Jesús jinantin Galileapi predican

Ñaupaqpi yachasqanchis jina, ch’isiyaqmi Jesusqa Capernaum llaqtapi imaymanata ruwaran, inti jaykuy qhepatapas askha runakunatan qhaliyachiran. Chaymi mana sapallan kananpaqpas tiempon karanchu.

Chaymi paqaristinqa rankhi-rankhillaraq kashaqtin juj ch’in ladoman lloqsiran Yayanmanta mañakuq. Jinan ‘Pedroqa paywan kashaqkunapiwan Jesusta maskhaq riranku’. Pedron paykunataqa pusanman karan paypa wasinpi Jesús alojakusqanrayku (Marcos 1:36; Lucas 4:38).

Jesusta tariqtinkutaq Pedroqa niran: “Lliumi maskhamushasunki”, nispa (Marcos 1:37). Capernaum llaqta runakunapas paykunapaq Jesús imaymanata ruwapusqanraykun payta “valekuranku ama ripunanpaq” (Lucas 4:42). Jesusmi ichaqa mana milagrokuna ruwaqllachu kay pachamanqa jamuran, manataqmi chay llaqtallapichu imatapas ruwanan karan.

Chaymi payqa discipulonkunata niran: “Jaku waj ladokunaman, kay qaylla llaqtakunaman, chaypipas allin willakuykunata willanaypaq, chaypaqmi noqaqa jamurani”, nispa. Chay llaqta runakunatapas niranmi: “Juj llaqtakunapipas willamunaymi Diospa gobiernonmanta allin willakuykunataqa, chaypaqmi Diosqa kachamuwaran”, nispa (Marcos 1:38; Lucas 4:43).

Chaypi nisqan jina, Jesusqa Diospa gobiernonmanta willananpaqmi jamuran. Chay gobiernon Yayanpa sutinta ch’uyapaq jap’ichinqa, runakunaq tukuy nanaynintapas jujpaqkama chinkachinqa. Jesusqa Diospa kachamusqan kasqanta rikuchinanpaqmi askha runakunata qhaliyachiran. Chhaynatan Moisespas ñaupa tiempopi milagrokunata ruwaspa rikuchiran Diospa kachamusqan kasqanta (Éxodo 4:1-9, 30, 31).

Chaymantan Jesusqa tawa discipulonkunantin riran juj llaqtakunata predicaq. Chay discipulonkunan karan Pedro, wayqen Andrés, Juan, wayqen Santiagopiwan. Yachasqanchis jina, paykunatan Jesusqa juj semana ñaupaqta wajaran lliu llaqtakunapi puriysinankupaq.

Chay discipulonkunawanmi Jesusqa jinantin Galileapi puriran predicaspa. Chhaynapin Jesusmanta willakuyqa askha llaqtakunaman ch’eqeriran. Chaymi ‘Siria provinciantinpi’, “Decápolis” nisqa chunka llaqtakunapi, Jordán mayuq waj ladonpi kaq llaqtakunapipas Jesusmanta willakuyqa uyarikuran (Mateo 4:24, 25). Tukuy chay llaqtakunamanta Judea provinciamantapas askha runakunan Jesusta qatikuranku. Onqosqakunatapas askhatan payman apamuranku, paytaq llapankuta qhaliyachiran, askhatan supaykunatapas qarqoran.