Capernaum llaqtapi askha milagrokunata ruwan

Pedrota, Andresta, Santiagota, Juantawan wajasqan qhepamanmi Jesusqa paykunawan kuska Capernaum llaqtapi sinagogaman jaykuran. Chaypin payqa Diospa nisqanman jina yachachiran, manan kamachikuy simita yachachiqkuna jinachu, chaymi runakunaqa anchata admirakuranku imayna yachachisqanmanta.

Chay sinagogapin kasharan supaypa junt’aykusqan runa, paymi qaparispa niran: “Nazaret llaqtayoq Jesús, ¿iman noqaykuwan ruwanayki? ¿Wañuchiwaqniykuchu jamushanki? Allintan yachani pichus kasqaykita, qanqa Diospa ch’uya Churinmi kanki”, nispa. Jesustaq chay supayta phiñarikuran: “¡Upallay, lloqsiy paymanta!”, nispa (Marcos 1:24, 25).

Jinan chay millay espirituqa chay runata ataquewan jap’ichispa pampaman wijch’urpariran, sinchita qaparispataq “mana k’irispalla paymanta lloqsiran” (Lucas 4:35). Chayta rikuspan runakunaqa ancha admirasqa ninakuranku: “¿Ima rimaytaq kayri? Atiywanmi millay espiritukunatapas kamachin, paykunataq kasukuspa runakunamanta lloqsinku”, nispa (Marcos 1:27). Chay pasasqanmanta willakuyqa jinantin Galilea provinciapin mast’arikuran.

Sinagogamanta lloqsispan Jesusqa discipulonkunapiwan Pedroq wasinta riranku. Chaypin Pedroq suegran sinchi fiebrewan onqosqa kashasqa. Jinan Jesusta rogakuranku yanapananpaq, chaymi Jesusqa payman achhuykuspa makinmanta jap’iykuspa jatarichiran, fiebrentaq thanirapuran, jinan chay warmiqa paykunata atiendeyta qallariran, yaqapaschá mijunata wayk’upuspa.

Inti jaykuyta jinataq runakunaqa imaymana onqoyniyoqkunata Pedroq wasinman apamuranku, ancha askha runakunan jamuranku, Jesustaq ‘sapanka onqosqaman makinta churaykuspa qhaliyachiran’ (Lucas 4:40). Ima onqoyniyoqña runakuna kasharanku chaypas, llapantan Jesusqa qhaliyachiran; chhaynapin paymanta willasqa profecía junt’akuran (Isaías 53:4). Chay kutipin askha supaykunatapas qarqoran. Chay supaykunaqa yacharankun Jesús Cristo kasqanta, chaymi qapariranku: “Qanqa Diospa Churinmi kanki”, nispa (Lucas 4:41). Jesusmi ichaqa paykunata anyaspa upallachiran, payqa manan dejaranchu Diostapas servishankuman jina rimanankuta.