Millay reymanta ayqekunku

Juj tutan Jehová Diospa angelnin Joseman mosqoyninpi rijurispa niran: “Jatariy, erqechata mamantawan pusarikuspa Egiptoman usqhaylla ayqekuy, jinaspa chaypi tiyamuy noqa willamunaykama, Herodesmi erqechata maskhamunqaña wañuchinanpaq” , nispa (Mateo 2:13). Chaymi Joseqa rijch’arispa Mariaman chayta willaran.

Jinan paykunaqa Jesusta pusarikuspa chay tutapacha ayqekuranku. Chhaynapin Jesusqa salvakuran rey Herodespa wañuchinanmanta. Yachasqanchis jina, chay reymi watuqkunata kamachiran Jesusmanta willanankupaq, paykunan ichaqa ch’inlla ripuranku llaqtankuman. Chaywanmi Herodesqa sinchitapuni phiñakuran. Chaymi Jesusta wañuchiyta munaspa kamachikuran Belén llaqtapi llapa wawakunata, muyuriqninpi kaq wawakunatawan iskay watayoqmanta urayman kaqkunata wañuchimunankupaq. Chaytan payqa tantearan jayk’aqchus chay watuqkuna ch’askata rikuranku chayman jina.

¡May sonqo nanaychá karan chay wawakunata wañuchisqankuta rikuyqa! Jayk’a wawakunatachá soldadokunaqa wañuchiranku. Chay wawakunaq mamankupas maytachá waqaranku. Chaywanmi junt’akuran profeta Jeremiaspa willasqan profecía (Jeremías 31:15).

Josewan Mariawanmi ichaqa Egiptoman Jesusta ayqechiranku, chaypin paykunaqa qhepakuranku. Juj tutan ichaqa Jehová Diospa angelnin Joseman mosqoyninpi rijurispa niran: “Jatariy, erqechata mamantawan pusarikuspa Israel llaqtaman kutipuy, erqechata wañuchinankupaq maskhaqkunaqa ñan wañupunkuña”, nispa (Mateo 2:20). Jinan Joseqa Mariata Jesustawan pusarikuspa Israel llaqtaman kutimpuran. Chhaynapin junt’akuran “Egiptomantan Churiyta wajamurani” nisqa profecía (Oseas 11:1).

Yaqapaschá Joseqa munasharan Judea provinciapi tiyayta, Belén llaqta cercallapi. Yachasqanchis jina, Belén llaqtapin paykunaqa tiyaranku manaraq Egiptoman ayqekushaspa. Judeapin ichaqa Herodespa wawan Arquelao kamachikusharan, paypas millaymi karan. Chayta Dios willaqtinmi Joseqa familiantin Galilea provinciapi Nazaret llaqtaman ripuran, chaypin Jesusqa wiñaran. Chay llaqtaqa karupin kasharan Jerusalén llaqtamanta. Jesuspa Nazaret llaqtapi wiñasqanwanmi junt’akuran: “‘Nazaret llaqtayoq’ nisqan kanqa”, niq profecía (Mateo 2:23).