Jehová Dios Jesusta pakaykun

Israelpa inti lloqsimuy ladopin juj llaqta tarikurqan, chaypi tiyaq runakunan creerqanku ch’askakuna vidankuta pusarisqanta. Juj tutan wakin runakuna rikurqanku cielopi juj ch’aska puririsqanta, jinan qatipamurqanku. Chay ch’askaqa Jerusalenmanmi pusamurqan. Jinan runakunata tapurqanku: “¿Maypin kashan judío runakunaq reynin kananpaq naceq wawa? Paymanmi k’umuykuyta munayku”, nispa.

Chayta uyarispan Jerusalenmanta rey Herodes sinchita mancharikurqan, jinaspa sacerdotekunata tapurqan: “¿Maypin chay rey nacenan karqan?”, nispa. Paykunataq nirqanku: “Profetakunan willarqanku Belenpi nacenanta”, nispa. Jinan Herodesqa ch’aska qhawaqkunata wajachimuspa nirqan: “Belenpin chay wawataqa tarinkichis. Payta tarimuspa kutimunkichis maypi kasqanta willawanaykichispaq. Noqapas paymanmi k’umuykuyta munani”, nispa. Chayta nispaqa llullakusharqanmi.

Jinan ch’askaqa wajmanta puririrqan, ch’aska qhawaqkunataq qatiparqanku. Ch’askaqa juj wasiq patanpin sayaykurqan, jinan chay runakunaqa chay wasiman jaykuspanku Jesusta maman Mariatawan tarirqanku. Jinaspa wawaq ñaupaqenpi k’umuykuspa regalarqanku qorita, inciensota, sumaq q’apaq mirratawan. Ichaqa, ¿Dioschu chay ch’aska qhawaqkunata kachamurqan? Manan.

Chay tutan Diosqa Joseman mosqoyninpi nirqan: “Herodesmi Jesusta wañuchiyta munashan. Esposaykita wawaykitawan Egiptoman apapuy, chaypi qhepakamuychis kutimunaykichispaq willanaykama”, nispa. Jinan Joseqa familianta kaqpacha Egiptoman pusarqan.

Jehová Diosmi ch’aska qhawaqkunata kamachirqan Herodesman ama kutinankupaq. Jinan Herodesqa sinchita phiñakurqan, jinaspa Jesusta maskharqan. Mana tarispataq kamachirqan Belén llaqtapi Jesús jina edadniyoq llapa wawakunata wañuchinankupaq. Jesusmi ichaqa salvakurqan Egiptopi kasqanrayku.

Tiempowanmi Herodes wañupurqan. Jinan Diosqa Joseta nirqan: “Kunanqa manan pipas wañuchisunkichischu, llaqtaykichisman kutipuychis”, nispa. Chaymi José, María, Jesuspas Israel llaqtaman kutipuspa Nazaret llaqtapi tiyarqanku.