Jesús Nazaret llaqta sinagogapi yachachin

Unaymantan Jesusqa Nazaret llaqtanman kutisharan, juj wata masñan pasaran bautizachikusqanmantapas. Llaqtamasinkunaqa carpintero jina llank’ashaqllatan Jesustaqa rikuranku. Juj llaqtakunapi milagrokuna ruwamusqanmanta uyarispankun ichaqa munasharanku chaypipas milagrokuna ruwananta.

Jesús imaynachus ruwallaqpuni jinata sinagogaman jaykuqtinqa astawanchá payta rikuyta munaranku. Payqa rillaqpunitaq chay sinagogaman chayqa, reqsiranchá chaypi kashaqkunataqa. Sinagogakunapiqa ‘sapa sabadon’ runakunaqa Diosmanta mañakuqku, chaypin Moisespa qelqasqankunata, profetakunaq qelqasqan wakin partekunatapas leeqku (Hechos 15:21). Leenanpaq sayariqtinmi payman jaywaranku Isaías qelqa k’uyuta, jinan payqa chay qelqapi maskharan Diospa ajllasqan runamanta willaq parteta. Chay parten kunan tarikun Isaías 61:1, 2 textopi.

Chaypin willakushan Diospa ajllasqanqa presokuna kacharichisqa kananmanta, ñausakuna qhawarinanmanta, Jehová Diospa chaskinan watamantawan willanan kasqanta. Chayta leeyta tukuspan Jesusqa chay qelqata waqaychaqman qopuspa tiyaykuran. Runakunaqa makillan payta qhawasharanku, jinan payqa chay leesqanmanta rimayta qallariran. Chaypin niran: “Kunan p’unchaymi kay leesqay qelqa junt’akun”, nispa (Lucas 4:21).

Llapankun admirasqa kasharanku “ancha sumaq simikuna rimasqanmanta”, ichaqa ninakusharankun: “Kayqa Josepa wawallanmá riki, ¿imaynapitaq chaytari ninman?”, nispa. Paykunaqa milagrokuna ruwanantan munasharanku, chaymi Jesusqa niran: “Rimaypi nisqankuman jinachá: ‘Doctor, qan kikiykita jampikuy’, niwankichis; niwallankichistaqchá: ‘Capernaum llaqtapi imaymana ruwasqaykitan uyariyku, ruwallaytaqyá kay llaqtaykipipas chaykunata’, nispaykichis”, nispa (Lucas 4:22, 23). Paykunapaqqa llaqtanpiraqmi Jesusqa milagrokunata ruwanan karan; manataq chaytachu ruwaran chayqa, pisichasqa jinan sientekuranku.

Chayta yachaspan Jesusqa niran: ‘Eliaspa tiemponpiqa askha viudakunan Israel llaqtapi karan, chaywanpas Eliasqa manan chay viudakunamanta mayqenmanpas kachasqachu karan, aswanpas Sidonpi kaq Sarepta llaqtapi tiyaq viudallamanmi’, nispa (1 Reyes 17:8-16). Nillarantaqmi: ‘Profeta Eliseoq tiemponpipas askhan lepra onqoyniyoq runakunaqa Israelpi karan, ichaqa Siria llaqtayoq Naamanllan qhaliyachisqa karan’, nispa (2 Reyes 5:1, 8-14).

Chay runakunaqa mana iñiq, paykunallapi piensaq runakunan karanku, chaymi Jesuspa willasqanta uyarispa sinchita phiñakuranku, jinaspa usqhaylla Jesusta llaqtamanta orqoranku. Chaymantataq llaqta jatarichisqanku orqopi sayaq qhata patakama aparanku chaymanta qaqapachinankupaq. Jesustaq ichaqa chaupinkuta lloqsispa chaymanta ripuran Galilea qochaq cercanpi kaq Capernaum llaqtaman.