Jesusqa manan urmaranchu tentacionkunaman

Jesusqa bautizakusqan qhepamanmi santo espirituq pusasqan kaspa Judeapi ch’inneq ladoman riran. ¡Imaymanapichá piensanan kasharan! Yachasqanchis jina, ‘cielo kicharikamusqanwanmi’ payqa yuyarinman karan janaq pachapi kashaspa imachus ruwasqanta yachasqanta ima (Mateo 3:16).

Jesusqa 40 p’unchayta 40 tutatawanmi ch’inneqpi karan mana imata mijuspa. Jinan sinchita yarqaqtin Satanás payman achhuykuran, jinaspa niran: “Diospa Churinchus kanki chayqa, kay rumikunata niy t’antaman tukunanpaq”, nispa (Mateo 4:3). Jesusqa manapunin kasuranchu chay nisqanta. Payqa allintan yacharan pay kikinpaq ima milagrotapas ruwayqa mana allinchu kasqanta.

Jinan Saqraqa juj tentaciontañataq Jesusman churaran. Temploq perqan pataman apaspan Jesusta niran chaymanta saltaykunanpaq. Jesusmi ichaqa manapuni Diosta pruebaman churayta munaranchu. Chaymi payqa niran: “Qelqasqan kashan: Aman Jehová Diosniykita pruebaman churankichu”, nispa.

Chaymantataq Saqraqa Jesusman qhawarichiran “kay pachapi llapa nacionkunata qhapaq kayninkunatawan”, jinaspa niran: “Qonqorikuspachus juj kutillata adorawanki chayqa, llapan kaykunatan qopusayki”, nispa. Jinan Jesusqa kaq rato “¡ripuy kaymanta, Satanás!” niran (Mateo 4:8-10). Payqa allintan yacharan Jehová Diosllata adorana kasqanta, chaymi Diosllatapuni kasukuyta munaran.

Askhatan yachasunman chay kutipi Jesuswan imachus pasasqanmanta. Chaypin sut’ita rikukuran Saqraqa mana cuentollachu kasqanta, aswanpas millay espíritu kasqanta. Chaymantapas Saqra llapa gobiernokunata Jesusman munachisqanpin yachallanchistaq llapa gobiernokuna paypa makinpi kashasqanta. Manachus paypa kanman chayqa, manachá chaykunataqa munachinmanchu karan.

Saqraqa imaynan Jesusmanpas imaymanata munachiran, chhaynatan noqanchismanpas imaymanata munachiwasunman urmachiwananchispaq. Yaqapaschá munachiwasunman qhapaq kayta, autoridadniyoq kayta, otaq kay pachapi allin qhawarisqa kaytapas. ¿Imatan ruwananchis chhayna tentacionkunata churawaqtinchis? Jesús jinan tukuy sonqonchiswan Diosllata kasukunanchis. Saqraqa manan samanqachu urmachiwananchiskama, Jesusta tentaspapas ‘jayk’aqchus allin kanman wajmanta tentananpaq chaykamallan ripuran’ (Lucas 4:13). Chayraykun Saqra mana urmachiwananchispaqqa rijch’asqallapuni kashananchis.