Bautizaq Juan ñanta allichan

29 watapin Jesuspa parienten Juanqa predicayta qallariran. Chaypaqqa 17 watañan pasaran Jesús 12 watanpi kashaspa yachachiqkunata tapusqanmanta. Juanqa Jordán mayu ladopi kaq llaqtachakunapin predicasharan, askha runataqmi paymantaqa rimasharanpas.

Runakunaqa admirakuqkun Juanpa imayna rimasqanwan, imayna p’achakusqanwanpas. Payqa camelloq millmanmanta ruwasqa p’achawanmi p’achakuq, qara chumpiwantaq chumpikuq; saltamontekunata wanqoyroq misk’inta imataq mijuq. Payqa “janaq pacha gobiernon qayllaykamunña, chayrayku juchaykichismanta pesapakuychis” nispan puriq (Mateo 3:2).

Chayta uyarispan runakunaqa anchata kusikuqku, jinaspa reparakuqku juchankumanta pesapakunanku kasqanta. Chaypaqqa yuyayninkuta cambiaspan mana allin ñanpi purisqankuta saqepunanku karan. Askhan Juanman jamuqku ‘Jerusalenmanta, Judeamanta, Jordán mayuq llapan muyuriqninmanta ima’ (Mateo 3:5). Askhataqmi juchankumanta pesapakuspa Jordán mayupi Juanwan bautizachikuqku.

Chaywanmi paykunaqa rikuchiranku Diospa kamachikuyninta mana junt’asqankumanta pesapakusqankuta (Hechos 19:4). Ichaqa manan lliuchu chayta ruwaranku. Chaymi Juanqa payman jamuq fariseokunata saduceokunatawan niran: “Mach’aqway miraykuna, [...] ruwayniykichiswan rikuchiychis juchaykichismanta pesapakusqaykichista. Chaytaq sonqoykichispi nishawaqchis: ‘Taytaykuqa Abrahanmi’, nispa. Niykichismi: Diosqa atiyniyoqmi kay rumikunamantapas Abrahanpaq wawakunata jatarichinanpaq. Hachaqa listoñan kashan sach’akunata saphinmantapacha wit’unapaq, chaymi allin ruruta mana ruruq sach’aqa wit’usqa kaspa ninaman wijch’uykusqa kanqa”, nispa (Mateo 3:7-10).

Askhataq bautizachikusharanku chayqa, wakin sacerdotekuna Leví runakuna iman jamuranku “¿pin kanki?” nispa Juanta tapunankupaq.

Chayta tapuqtinkun Juanqa sut’inta niran: “Manan noqachu Cristoqa kani”, nispa.

Jinan paykunaqa tapullarankutaq: “Chhaynaqa, ¿pitaq kankiri? ¿Eliaschu kanki?”, nispa.

Paytaq: “Manan paychu kani”, niran.

Chaymi tapullarankutaq: “¿Jamunan karan chay profetachu kanki?”, nispa. Paykunaqa Moisespa willasqan profetamantan tapusharanku.

Jinan payqa “manan paychu kani” nillarantaq.

Chaymi wajmanta tapullarankutaq: “¿Pipunitaq kankiri? Niwaykuyá, chhaynapi kachamuwaqniyku runakunaman willanaykupaq. ¿Ima ninkin qan kikiykimanta?”, nispa. Jinan Juanqa niran: “Noqaqa profeta Isaiaspa nisqan jina, ‘Jehová Diospaq ñanta limpiaychis’, nispa ch’inneqpi wajakuqmi kani”, nispa (Juan 1:19-23).

Jinan paykunaqa: “Manataq Cristochu, ni Eliaschu, ni profetapaschu kanki chayqa, ¿imanaqtintaq bautizankiri?”, nispa niranku. Juantaq niran: “Noqaqa unuwanmi bautizani, ichaqa qankuna ukhupin kashan juj mana reqsisqaykichis runa”, nispa (Juan 1:25-27).

Juanqa ñantapas allichashanman jinan runakunaq sonqonta preparasharan Diospa ajllasqan rey Mesiasta chaskinankupaq. Paymantan Juanqa niran: “Qhepayta jamuqmi [...] noqamanta aswan atiyniyoq, manataqmi noqaqa usut’allantapas ch’utinaypaq jinachu kani”, nispa (Mateo 3:11). Nillarantaqmi: “Qhepayta jamuqqa ñauparamuwanmi, noqamanta aswan ñaupaqta kausasqanrayku”, nispa (Juan 1:15).

Chayraykun Juanqa: “Janaq pacha gobiernon qayllaykamunña”, nispa willasharan (Mateo 3:2). Chaywanmi payqa rikuchiran Jehová Diospa ajllasqan rey Jesucristo imachus ruwananta qallarinanpaqña kashasqanta.