinpi kaq sucursalkunapi llank’ay aparikusqantataq qhawarishanku. Chay sucursalkunapin 600 más simikunapi Bibliamanta willaq qelqakunata t’ikranku, askhanpi ruwanku, rakimunku ima. Chay Umalliq T’aqaqa Hallp’antinpi kaq 100.000 más iñiq t’aqakunatan Bibliaq nisqanman hina yachachin kallpachan ima. Sapanka iñiq t’aqakunapin kallantaq allin experienciayoq qharikuna, paykunapas Diospa ovejankunatan munakuywan umallinku.​—Leey 1 Pedro 5:2, 3.

Jehová Diospa testigonkunaqa huk nisqallan Bibliapi kaq allin willakuykunata runakunaman willashanku yachachishanku ima. Apostolkuna hinan wasin-wasinta predicanku (Hechos 20:20). Cheqaq kaqta yachay munaqkunamanmi Bibliamanta yachachinku. Hinaspapas huk familia hinan kawsanku; Jehová Taytankuq pakaykusqanmi kanku, wawqe-panantin hinataqmi munanakunku (2 Tesalonicenses 1:3). Paykunaqa tukuy atisqankutan kallpachakunku Diosta kusichinankupaq, runamasinkuta yanapanankupaqpas, chaywantaqmi ancha kusisqa kanku.​—Leey Salmo 33:12; Hechos 20:35.